Kaapse spanne, Parkie-eerstes beïndruk op Dag 2 van Menlo-toernooi
Die tweede dag van die Menlo-Netbaltoernooi 2025 het nogmaals spel van hoogstaande gehalte opgelewer, met ‘n aantal spanne wat bo die res begin uitstyg het.
Spanne vanuit die Kaap, soos Durbanville, Bellville, Paarl Gimnasium, Paarl Girls’ High, DF Malan, Swartland, Brackenfell en Rhenish, sowel as die gasheerspan, Menlopark 1, het uitgestaan op die tweede dag van aksie in Pretoria.
Durbanville het stewig vertoon met seges van 31–20 oor Duineveld en 27–19 oor Edenvale, terwyl Bellville met 25–4 vir Wonderboom kafgedraf het voordat hulle vir Alberton met 37–4 afgeransel het.
Menlopark 1 het ’n taai kragmeting teen Bloemhof met 26–18 gewen en ’n belangrike oorwinning van 29–21 teen Monnas aangeteken. Parkies se tweede span het egter teen Brackenfell (10–20) en Rhenish (14–16) vasgeval. Rhenish het ’n goeie dag beleef deur ook vir Krugersdorp met 21–10 en Oosterland met 16–7 te troef.
DF Malan het afgeskop met 23–21 teen Linden, vir Capricorn met 22–17 verslaan en ook ‘n indrukwekkende sege van 13–11 behaal oor Middelburg, wat met ’n 24–18 gewen het teen Dr Malan en naelskraaps met 17–16 die pyp gerook het teen Milnerton.
Swartland het hulself onderskei as een van die konsekwentste spanne met oorwinnings oor Merensky (21–10) en Frans du Toit (19–12), terwyl Stellenbosch ook met Frans du Toit (24–13), Hans Moore (13–9) en Merensky (16–14) afgereken het, danksy puik taktiese spel en afronding.
Paarl Girls’ High het oortuig met seges van 30–9 oor Secunda en 29-10 oor Outeniqua, terwyl Paarl Gimnasium twee swaar- maar welverdiende oorwinnings behaal het teen Helpmekaar (22–16) en Oranje 1 (20–17), en later ook net-net vir Ermelo met 16–15 verslaan het.
Brackenfell het drie stabiele vertonings opgedis, teen Menlopark 2 (20–10), Capricorn (17–14) en Drostdy (15–9). Oranje 1 was in ‘n titaniese stryd gewikkel met Rand Park, wat met 7–7 gelykop geëindig het, nadat hulle vroeër met 18–14 teen Monnas geseëvier het. Oranje 2 het oortuigend met 25–8 teen Capricorn gewen en ook vir Hans Moore met 18–13 verslaan.
Onder die naelbyt-uitslae van die dag tel die eenpunt-seges van Dr Malan oor Rand Park (11–10) en Secunda oor Northcliff (17–16), terwyl Potch Gim vir Hugenote met 21–16 getroef het. Randburg het Lydenburg met 20–6 verslaan, en Ben Vorster het hul momentum behou met ’n sege van 22–13 oor Diamantveld.
Helpmekaar het indrukwekkend vertoon met hul sege van 29–8 oor Duineveld, terwyl Wonderboom vir Vredendal met 13–8 en Worcester Gimnasium vir Hans Moore met 15–9 verslaan het.
Die sukses van die Menlo-Netbaltoernooi lê egter nie slegs in dié tellings nie, maar verál ook in die gees van sportmangees en verbondenheid wat by hierdie gewilde byeenkoms heers.
Dag 2 | Uitslae
| nt_header_1 | nt_header_2 | nt_header_3 | Score |
|---|
- Tshwane dra kroon by Telkom Kampioenskap - 2025-07-15
- Delta maak stem dik by SASN All Ages 2025 - 2025-07-03
- Gabby Smith: Die stem van haar pa, die hart van haar span - 2025-06-20
