Middies, Oosies nogmaals ewe goed
‘n Wedstryd van twee helftes, maar steeds niks wat die Middies en Oosies skei nie.
Herleef al die Noordvaal Cup se Plaat-aksie op SuperSport Schools – (www.supersportschools.com)
In hul langverwagte herontmoeting kon Hoërskool Middelburg en Hoërskool Oos-Moot steeds nie die dooiepunt tussen hulle breek nie.
Die twee spanne, wat vroeër vanjaar met 33-33 gelykop gespeel het in die NWU Sportreeks, het Saterdag op dieselfde veld, in die SDC Noordvaal Cup se Plaat-afdeling, wéér die louere met 29-29 gedeel.
Dit was beslis ‘n wedstryd van twee helftes, met die Middies wat die eerste 35 minute oorheers het om teen rustyd met 19-10 voor te loop.
Slot, Enrico Thompson, het, in ‘n wedstryd waar die Middies se voorspelers hand moes opsteek, kop en skouers bo die res uitgestaan. Nie alleen het hy die Oosie-verdedigers deurgaans besig gehou met sy begeesterde dryfspel nie, maar ook oor die doellyn gebars vir ‘n welverdiende tweekuns.
Binnesenter, Lungelo Maseko, het met sy kragspel in die middeveld verder bygedra tot die Middelburgers se oorheersing voor die omdraaislag.
Aan Oos-Moot se kant het Dewron Aford duidelik sy gunstelingposisie gevind met sy spelpeil wat dramaties gelig het sedert sy skuif van heelagter na losskakel. Sy dinamiese dartellopies het juis die tuisspan se terugvegpoging na rustyd geloods.
Flank en kaptein, Wade Williams, wat ‘n stillerige seisoen beleef het, het ook hand opgesteek en waarskynlik sy beste wedstryd van die seisoen gelewer met sy vernuf om gapings aan te val.
‘n Uitstaande vertoning deur Hoërskool Klerksdorp se buitesenter, Winton Abrahams, het bygedra daartoe die Klerksdorpers hul laaste wedstryd op tuisbodem met 26-10 kon wen teen die voorlopers in die afdeling, Hoërskool Transvalia. Die span van Klerksdorp is steeds onoorwonne op hul tuisveld.
Voorrymanne, De Wet Le Roux (loskopstut) en Liam Pretorius (vaskopstut), het ‘n soliede fondasie daargestel, met ‘n kragtige vertoning in die vaste fasette en woelige spel in die vastelos. Dit het vir Abrahams en sy fisieke sentermaat, Asif Sumara, in staat gestel om die Valia-agterhoede gas te gee.
Die besoekers se indrukwekkende haker, Jayden McPearson, het moedig probeer om die span van Vanderbijlpark in die wedloop te hou en was, tesame met skrumskakel, Anro Nagel, die span in ligblou se groot uitblinkers in Klerksdorp.
Ligbron Akademie se twee sterre, linkervleuel, Bandile Thanjekwayo, en heelagter, Anele Ngwenya, het in die tweede helfte na hoogste versnelling oorgeskakel om elk twee keer te druk in ‘n oortuigende oorwinning van 47-22 oor Hoërskool Kempton Park. Die Kempies, wat nie vanjaar volgens potentiaal presteer het nie, het nietemin in die eerste helfte uitstekend vertoon op die verdediging.
Binnesenter, Tiaan Delport, het uitgetroon met 17 van sy span se 22 punte, danksy vyf strafdoele en ‘n doelskop, om sy span in die kragmeting te probeer hou.
Dit het Thanjekwayo en Ngwenya egter nie lank ná die omdraaislag geneem om die Kempies se verdediging uiteindelik uit te oorlê nie. Tiaan Botha, wat van oopkantflank na slot geskuif het, was ondergewoonte bedrywig voorlangs.
Hoër Tegniese Skool Middelburg het sy kanse om ‘n tuishalfeindstryd te verseker vergroot. Met die Middies se gelykopuitslag, wat ook hul laaste rondomtallie-wedstryd was, is die Rooi Bulle se bonuspuntsege van 36-7 oor Hoërskool Zwartkop ‘n uiters belangrike een. Hiervoor verdien die agttal ‘n klop op die skouer .
Die Rooi Bulle se dieselenjin het van meet af die botoon gevoer onder leiding van agsteman, Tercius Bezuidenhout, en haker, Hanru Terblanche. Bezuidenhout het twee keer gedruk, terwyl Terblanche ook met ‘n vyfpunter beloon is.
Puntemakers:
Oos-Moot 29 (10) – Drieë: Tapiwa Rwafa, David Joubert, Wade Williams, Dewron Aford. Doelskoppe: Ruwan Allen (3). Strafdoel: Allen. Hoërskool Middelburg 29 (19) – Drieë: Enrico Thompson (2), Lungelo Maseko, Sihle Mkhatshwa, Jacques Greyling. Doelskoppe: Crawford Joubert (2).
Hoërskool Klerksdorp 26 (19) – Drieë: Winton Abrahams (2), Heinrich Hovener, Tyron Masango. Doelskoppe: Deacon Loots (2), Liam Pretorius. Transvalia 10 (5) – Drieë: Jayden McPearson, Anro Nagel.
Ligbron Akademie 47 (14) – Drieë: Bandile Thanjekwayo (2), Anele Ngwenya (2), Siyanda Dennison, Janco Claasen, Tiaan Botha. Doelskoppe: Renier van Staden (5), Divan van Jaarsveld. Hoërskool Kempton Park 22 (15) – Drie: Tian Aucamp. Doelskop: Tiaan Delport. Strafdoele: Delport (5).
HTS Middelburg 36 (17) – Drieë: Tercius Bezuidenhout (2), Hanru Terblanche, Ethan Kock, Anthoni Smuts, WJ Enslin. Doelskoppe: Jaque Stassen (2), WJ Enslin. Zwartkop 7 (0) – Drie: Zulu Mona. Doelskop: Luhardt Booyens.
Ander spanne:
o.16: Kempton Park 16, Ligbron 15; Transvalia 60, Klerksdorp 7; Middelburg 27, Oos-Moot 22; HTS Middelburg 14, Zwartkop 12.
o.15: Kempton Park 19, Ligbron 17; Klerksdorp 34, Transvalia 13; Middelburg 7, Oos-Moot 3; Zwartkop 15, HTS Middelburg 12.
o.14: Kempton Park 28, Ligbron 5; Klerksdorp 10, Transvalia 10; Middelburg 17, Oos-Moot 13; HTS Middelburg 15, Zwartkop 8.
- Batsmen carry Marais Viljoen to win over EG Jansen - 2024-09-12
- It’s T20 time as the Westvaal North/South returns - 2024-09-11
- Brandmuller’s bat the difference in Middelburg’s win over Secunda - 2024-09-10
