Liggies skyn wéér helderste in FNB Classic Clashes-stryd

Hoërskool Lichtenburg het wéér koning gekraai in hul jaarlikse FNB Classic Clashes-kragmeting met Hoërskool Klerksdorp.

Herleef al die aksie op SuperSport Schools – (www.supersportschools.com).

Die Liggies het die afgelope naweek vir die besoekers van Klerksdorp met 12-7 in Lichtenburg verslaan. Dit is die tweede agtereenvolgende jaar dat Lichtenburg as oorwinnaars uit die jaarlikse tweestryd met hul tradisionele vyande tree, nadat hulle verlede jaar, in Klerksdorp, met 31-27 die knoop kon deurhak.

Vanjaar was albei spanne rotsvas op die verdediging, met die gevolg dat daar nie veel geleenthede was vir avontuurlustige hardlooprugby nie.

Die twee pakke het mekaar behoorlik opgedreun, en dit was asembenewend om die genadelose duikslae en fisieke konfrontasie voorlangs te aanskou. Die tweestryd tussen die steelkantflanke was verál hewig.

Tiaan Booysen, die Liggies se kantman, het gewoeker in die vastelos, die besoekers laat bontstaan met sy kragtige dryfspel en is met ‘n drie beloon. Aan die kant van Klerksdorp was dit sy naamgenoot, Tiaan Koen, wie se hoë werkverrigting en vasberadenheid op die verdediging deurgaans beïndruk het.

Agterlangs het Liggies se buitesenter en ander driedrukker, Dundré Dempers, vir Klerksdorp se middeveld kwaai hoofbrekens besorg met sy effektiewe aanvalslyne en vermoë om spasie aan te val. Winton Abrahams, wat op heelagter vir die besoekers uitgedraf het, het uitstekende teenaanvalle geloods, waarvan een ook vir hom op ‘n drie uitgeloop het.

Puntemakers:

Lichtenburg 12 (12) – Drieë: Tiaan Booysen, Dundré Dempers. Doelskop: Albert Joubert. Klerksdorp 7 (0) – Drie: Winton Abrahams. Doelskop: Brendin Mathyse.

Ander spanne:

o.16: Klerksdorp 22, Lichtenburg 5.

o.15: Klerksdorp 18, Lichtenburg 13.

o.14: Klerksdorp 10, Lichtenburg 9.

• About
• Latest Posts

Franco Oberholzer

Franco is a sports fanatic from Tzaneen, a small town in Limpopo. Obsessed with both cricket and rugby, he still does the sport at club level when given the chance. Combining the rush of sports with his other passion, writing, gives him the fix any sport-crazy fan needs. In his spare time, he spends quality time with family and friends, preferably around a braaivleis fire.

Latest posts by Franco Oberholzer (see all)

• Maphaka earns maiden test call-up - 2024-12-01
• Fixtures for the 2024 CSA u16 Boys Week - 2024-11-29
• Kleingeld verruil Paul Roos vir Gimmies - 2024-11-26