Erries en HTS John Vorster pak mekaar weer soos in 2000
Die Hoërskool Ermelo is waarskynlik die enigste skolespan in die land wat daarmee kan spog dat hul deur ‘n Wêreldbeker-wenner afgerig word. Die Erries se hoofafrigter, Rudy Joubert, was die Springbokke se tegniese adviseur toe hulle in 1995 die William Webb Ellis-trofee omhoog gehou het.
Joubert was ook die Biltongboere, Namibië, se breier toe hulle in 1999 hul buiging by die Wêreldbeker gemaak het. Boonop is Joubert se hulpafrigter, Cilliers Coetzer, wat vir onder andere die Pumas en Griekwas op seniorvlak uitgedraf het.
Coetzer het ook natuurlik vir Ermelo se trots in 1999 uitgedraf.
Die Erries kom Saterdag in die kwarteindronde van die SDC Noordvaal Cup se Groep 2 teen HTS John Vorster op sy tuisveld in Ermelo te staan.
Volg al die aksie regstreeks op SuperSport Schools (www.supersportschools.com).
Die twee spanne het mekaar natuurlik ook in 2000 in die eindstryd van die Beeldtrofee gepak met Ermelo wat destyds na 80 jaar weer as kampioen van die Noordvaal-streek met ‘n klinkende sege van 23-3 gekroon is. HTS John Vorster se kaptein op daardie dag was die toekomstige Springbok-agtsteman, Jacques Cronjé.
Ermelo se kaptein en held was sy losskakel, Nel Fourie. Die Erries was natuurlik ook die eerste kampioen van dié reeks in 1920 toe dit nog as die Transvaalbeker bekend gestaan het.
Die Erries het sy plek in vanjaar se kwarteindronde met ‘n naelskraapse sege van 32-29 oor Brandwag van Benoni bespreek. Dit was danksy ‘n drie in die doodsnikke deur sy agtsteman, Tredoux Ferreira. Terwyl die skrumskakel, Carel Jacobsz, se skopskoen ook ‘n sleutelrol vertolk het.
HTS John Vorster beskik oor ‘n omgesukkelde pak voorspelers. Hul kaptein en slot, SJ van Mourik, lei van voor en het verlede week in hul uitspeelwedstryd teen Ben Viljoen van Groblersdal sy 50ste wedstryd vir dié skool se eerstespan gespeel. Die bonkige agtsteman, Tiaan van Loggerenberg, sal meeste spanne probleme besorg wanneer hy met die bal op stormloop gaan.
In nog ‘n kwarteindstryd sal die verdedigende kampioen van Groep 2, Midstream College, moet waak daarteen om nie te oorgerus te wees nie. Die Blou Bulle-kampioen kom op sy tuisveld teen Overkruin te staan.
Midstream College het vanjaar in hul ligawedstryd teen Overkruin met 33-27 as oorwinnaars van die veld gestap. Die span se twee afrigters, Henry Verster en Christiaan van der Merwe, sal seker maak dat hul span besef dat ‘n uitspeelwedstryd ‘n heel nuwe uitdaging is.
Overkruin se agterhoede is gevaarlik met veral die buitesenter, Leequine Fredricks, asook die vleuels, Waylon Oncke en Tao Fabri, wat skade kan aanrig indien hul te veel spasie gegun word.
Die spanne is:
Hoërskool Ermelo vs HTS John Vorster in Ermelo om 11:15:
Ermelo: 15 Thabo Mokwena, 14 Milo Ngwenya, 13 Edwin Smit, 12 Nicolas Steyn, 11 Phosa Mnqoba, 10 Luthando Mhlangu, 9 Carel Jacobsz, 8 Tredoux Ferreira, 7 Eben Genade, 6 Minenhle Mkhwanazi, 5 JJ Erasmus, 4 Niel Landman, 3 Lindo Linda, 2 Nardus de Wet, 1 Siba Lamola.
HTS John Vorster: 15 Christian Nel, 14 Nathan Buckley, 13 Ruben Bester, 12 Andrew Botha, 11 Bladen Hart, 10 Xander Roesch, 9 André Huyser, 8 Tiaan van Loggerenberg, 7 Reagan van der Merwe, 6 Heinrich Coetzee, 5 SJ van Mourik (kaptein), 4 Christoff Lombard, 3 Armand Beetge, 2 Drikus Coertze, 1 Michael Oosthuizen.
Midstream College vs Overkruin in Midrand om 10:30:
Midstream College: 15 Luca Jankovic, 14 Jean Holtzhausen, 13 Yanko Cronjé, 12 Ewan van Niekerk, 11 Thomas Stofberg, 10 Jeanré Lourens, 9 Thomas Pretorius, 8 Jahred Smit, 7 Nicholas Grobler, 6 Louis Verhof, 5 Nathan Judlesohn, 4 Neil de Vleeschauwer, 3 Keiran van Wijk, 2 Hanno Britz, 1 Leeunard Ehlers.
Overkruin: 15 Jiftal Langeveld, 14 Waylon Oncke, 13 Leequine Fredricks, 12 Owam Freempong, 11 Tao Fabri, 10 Marnus Rademeyer, 9 Christon de Kooker, 8 Victory Akinwunmi, 7 Marko Smith, 6 Okuhle Hini, 5 Divan Maré, 4 Musa Vukela, 3 Justin Kunz, 2 Barend Buys, 1 Jandré Pieterse.
Skeidsregter: Reghardt O’Neill.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
