SuperSport Schools Plus

SSS_logo_Cricket

Botha se kolf vuurwarm vir Fichies teen Kalahari

By Franco Oberholzer , in Cricket | News , at 2024-01-09 Tags: , ,

FOTO: Dirkie Groenewald/Absolute Photos

Die Hoërskool Fichardtpark se Eben Botha se indrukwekkende hondertal van 138 van slegs 53 aflewerings het aan sy span ‘n plek in die halfeindronde van die Kovsie Smash bespreek.

Botha was in ‘n vernietigende bui en het die die bal 19 keer na die grenstou toe gestuur, waarvan 15 vir die eerste keer aan die ander kant van die grenstou grond gevat het.

Botha se aanslag het die Fichies se telling opgejaag na 211/8, die span se tweede totaal van oor die 200 vir dié dag.

Daar was heelwat drama in die Hoërskool Kalahari van Kuruman se kolfbeurt toe sy afrigter besluit het sy kolwers moet van die veld kom weens swak lig na slegs 4.5 boulbeurte.

Volgends die reëls sou die span van Kuruman ten minste ses boulbeurte moes kolf vir die wedstryd om ‘n uitslag volgens die Duckworth/Lewis te hê. Die besluit om die veld weens swak lig te verlaat moes egter by die skeidsregters gelê het.

Die feit dat die afrigters van Kalahari die besluit in eie hande geneem het, het die organiseerders egter met ‘n reuse tameletjie gelaat. ‘n Oorwinning is toe aan die Fichies toegeken.

Botha is ook na afloop van die eerste twee dae se spel met 230 lopies die voorste lopiemaker in die Kovsie Smash.

Die Fichies sal in sy halfeindstryd teen die Hoërskool Middelburg te staan kom. In die ander halfeindstryd van die Hoërskool Wesvalia van Klerksdorp teen HTS Middelburg sake uitspook.

Wesvalia se Dreyer-duo het ook gesorg dat die span van Klerksdorp deurdring. Marco Dreyer (59) en Eduard Dreyer (38) het verseker dat die Klerksdorpers na 20 beurte hul beurt op 176/4 kon afsluit.

Eduard Dreyer het sy kolfvertoning afgerond met uitmuntende boulsyfers van vier paaltjies vir slegs 16 lopies. Marco Dreyer het ook gesorg dat hy sy pond vleis tafel toe bring met die bal in hand en het drie paaltjies vir agt lopies laat kantel.

In die Plaat-uitpele sal Oos-Moot teen ‘n omgekrapde Kalahari-span te staan kom en sal die vonke behoorlik spat tussen die twee spanne. Boonop verwelkom die span van Kuruman vir Malan Lubbe terug in sy geledere. Hy was tot Dinsdag nog vir die Western Legends op Krieket Suid-Afrika se Cubs-week in Stellenbosch in aksie.

In die ander uitspeelwedstryd in die Plaat-afdeling sal Hoërskool Pietersburg met die Dragons van Despatch swaarde kruis.

Die Skild-afdeling se halfeindstryde sal beslis word tussen Hoërskool Sentraal en die sukkelende Overvaal wat beoog om sy week op ‘n hoë noot af te sluit, terwyl Voortrekker van Bethlehem en Hoërskool Trio van Kroonstad mekaar die stryd sal aansê.

Beknopte telkaarte: 

Fichardtpark 211/8 (Eben Botha 138, Zayne Williamson 38; Carl Thole 3/24, Yaden Agenbag 2/37); Kalahari 53/3 in 4.5 bbe (Louhan Noeth 28; Davyd Oosthuizen 1/6). Geen uitslag – Sege aan Fichardtpark toegeken.

Wesvalia 176/4 (Marco Dreyer 59, Eduard Dreyer 38, E Walker 24*; Jayden Smith 2/29); Oos-Moot 81 (Chrisjan van Staden 28, Eduard Dreyer 4/16, Marco Dreyer 3/8, Z Stopford 2/13). Wesvalia wen met 95 lopies.

Hoërskool Trio 119/9 (Thuto Kekane 29, Miguel Menino 27; Hendro Boardman 3/18, GJ Wessels 3/20); Goudveld-Hoërskool 120/5 (Ruben Crous 57*, Hendro Boardman 23; Gabriel Mochabela 1/17). Goudveld-Hoërskool wen met vyf paaltjies.

Witteberg 171/5 (Marco Grobler 52, Mila Oersen 42, Lesego Mosikidi 31*; EW Botes 3/40); Overvaal 115/8 (Zander Olivier 27*, Botes 25; Lesego Mosikidi 2/8, Stefan Geldenhuis 2/17, WJ Gildenhuis 2/22). Witteberg wen met 56 lopies.

Voortrekker 114/7 (JD van Wyk 55; Liam Singleton 3/23, Katlethi Mohlommi 2/26); Hoërskool Sasolburg 115/8 (Meyer Pretorius 41; André Heunis 3/28, Craig Mann 2/20). Hoërskool Sasolburg wen met twee paaltjies.

Jim Fouché 158/7 (RG Vorster 52, Franco de Necker 31; Reshe Wales 3/25, Daniel Buys 2/33); Sentraal 35 (Pieter Conradie 5/8, Lian Theron 3/8). Jim Fouché wen met 123 lopies.

Despatch 123/8 (Joubert Knoetze 44; Iran Deale 2/17, Gavin Genis 2/31); Hoërskool Middelburg 127/2 (Christian Jansen 47*, Reuben Brandmuller 35*, Sibusiso Maduna 32; Shelton Claassen 1/18). Hoërskool Middelburg wen met agt paaltjies.

Hoërskool Pietersburg 98/9 (AJ Galloway 27*; Toy Engelbrecht 3/19, Marinus Enslin 2/17); HTS Middelburg 99/4 (Anthoni Smuts 54*; Nicholaas Oerlemans 2/19). HTS Middelburg wen met ses paaltjies.

 

 

error: Sorry ol' chap, those shenanigans are not permissible.