Jakarandastad kan uitsien na aksiebelaaide naweek
Die Jakarandastad kan uitsien na ‘n aksiebelaaide naweek van krieket wanneer Hoërskool Menlopark en Hoërskool Waterkloof in die derde ronde van die Finsbury-reeks teen mekaar te staan kom.
Waterkloof is tot dusver nog onoorwonne na twee inspirerende vertonings teen Hoërskool Rustenburg en Hoërskool Centurion. Kaptein, Beukes van den Berg, is na ‘n puik beurt van 126 in ronde twee, goed op dreef.
Na ‘n ietwat sukkelende seisoen tot dusver, behoort dit heelwat selfvertroue vir hom te bied, wat in sy taak as paaltjiewagter kan oorspoel. Sy goeie spelpeil met die kolf en selfvertroue agter die paaltjies maak van hom ‘n groot gevaar vir Menlopark.
Die aanvangskolwer, Divan Behrens, is ook lekker op dreef. Behrens het in twee wedstryde reeds 176 lopies aangeteken, wat ‘n hondertal (101) en ‘n vyftigtal (75) ingesluit het.
Menlopark sal ook na ‘n goeie oorwinning van 89 lopies teen Hoërskool Rustenburg in ronde twee, meer gerus voel. Wian van Deventer en kie kan uitsien na waarskynlik hul belangrikste kragmeting, terwyl van Deventer se selfvertroue ‘n stewige hupstoot sou gekry het nadat hy Menlo se keurkolwer teen die Rusties was.
Dian van Zyl sal die Menlo-kolflys verder verstewig en wil voortbou op sy beurt van 45 lopies verlede week.
Matt van der Westhuizen sal die Klofie-kolwers op hul tone hou as Menlo se vooraanstaande bouler na die eerste twee rondes van die reeks.
In Centurion verwelkom Hoërskool Centurion ‘n sterk Hoër Volkskool Potchefstroom. Volkies se Louis van Wyk sal uitsien daarna om Pretoria, met die bal en die kolf, op horings te neem.
Tesame met Diaan van der Merwe vorm van Wyk die kern van die Potchefstromers se kolfaanslag. Die draaier, Olefa Padi, sal weer sy plek as gevaarman in die middelste beurte inneem. Padi het ‘n beduidende rol in die Volkies se oorwinning teen Hoërskool Nelspruit gespeel.
Hy sal egter teen die vernietigende Rehan Lues te staan kom. Die middelorde-kolwer is tot dusver goed op dreef. Sy treftempo van meer as 100 sal die Volkie-boulers behoorlik toets.
Lues sal ook ‘n konstante gevaar vir die Volkie-toporde inhou wanneer hy weer die nuwe bal vir die Pretorianers neem.
Die span se kaptein, Charl Prinsloo, sal sy puik spelpeil met die kolf wil voortsit. Prinsloo was die Woeries se keurkolwer in hul kragmeting met Waterkloof.
Die span se twee nederlae en tuisveldvoordeel behoort as genoegsame motivering te dien vir hom en die res van sy span om die Volkies Saterdag te troef.
Hoërskool Nelspruit en Hoërskool Rustenburg geniet ‘n loslootjie, na die twee spanne reeds verlede Vrydag kragte gemeet het.
Pretoria Boys’ High verwelkom Grey College van Bloemfontein wanneer die twee spanne Saterdag swaarde kruis. Die span van Bloemfontein was vandeesweek in Johannesburg in wedstryde teen onderskeidelik King Edward VII School en St John’s College betrokke.
Die Bloemfonteiners het na ‘n goeie oorwinning van 95 lopies teen St John’s, goeie momentum begin bou. Die Boys’ High span sal egter nie te versmaai wees nie.
Die span van Pretoria het verlede naweek, na ‘n goeie terugvegpoging met die bal, hul kragmeting met Afrikaans Hoër Seunskool met 30 lopies gewen.
- Player Profile – Gavin Genis (Hoërskool Middelburg) - 2024-12-03
- Maphaka earns maiden test call-up - 2024-12-01
- Fixtures for the 2024 CSA u16 Boys Week - 2024-11-29
