Midstream College se eerste Bowl toets kom teen 2025 naaswenner

Die nuwe struktuur in vanjaar se Bowl-afdeling van die nuutvernoemde Virseker Noordvaal Cup gee aan drie nuwelinge die geleentheid om hul staal op ’n hoër vlak te toets.

Een van dié nuwelinge, Midstream College, sal Saterdag reeds behoorlik getoets word wanneer die Wes-streek van die Bowl-afdeling in Potchefstroom afskop.

Die ander streek, genaamd die Oos-streek, skop Saterdag, 9 Mei, af.

Die span van Midrand sal na die studentedorp reis om teen 2025 se naaswenner, Potchefstroom Gimnasium, in sy agterplaas swaarde te kruis.

Boonop was die Gimmies in 2024 dié afdeling se kampioen voordat hy ’n jaar later deur sy ou vyand, Potchefstroom Volkskool, onttroon is. Die tuisspan het hoeka ’n groot kontingent spelers wat van dié span oorgebly het.

De Wet Grobbelaar, wat vanjaar die span aanvoer, is waarskynlik een van die grootste bedreigings vir die besoekers. Grobbelaar was reeds as Graad 11 ’n uitblinker en klop vanjaar hard aan die Luiperds se Cravenweek-deur. Hy draf Saterdag op agtsteman uit.

Sy losskakel, Zandré Da Silva, is ook vir ’n tweede jaar terug op sy pos. Da Silva se eerste jaar op eerstespanvlak het reeds sy kalmte en goeie visie gewys, iets waarop die Gimmies vanjaar sal staatmaak in hul soeke om die Bowl-titel weer in hul kas te kry.

Vir Midstream sal ‘n sege oor een van die vroeë gunstelinge goud werd wees. Hy was oor die laaste paar jaar ’n konstante krag in dieselfde kompetisie se Afdeling 2. Daarom ook die rede dat hulle vanjaar die Bowl sal trotseer.

Die besoekers se pak, en spesifiek die lostrio, onder leiding van agtsteman Henke Griffoen sal na die volgende rat wil en móét oorskakel indien hulle Grobbelaar en kie wil neutraliseer. Agterlangs sal heelagter Ryan Strauss, ook die kaptein van Midstream se eerste krieketspan, fyn dopgehou moet word wanneer hy sy teenaanvalle loods.