Wilgerivier staan kans om titel in Irawa-liga te verdedig
DIE Hoërskool Wilgerivier van Frankfort en Landboudal van Jacobsdal sal mekaar in die eindstryd van die Kovsiestreek-kompetisie se Irawa-liga (vir kleinskole) pak. Volksblad is ‘n medeborg van die kompetisie.
Albei spanne is in hulle halfeindstryde teen onderskeidelik Zastron en Bothaville behoorlik getoets. Wilgerivier het teen Zastron 19-10 as oorwinnaars van die veld gestap, maar was rustyd 10-5 agter. Die twee spanne het mekaar verlede jaar in die eindstryd gepak met Wilgerivier wat 15-11 baas was. Zastron het sonder heelwat van sy staatmakers in die kragmeting in gegaan, maar die jong manne wat dié staatmakers se tokse moes volstaan het gewys dat die span volgende jaar steeds ‘n faktor behoort te wees.
Geen span kon nog daarin slaag sedert die ontstaan van die kompetisie in 2007 om die Irawa-liga meer as een keer te wen nie. Zastron se heelagter, Stephan Nel het met ‘n strafdoel van 55 meter in die wedstryd geslaag. Die span se vleuel Tshepo Kente, senter Henri Roodt en flank Rikus Smit het goeie spel gelewer.
Landboudal was in ‘n senutergende halfeindstryd op GWK-park in Kimberley 26-23 teen Hoërskool Bothaville baas. Die spanne het met die telling op 14-11 in Lanties se guns gaan rus.
Die span van Jacobsdal moes klou aan sy voorsprong in die laaste tien minute van die kragmeting. Die skeidsregter, Marlize Jordaan het die stut Francois Jacobs en haker Christo Bothma kort na mekaar koelkas toe gejaag. Die span moes dus vir amper tien minute lank met slegs 13 spelers klaarkom. Bothaville het in die tydperk op Lanties se doellyn geboer, maar kon net nie daarin slaag om die uitklophou te plant nie.
Vir Lanties het sy haastige vleuel, JD Mans ‘n driekuns aan drieë behaal. Hy het buiten sy drieë ook op die verdediging ‘n reuse rol vir die wenspan vertolk. Die flank Danie du Toit het blink vertoon, terwyl Guillaume Oberholster op losskakel ook ‘n klop op die skouer vir sy spel in die kragmeting verdien.
Vir Bothaville het die skrumskakel Sakkie Wessels en agtsteman Sakkie Bester in ‘n reuse spanpoging met hulle spel beïndruk.
Puntemakers:
Wilgerivier 19 (5) – Drieë: Eric Bibbey, Gerrie Muller, Jacques van Rensburg. Doelskoppe: SF Meyer (2). Zastron 10 (10) – Drie: Marco Swanepoel. Doelskop: Nakkie Naudé. Strafdoel: Stephan Nel.
Landboudal 26 (14) – Drieë: JD Mans (3), Guan Botha. Doelskoppe: Morris Rossouw (3). Bothaville 23 (11) – Drieë: Sakkie Wessels (2), Sakkie Bester. Doelskop: Juandré Kleynhans. Strafdoele: Kleynhans (2).
