Kwotaskok: helfte van SA skolespan toe wél swart
Die Suid-Afrikaanse skolerugbyspan is vandeesweek aangekondig – mét streng kwotavoorskrifte wat tot op die letter gevolg is.
School of Rugby het verlede week berig dat Mervyn Green, die ontwikkelingshoof van die Suid-Afrikaanse Rugbyunie (Saru), vroeër die nasionale skolekeurders aangesê het dat minstens die helfte van die spanlede swart spelers moet wees.
Sover vasgestel kon word, is dit die eerste keer nóg dat dié kwota amptelik op skolevlak afgedwing word.
Dié opdrag is verlede Donderdag in Middelburg, Mpumalanga, op ’n keurdersvergadering by die Cravenweek gegee – meer as ’n week voordat ’n finale ronde proewe in Kempton Park gehou is.
Die groep vir dié proewe is boonop van 50 tot 55 vergroot om plek vir meer spelers van kleur plek te maak.
Jurie Roux, Saru se uitvoerende hoof, het Maandag in ’n verklaring ontken dat daar só ’n opdrag gegee is.
“Saru het géén opdrag aan die keurders van die Suid-Afrikaanse skolespan gegee ten opsigte van hoeveel spelers van kleur daar in die span moet wees nie en daar het nie só ’n vergadering plaasgevind nie,” het Roux gesê.
Volgens Roux “is dit nie nodig vir só ’n beleid nie”.
“Daar was reeds genoeg spelers van kleur wat hul stempels afgedruk het.
“Ons het dit egter al voorheen aan die bestuur van die onderskeie junior ouderdomsgroepe duidelik gestel dat daar genoeg goeie swart spelers is om ’n hoër vlak van verteenwoordiging te handhaaf – selfs soveel as die helfte van die span.”
Van die finale groep van 28 spelers, wat Donderdag bekend gemaak is, is 14 swart.
Roux het vroeër aan Rapport gesê dié spelers is reeds op o.16-vlak geïdentifiseer – en dat ander spelers wat by die Cravenweek beïndruk, nie sommer ingesluit sal word nie.
Tog is daar net ses spelers in die groep van 28 wat ook in 2012 die laaste o.16-hoëprestasiegroep gehaal het.
Dié skolespan sluit nege Blou Bulle in.
Die span sal later vandeesmaand in ’n reeks “toetse” teen Frankryk, Wallis en Engeland in Kaapstad, George en Stellenbosch te staan kom.
Hein Kriek van Paul Roos, wat die WP by die Cravenweek afgerig het, brei dié span.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
