Meesterlike Makate maak Monnas mak
Klofies se Happy Makate het Saterdag sy reputasie as een van die beste senters in die Noordvaal Cup (drie)dubbeld en dwars gestand gedoen.
Herleef al die Noordvaal Cup Beker-aksie op SuperSport Schools – (www.supersportschools.com)
Die meester van Hoërskool Waterkloof se middeveld het drie keer deurgewals vir ‘n gedenkwaardige driekuns in sy span se sege van 53-45 oor Hoërskool Monument.
Met dié bonuspuntsege het die Klofies die Beker-afdeling se rondomtalie-fase as die nr. 1-span op die puntelys afgesluit en geniet hulle derhalwe eerskommende naweek tuisveldvoordeel in die halfeindronde, wéér teen Monument.
Die afgelope naweek se kragmeting het in die tweede helfte behoorlik vlamgevat, maar die tuisspan het, soos verwag, vir die volle 70 minute aanhou baklei vir daardie tuishalfeind.
Die Krugersdorpers het ‘n agterstand van 19-31 teen rustyd in die gesig gestaar, maar hul ritme skitterend herwin en die wipplankstryd wat hom in die tweede 35 minute afgespeel het is deur die Monumentare se binnesenter, Hugo van der Merwe, en skrumskakel, Evan Bernhardi, met ‘n tweekuns elk ingelei.
Die Klofie-pak het vir die eerste keer sedert die besering aan Marko Kok weer op alle silinders gevuur, met slot, Mikhal Odendaal, wat die aanslag gelei en die besoekers van Pretoria se rekening met sy tweede drie in soveel wedstryde geopen het. Nóg goeie nuus vir die Blou Tornado is dat hul Cravenweek-senter en kaptein, Riwan van Aswegen, suksesvol teruggekeer het van sy skouerbesering en in die tweede helfte opgekom het om een van sy span se ses drieë te druk.
In die ander kragmeting in Krugersdorp, het Hoërskool Noordheuwel en Hoërskool Nelspruit Vrydagmiddag hul ondersteuners vergas op een van die aanskoulikste wedstryde in vanjaar se afdeling.
Die Nories en Rhinos het alles uitgehaal in hul laaste wedstryd van die seisoen en, met letterlik niks te kies tussen die twee spanne nie, was die uiteindelike telling van 40-40 waarskynlik die getrouste weergawe van die tweestryd.
Die skote het behoorlik geklap voorlangs, met die Nellies se agsteman, Vaughn van Zyl, en haker, Regardt Vermaak, oudergewoonte in die middel van die spervuur. Nories se kaptein. Meyer Opperman, in sy laaste wedstryd vir die Blues, was ewe vurig en het vanjaar in ‘n uitstekende oopkantflank ontwikkel.
Agterlangs het Jenemo Luiters, Noordheuwel se regtervleuel, deurentyd ‘n bedreiging ingehou met sy bedrieglike vaart en aanvalsvernuf, terwyl Nellies se senter en kaptein, Ian Wood, se rotsvaste verdediging en netjiese aanvalslyne kenmerkend was en ‘n beduidende rol in die uitslag gespeel het.
Puntemakers:
Waterkloof 53 (31) – Drieë: Happy Makate (3), Mikhal Odendaal, Dennis Obi, Riwan van Aswegen. Doelskoppe: Ronan Bastiaanse (4). Strafdoele: Bastiaanse, Makate. Monument 45 (19) – Drieë: Hugo van der Merwe (2), Evan Bernhardi (2), Ewan van der Walt, Justin Viljoen, Jamaal Feldman. Doelskoppe: Hugo van der Merwe (3), Justin Viljoen (3).
Noordheuwel 40 (28) – Drieë: Lindsey Jansen, Jenemo Luiters, Clinton Agu, Francois Venter, Meyer Opperman, Ethan Smith. Doelskoppe: Jeandre Uithaler (5). Hoërskool Nelspruit 40 (14) – Drieë: Jordan Pretorius (2), Prosper Chillione, Vaughn van Zyl, Ian Wood, Tinyiko Shilubane. Doelskoppe: Theuns Meyer (5).
Ander spanne:
o.16: Monument 44, Waterkloof 22; Noordheuwel 35, Nelspruit 19.
o.15: Monument 52, Waterkloof 17; Noordheuwel 29, Nelspruit 7.
o.14: Monument 14, Waterkloof 10; Noordheuwel 24, Nelspruit 19.
- Brandmuller’s bat the difference in Middelburg’s win over Secunda - 2024-09-10
- Big win for Wesvalia in nail-biter - 2024-09-09
- Swanepoel and Van Zyl, Merensky’s nightmare - 2024-09-09
