Prinsloo, Bastiaanse kook om Klofies se eindstryd-droogte te breek
Hoërskool Waterkloof se Blou Tornado het Saterdag sy oorheersing teen Hoërskool Monument voortgesit met ‘n tweede agtereenvolgende sege.
Herleef al die Noordvaal Cup Beker-aksie op SuperSport Schools – (www.supersportschools.com)
Die Klofies het met dié oorwinning van 35-34 oor die Wit Bulle hul eerste Noordvaal-eindstryd in meer as ‘n dekade gehaal. Dit was egter so hittete of die Pretorianers het die sege deur hul vingers laat glip.
Die Monumentare het ‘n uitstaande laaste 15 minute opgedis om 17 punte in ‘n oogwink aan te teken.
Die tuisspan se heelagter, Ronan Bastiaanse, verdien ‘n stewige klop op die skouer vir die wyse waarop hy die besoekers met die stewel gelooi het. Hy het drie doelskoppe en drie strafdoele deur die pale gejaag, asook ‘n drie gedruk, vir ‘n persoonlike bydrae van 20 punte.
Dit was egter die tweestryd tussen die skrumskakels wat die kollig gesteel het. Monnas se Evan Bernhardi was waarskynlik die beste speler op die veld, en het met sy hope vaart en gevaarlike lopies om die afbreekpunte die Klofies telkens geflous.
Die tuisspan se Migael Prinsloo het, benewens sy uitstekende diens aan losskakel, Dennis Obi, ook beïndruk met sy puik ondersteunende spel en is beloon met ‘n tweekuns, wat ‘n deurslaggewende rol in die Pretorianers se oorwinning gespeel het.
Indien daar ‘n toekenning vir die mees konsekwente speler deur die seisoen gegee moes word, sou Monnas se steelkantflank, RJ Barnard, se naam beslis in die hoed gewees het. Barnard se fisieke maar bedrieglike barslopies het vir die Klofies meer as een keer onkant betrap, vernaam in die eerste helfte toe die Klofie-pak taamlik loodvoet daar uitgesien het.
Dit was eers na rustyd dat haker, Ruan Jacobs, en oopkantflank, Divan Botha, hul ritme begin vind en die vuur onder die res van die pak aangesteek het.
Puntemakers:
Waterkloof 35 (13) – Drieë: Migael Prinsloo (2), Ronan Bastiaanse, Malcolm George. Doelskoppe: Bastiaanse (3). Strafdoele: Bastiaanse (3). Monument 34 (10) – Drieë: RJ Barnard, Evan Bernhardi, Tasliem Guyan, Ewan van der Walt, Strafdrie. Doelskoppe: Hugo van der Merwe (2). Strafdoel: Van der Merwe.
Ander spanne:
o.16: Helpmekaar 30, Monument 14; Noordheuwel 29, Garsfontein 15.
o.15: Monument 31, Garsfontein 12; Noordheuwel 30, Menlopark 25.
o.14: Monument 22, Noordheuwel 19; Hoërskool Rustenburg 24, Garsfontein 20.
- Brandmuller’s bat the difference in Middelburg’s win over Secunda - 2024-09-10
- Big win for Wesvalia in nail-biter - 2024-09-09
- Swanepoel and Van Zyl, Merensky’s nightmare - 2024-09-09
