SuperSport Schools Plus

SSS_logo_Cricket

Merkwaardige Van Zyl sink Centurion

By Franco Oberholzer , in Cricket | Featured , at 2024-01-22 Tags: , ,

Die Hoërskool Nelspruit se Vaughn van Zyl (5/19) het vroegoggend gesorg vir absolute chaos. Die aanvangsbouler het drie vinnige paaltjies laat spat om die Hoërskool Centurion op ses vir vyf te laat wankel.

Die Woeries se reddingspoging is gelei deur een van sy sleutelspelers, Rehan Lues. Lues se 65 lopies het sy span effens uit die moeilikheid gekry, maar konstante druk deur Vaughn en kie het die span van Pretoria tot slegs 118 lopies beperk.

Nathan Duncan se 26 lopies, tesame met John Duncan se bydra laer af in die orde, was genoeg om die Nellies se eerste oorwinning in die Finsbury-reeks met vyf paaltjies te verseker.

Die Hoërskool Waterkloof se aanvangskolwers het geen tyd gemors om Die Hoërskool Rustenburg se boulaanval onder druk te plaas nie. Wian Ruthven was soos oudergewoonte in ‘n vernietigende bui met ‘n aggressiewe beurt van 129 lopies. Sy beurt het vier viere en nie minder nie as nege sesse ingesluit.

Sy vennoot, Divan Behrens (75), se volwasse beurt het bygedra dat die twee ‘n vennootskap van 215 lopies om die eerste paaltjie kon bymekaarsit.

Dit was egter nie die laaste strooi nie. Marcus Bakker (50) het ook ‘n aandeel gehad, terwyl Franco Cronje (49, 25b) verdere sout in die Rusties se wonde gevryf het.

Met ‘n reuse telling van 338 lopies om te jaag was dit slegs Wesley Bruwer (41) en Logan Rossouw (37) wat waardevolle bydraes kon maak. Marcus Bakker was die gevaarman met die bal in die hand, en het drie paaltjie laat spat vir slegs 19 lopies.

Saam met verdere bydraes deur die res van die Klofie-boulers is die Rusties tot ‘n teleurstellende 130 beperk, wat beteken dat hierdie jaar se gunstelinge sy toernooi kon afskop met ‘n reuse oorwinning van 207 lopies.

Potchefstroom Volkskool het ‘n groot stelling gemaak nadat hy die ander gunstelinge, Hoërskool Menlopark, vir slegs 126 uitgeboender het.

Diaan van der Merwe was aan die stuur van sake. Die draaier was die voorste paaltjievraat op die dag met syfers van vier vir 29 lopies. Boonop het daar ‘n waardevolle 55 lopies van sy kolf gekom.

Louis van Wyk het sy Finsbury op hoë noot afgeskop. Die voorslagkolwer het die Menlo-boulers behoorlik onder druk gesit met ‘n uiters goeie 77 lopies om die beurt te anker.

Dian van Zyl (36) was byna die enigste Menlo-kolwer wat met gemak gekolf het. Hy het die hoogste telling vir sy span aangeteken en was die enigste wat teen ‘n treftempo van meer as 100 kon kolf.

Dit was egter nie goed genoeg nie en die teiken van 251 was net ‘n raps te ver vir die span van die Jacarandastad.

Beknopte telkaarte: 

Centurion: 118 (Rehan Lues 65; Vaughn can Zyl 5/19); Hoërskool Nelspruit 121/5 (Nathan Duncan 26, R Nel 25, John Duncan 23; Morne Venter 2/20, Wouter Kielblock 2/23). Hoërskool Nelspruit wen met vyf paaltjies.

Waterkloof: 337/5 (Wian Ruthven 129, Divan Behrens 75, Marcus Bakker 50, Franco Cronje 49*; Nathan Rossouw 3/46); Hoërskool Rustenburg 130 (Wesley Bruwer 41, Logan Rossouw 37; Marcus Bakker 3/19, Franco Schmidt 2/10, Luan Ferreira 2/12, Marno Piennar 2/28). Waterkloof wen met 207 lopies.

Potchefstroom Volkskool: 250 (Louis van Wyk 77, Diaan van der Merwe 55, Attie Liebenberg 47; Jean le Roux 3/44, Gerhard Engelbrecht 3/54); Menlopark: 126 (Dian van Zyl 36, Wian van Deventer 26; Diaan van der Merwe 4/29, Berno de Klerk 3/26, Olefa Padi 2/6). Potchefstroom Volkskool wen met 124 lopies.

error: Sorry ol' chap, those shenanigans are not permissible.