Skole onttrek oor ‘beginsel’
Die drie Groot-skole van die Goue Leeus se besluit om aan die onderskeie eindstryde teen Helpmekaar-kollege te onttrek is ‘n beginselsaak, meer as wat dit ‘n geval is dat hulle net boedel oorgee.
“Ons het daarna gekyk dat ons die kinders van ‘n geleentheid ontneem om in ‘n eindstryd te speel, maar ons drie skole het uit beginsel die besluit geneem om nie die wedstryde te speel nie. Ons sien dit as die beste besluit vir ons skolespanne,” het Dr. Jorrie Jordaan, hoof van Hoërskool Linden gesê. Linden, Hoërskool Randburg en Hoërskool Riebeeckrand is die drie skole wat aan die Leeus se eindstryd onttrek het.
Helpmekaar is dus die Leeus se Groot-skole kampioen in die vier betrokke ligas en sal tot die Beeldtrofee as die Leeus se voorste spanne deurdring. Die skole het glo reeds verlede jaar hulle ontevredenheid dat hulle nie teen Helpmekaar wil speel nie aan die Goue Leeus se Hoërskole-rugbyvereniging (GLHRV) te kenne gegee.
Helpmekaar se werwing van spelers is glo ook een van die redes wat tot die ongelukkigheid bygedra het.
“Helpmekaar se groei is vir ons verblydend. Hulle het ongeveer tien jaar terug as ‘n klein skool aan die ligas deelgeneem en tot ‘n groot skool gegroei. Hulle spelers se verteenwoordiging in die provinsiale spanne getuig daarvan dat hulle groei vir ons as unie baie beteken. Ek sien dat hulle in die toekoms as makro-skool sal deelneem en so ons as unie versterk,” het Tinus Diedericks, voorsitter van die GLHRV gesê.
“Daar is vir verskeie jare reeds `n onwilligheid van die groot skole om teen Helpmekaar te speel as gevolg van die feit dat Helpmekaar as privaatskool baie meer vermoënd is en ander voordele het wat openbare skole nie het nie. Die gevolg is dat hulle heeltemal te sterk geraak het vir die liga en dat skole begin weier het om teen hulle te speel,” lui ‘n verklaring van dié drie skole oor hulle ontrekking.
“Ek vra om verskoning dat die matriekseuns nie ingelig is dat ons nie teen Helpmekaar in die eindstryd sal speel nie,” het Jordaan gesê.
Linden se eerstespan se breiers, Francois Vosloo en Gert van den Berg, was Donderdag nie by die span se oefening omdat hulle by van die Goue Leeus se verteenwoordigende spanne as breiers betrokke is. Die span se kondisionerings afrigter, Stefan van Deventer, was wel by die oefening. Hy was egter nie ingelig oor die besluit nie.
“Die Leeus se bestuur moet die aangeleentheid volgens hulle grondwet hanteer. Daar is niks volgens die reels van die Beeldtrofee wat Helpmekaar oortree het nie. Ons as Noordvaal se bestuur kan slegs intree as so geval gebeur wanneer dit die Beeldtrofee se wedstryde behels,” het Jackie Tredoux, voorsitter van die Noordvaal se bestuur gesê.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
