Oranje byna onoorwonne by Menlopark-toernooi
Die C&N Sekondêre Meisieskool Oranje van Bloemfontein het die Menlopark-netbaltoernooi oorheers, met hul o. 19 A-span wat byna onoorwonne geëindig het en agt van hul 10 wedstryde gewen het.
Oranje het ook een wedstryd gelykop gespeel en slegs een nederlaag van 16-20, teen Hoërskool Bloemhof, gely.
Die ander ouderdomsgroepe het ook prysenswaardige prestasies behaal.
Die o. 19 B-span het vier wedstryde gewen en ses verloor, terwyl die o. 17 A’s vier oorwinnings behaal, een gelykop gespeel en vier keer verloor het.
Die o. 16 A-span het vier gewen, een gelykop gespeel en sewe verloor, terwyl die 0. 15 A’s sterk vertoon het met sewe oorwinnings, een gelykopuitslag en drie nederlae. Die o. 14 A-span het vyf gewen en sewe verloor.
Surita le Roux, Oranje se hoof-netbalafrigter, meen dat Oranje hard werk om as ‘n eenheid te speel en te presteer.
“Die hele eerstespan het bygedra tot die sukses van die afgelope paar dae,” sê sy.
“Ons besef egter dat dit slegs die begin van die seisoen is, en dat daar nog harde werk en vele uitdagings voorlê. Dit is vir ons ‘n groot voorreg om Oranje te verteenwoordig en ons sien uit om as span te ontwikkel en te groei hierdie jaar.”
Die toernooi, wat oor vier dae by Hoërskool Menlopark, in Pretoria, aangebied is, het deurgaans intensiewe kragmetings op 10 bane gelewer. Altesaam 44 skole het deelgeneem, wat bygedra het tot die opwinding van die 880 wedstryde wat gespeel is.
Met 151 spanne en 1532 spelers in aksie, het die toernooi netbaltalent van regoor die land tentoongestel, wat dit een van die gesogste netbaltoernooie maak.
Die o. 19 A-uitslae:
Oranje 29, 6 Florida; Oranje 29, Edenvale 19; Oranje 34, Diamantveld 14; Oranje 21, Potch Gim 18; Oranje 18, Paarl Gim 16; Oranje 34, Diamantveld 14; Oranje 14, Helpmekaar 13; Oranje 28, Monument 13; Oranje 22, Menlopark 22; Bloemhof 20, Oranje 16.
