SuperSport Schools Plus

SSS_logo_Cricket

Williams laat Eldo-kolwers wankel

By Franco Oberholzer , in Cricket | News , at 2024-01-29 Tags: , , , , , ,

Foto: DG Sport Foto’s

Hoërskool Kemptonpark het Saterdag, te danke aan ‘n merkwaardige boulskof deur Martin Williams, sy tweede gemaklike sege in afdeling-B van die Finsbury-reeks, teen Hoërskool Eldoraigne, behaal.

Williams het die Eldo-kolwers behoorlik laat wankel. Hy het vyf paaltjies vir slegs 30 lopies in sy agt boulbeurte laat spat.

Dit was egter nie alleen Williams wat skade aangerig het nie. Warren Pretorius was ook witwarm met die bal en het drie paaltjies geneem wat die Eldo’s tot slegs 131 beperk het.

Johan Broekman (42) en Ryno Broekman (22) was die Pretorianers se keur met die kolf . Die twee voorslagkolwers het gewys dat geduld by die kolfkampie kan lei tot woordevolle lopies, met albei wat hard gespook het om Eldoraigne in ‘n beter posisie te probeer plaas.

Dit het egter voorgekom of die Kempton-kolwers op ‘n ander blad kolf. Die span se twee aanvangskolwers het die nodige werk gedoen, met Floors Mynhardt wat voor in die koor was met ‘n onoorwonne beurt van 62 lopies.

Sy aanvangsmaat, Wian Pieters (51), was ewe goed op dreef. Die twee se volwasse beurte het die Kempies se telling na 116 opgejaag, voordat Johan Broekman die eerste, en laaste deurbraak kon maak.

Potchefstroom Gimnasium het vir Hoërskool Monument gemaklik met 202 lopies geklop. Caiden Seleka se beurt van 122 het die Gimmies stewig aan die stuur van sake geplaas. Saam met Seleka was James Wood ook lekker op dreef. Sy bydrae van 82 lopies het beteken dat die twee ‘n vennootskap van 178 lopies aanmekaar kon slaan om die Gimmies se telling op 288/9 te staan te bring in hul toegelate 50 beurte .

Die Monnas-kolwers het op hul beurt klippe gekou teen ‘n venynige Gimmie-boulaanval. Die Gimmies se kaptein, Tommie Botha, het vir die tweede agtereenvolgende week vier kolwers teruggestuur pawiljoen toe. Jahndre Coetzee het hom bygestaan met twee paaltjies van sy eie.

Slegs Monnas se staatmaker, JD Landsberg, kon ‘n taamlike beurt aanmekaarslaan. Landsberg het bykans die helfte van sy span se lopies aangeteken.

Hoërskool Hans Moore het Afdeling-B se tweede ronde met ‘n nege-paaltjie sege teen Hoërskool Montana afgesluit. Die Monties se sukkelende kolflys het weer na ‘n bruikbare vennootskap van 76 lopies tussen Luca Bairos (53) en Luhan Theunissen (20) ietwat inmekaargestort.

Adrian Watson (4/11) en Brenton Francis (3/13) was die Hansies se keurboulers. Die twee het gesorg dat die paaltjies behoorlik kantel, met sewe paaltjies vir slegs 24 lopies wat in dié twee se gekombineerde boulskof gespat het.

Die Hansies se twee aanvangskolwers, Stephan Vermaak (97) en Kenhan Shaw (55*) het gevolglik ligte werk gemaak van die 161 lopies wat benodig was. Vermaak se uitsonderlike beurt het van slegs 64 aflewerings gekom, en het nege sesse en ses viere ingesluit.

Konrad Koukeas was die enigste suksesvolle Montie-bouler. Hy het die einste Vermaak terug pawiljoen toe gestuur, maar die skade was reeds aangerig, en  Shaw se beurt kon dus verseker dat Hans Moore die Monties se telling in die 22ste beurt verbysteek.

Beknopte telkaarte: 

Eldoraigne: 131 (Johan Broekman 42, Ryno Mulder 22; Martin Williams 5/30, Warren Pretorius 3/35). Kemptonpark: 133/1 (Floors Mynhardt 62*, Wian Pieters 51; Johan Broekman 1/29). Kemptonpark wen met nege paaltjies.

Potchefstroom Gimnasium: 288/9 (Caiden Seleka 122, James Wood 82; Andre van Niekerk 4/37). Monument: 86 (JD Landsberg 41; Tommie Botha 4/22, Jahndre Coetzee 2/20). Potchefstroom Gimnasium wen met 202 lopies.

Montana 160 (Luca Bairos 53, Luhan Theunissen 20; Adrian Watson 4/11, Brenton Francis 3/13). Hans Moore: 161/1 (Stephan Vermaak 97, Kenhan Shaw 55*; Konrad Koukeas 1/21). Hans Moore wen met nege paaltjies.

 

error: Sorry ol' chap, those shenanigans are not permissible.