Jansies skok Monnas op die Ras, Ferreira ryg ses drieë vir die Jade Brigade in
KRUGERSDORP. – Daar sal ongetwyfeld so bietjie bomskok onder die Hoërskool Monument se Wit Bulle en hul ondersteuners heers.
Dr. EG Jansen van Boksburg het vir die eerste keer sedert 2015 daarin geslaag om die Wit Bulle om te dop. Of kom ons sê liewer met 41-17 af te slag.
Die sege beteken ook dat daar slegs twee spanne, die Jansies en die Hoërskool Garsfontein met ‘n onoorwonne status in vanjaar se Beker-afdeling van die SDC Noordvaal Cup kan spog.
Dit was boonop Monnas se eerste nederlaag in dié reeks sedert hy in 2019 teen Helpmekaar-kollege (22-27) in die halfeindstryd die knie moes buig.
Monnas kom volgende Saterdag in ‘n herontmoeting van verlede jaar se eindstryd teen Garsfontein in Pretoria te staan.
EG Jansen se heelagter, David Twala, was op sy stukke teen Monnas en kon feitlik nie ‘n voet verkeerd sit nie. Hy het veral met sy lang lynskoppe die druk na die tuisspan verplaas. Hy het boonop ‘n skitterende lopie van ongeveer 50 meter vanaf ‘n teenaanval afgerond.
Die wenspan se buitesenter, Jeandré Jacobs, het ook weer gewys hoe gevaarlik hy kan wees wanneer hy te veel spasie gegun word. Hy het drie keer ‘n draai agter Monnas se doellyn gemaak.
Noordheuwel het nie veel probleme ondervind om die Hoërskool Nelspruit se Rhinos met 65-7 kaf te draf nie.
Die span se losskakel, JT Kapank, het weer die punte ingeryg en 21 punte tot sy span se totaal bygedra. Kapank het ses van sy span se nege drieë verdoel en ook drie strafdoele oor die pale geklits.
Helpmekaar se Ulrich Swart (flank) en Michael Benzien (senter) was aan die voorpunt van hul span se oorwinning van 29-22 oor Marais Viljoen van Alberton.
In Groep 2 van die Noordvaalreeks sal dit keer kos om Midstream College te keer om sy titel suksesvol te verdedig. Die span het vir Pretoria-Noord in 39 minute met 61-10 afgeransel.
Die Hoërskool Ermelo sal sy Puma-titel in die groep teen Rob Ferreira van Witrivier verdedig. Die Erries moes hard werk om HTS Witbank met 15-11 in die halfeindronde te verslaan. In die ander halfeindstryd het Rob Ferreira vir Piet Retief met 28-26 verras.
Daar was gewis behoorlik feesgevier in Makhanda Saterdagaand. Die drie skole van die Oos-Kaapse dorp – Graeme College, St Andrew’s College en Kingswood College het drie indrukwekkende seges oor onderskeidelik Grey High School (22-8), Selborne College (26-13) en Dale College (22-0) behaal.
Hilton College sal heel moontlik weer vanjaar die seisoen as die voorste skolespan in KwaZulu-Natal afsluit. Die span het vir Maritzburg College met 29-14 getroef.
Dit was ‘n sopnat en koue dag in die Wes-Kaap. Die Hoër Jongenskool Paarl kon egter genoeg hond haaraf op die Tinkie Heyns-veld maak om die bordjies na verlede jaar teen Rondebosch Boys’ High met 12-7 te verhang.
Paul Roos Gimnasium het in ‘n modderbad in die Markotter-stadion in Stellenbosch vir SACS met 26-7 geklop, terwyl Paarl Gimnasium se loskopstut, Xander Mynhardt, ‘n driekuns aan drieë in sy span se oorwinning van 45-7 oor Bishops behaal het.
Stellenberg se flank Marco Ferreira het ‘n dag beleef wat hy nie sommer gou sal vergeet nie. Hy het ‘n nuwe rekord vir die Jade Brigade opgestel deur ses keer in sy span se wegholsege van 60-5 oor Parel Vallei die doellyn oor te steek.
Hoërskool Durbanville se senter James Nero het ook ‘n driekuns aan drieë behaal in sy span se sege van 72-12 oor Hoërskool Bellville. Dit het sy totaal vir die seisoen tot ‘n allemintige 25 drieë opgestoot. Hy het verlede jaar ook 32 drieë vir sy skool se eerstespan ingeryg.
Al die uitslae:
SDC NOORDVAAL CUP
Groep 1
Beker: EG Jansen 41, Monument 17; Noordheuwel 65, Nelspruit 7; Helpmekaar 29, Marais Viljoen 22. Plaat: Hoërskool Middelburg 43, Hoërskool Klerksdorp 25; Hoërskool Rustenburg 29, Zwartkop 22; Kempton Park 28, Montana 27. Skild: Oos-Moot 33, Heidelberg Volkskool 32; Hugenote (Springs) 18, Ben Vorster 13. Bowl: Hoërskool Alberton 29, Dr. Malan 12; Potchefstroom Volkskool 24, Hoërskool Pietersburg 23; Wesvalia 18, Merensky 8.
Groep 2
Blou Bulle: Midstream College 61, Pretoria-Noord 10; Wonderboom 26, Hoërskool Tuine 26; Centurion 29, HTS John Vorster 17. Goue Leeus: Limpopo: Ellisras 48, Hans Strijdom 10; Frikkie Meyer 25, Frans du Toit 5; Ben Viljoen 25, HTS Tom Naudé 14. Pumas: Rob Ferreira 28, Piet Retief 26; Ermelo 15, HTS Witbank 11. Valke: Oosterlig 29, Driehoek 17; Leeuwenhof 18, Brandwag (Benoni) 17;
Groep 3
Limpopo: Warmbad 24, Curro Heuwelkruin 22. Luiperds: Brits 47, Hartbeespoort 13. Pumas: Standerton 26, Generaal Hertzog 5.
Groep 4
Goue Leeus: Allen Glen 45, Goudrif 0; Bekker 38, President 7; Queens High 40, Carletonville 5.
KWAZULU-NATAL
Hilton College 29, Maritzburg College 14; Clifton 38, St David’s Marist 15; Michaelhouse 38, Northwood 12; Kearsney College 31, St Charles College 15.
NOORDVAAL
Jeppe 22, Pretoria Boys’ High 16; St Benedict’s College 22, Parktown Boys’ High 18; St Alban’s College 21, Northcliff 15; St John’s College 34, St Benedict’s College 22; Potchefstroom Gimnasium 17, Dinamika 10; Randburg 32, Bergsig Akademie 12.
OOS-KAAP
Framesby 38, Die Brandwag (Uitenhage) 8; St Andrew’s College 26, Selborne College 13; Kingswood College 22, Dale College 0; Pearson 48, HTS Daniël Pienaar 17; Graeme College 22, Grey High School 8; Marlow Landbou 45, Hudson Park 0.
WES-KAAP
Hoër Jongenskool Paarl 12, Rondebosch Boys’ High 7; Boland Landbou 24, Wynberg Boys’ High 15; Paarl Gimnasium 45, Bishops 7; Paul Roos Gimnasium 26, SACS 7; Brackenfell 21, Hottentots-Holland 0; Stellenberg 60, Parel Vallei 5; HTS Drostdy 73, Tygerberg 5; Melkbosstrand 32, Malibu 12; Edgemead 16, Vishoek 10; Hoërskool Durbanville 72, Hoërskool Bellville 12; Bosmansdam 41, Grootte Schuur 6; Hugenote (Wellington) 35, DF Malan 22.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
