Tweede ronde van Kovsies Smash word gepootjie deur nat weer
Die tweede ronde van die Kovsies Smash is aan die einde van die dag gepotjie deur nat weer. Dit het verhoed dat sewe van die agt wedstryde beslis kon word. Slegs Hoërskool Kalahari en Hoërskool Witteberg kon sake vir die volle 40 beurte uitspook.
Die toernooi se organiseerders het besluit dat geen spanne, wie se wedstryde nie voltooi kon word nie, punte sal kry nie. Die rede daarom is dat die laaste dag se groepsronde beslis wie in die Beker, Plaat en Bowl-afdelings sal meeding.
Daar was egter geen tekort aan opwindende aksie voor die weer die dag tot ‘n einde gebring het nie. Hoërskool Pietersburg se uitblinker, Hanno van Zyl, het in die spore van Davyd Oosthuizen gevolg en die ronde se boulsyfers oorheers. Van Zyl het vyf paaltjies laat kantel in sy indrukwekkende skof waarin hy slegs 19 lopies afgestaan het.
Ondersteuning van Dian Gouws (2/30) het Hoërskool Trio tot ‘n teleurstellende 112 vir 9 in sy 20 boulbeurte beperk. Die weer het ongelukkig nie toe gelaat dat die Pieties enigsins kans kon kry om Trio se telling te jaag nie en die wedstryd is afgelas sonder dat daar ‘n uitslag moontlik was.
In die wedstryd tussen Hoërskool Sasolburg en die Dragons van Despatch was daar ook geen tekort aan aksie nie. Meyer Pretorius (63) het die lang steel ingelê en 63 lopies van slegs 36 balle gemoker. Liam Singleton was ook in ‘n vernietigende bui en het hy ‘n blitsige 44 van slegs 26 aflewerings bygedra.
In die enigste wedstryd wat voltooi is was dit Marco Grobler (39) en Janco Botha (33) wat deurslaggewend was in Witteberg se oorwining van 19 lopies teen Hoërskool Kalahari. Die duo het gesorg vir ‘n vennootskap van 72 lopies van net 68 aflewerings wat verseker het dat Witteberg 130/5 in sy toegelate boulbeurte kon bereik.
Met die bal in hand was dit Dumisani Johnsen (3/11) en Zander Fourie (3/16) wat te veel vrae vir die Kalahari-kolwers gevra het.
Slegs Carl Thole kon hond haaraf maak met ‘n goeie onoorwonne 30 lopies, om sy uitmuntende boulsyfers van 3 vir 18 af te rond.
Beknopte telkaarte:
Witteberg 130/5 (Marco Grobler 39, Janco Botha 33, Stefan Geldenhuys 23; Carl Thole 3/18); Hoërskool Kalahari 111/9 (Carl Thole 30*, SW van Heerden 20; Dumisni Johnsen 3/11, Zander Fourie 3/16, Lesego Masikidi 2/31). Witteberg wen met 19 lopies.
Hoërskool Middelburg 113/8 (Reuben Branmulle 34, Herman Potgieter 24*; Liam Theron 2/5, Adrian De Necker 2/18); Jim Fouché 75/3 in 10 bbe. (Lian Theron 41; Hendre Nel 1/9). Wedstryd afgelas.
Voortrekker 120/7 (André Heunis 37, Joel Coetzee 34; M Dreyer 3/30, E Dreyer 2/18); Wesvalia nie gekolf. Wedstryd afgelas.
Hoërskool Trio 112/9 (Miguel Menino 36, Danie Fourie 23; Hanno van Zyl 5/19, Dian Gous 2/30); Hoërskool Pietersburg nie gekolf. Wedstryd afgelas.
Overvaal 67 (EW Botes 15; JM Rensburg 4/11, GJ Wessels 2/6); Goudveld-Hoërskool 45/2 in 4 bbe. (Hendro Boardman 19; Zander Olivier 2/20). Wedstryd afgelas.
HTS Middelburg 141/8 (Anthoni Smuts 38, WJ Enslin 37; Nathan Ackerman 3/26, Michael Craywagen 2/28); Fichardtpark 10/2 (Toy Engelbrecht 2/10). Wedstryd afgelas.
Hoërskool Sasolburg 157/8 (Meyer Pretorius 63, Liam Singleton 44; Luke Julyan 3/24, Tristan Scholtz 3/38); Despatch nie gekolf. Wedstryd afgelas.
Oos-Moot 118/5 (Chrisjan van Staden 41, Elmar Theron 35; Daniel Buys 3/24, Reshe Wales 2/21); Sentraal 16/0 in 3 bbe. Wedstryd afgelas.
- Maphaka earns maiden test call-up - 2024-12-01
- Fixtures for the 2024 CSA u16 Boys Week - 2024-11-29
- Kleingeld verruil Paul Roos vir Gimmies - 2024-11-26
