SuperSport Schools Plus

Trekkers, Rooiskool en Gim in bo in derbies

By Hannes Nienaber , in Rugby | News , at 2013-07-29

BETHLEHEM. – Voortrekker het sy houvas as die voorste rugbyspan van dié Oos-Vrystaatse dorp sedert 2007 behou deur Witteberg 36-13 in die twee spanne se ENB Classic Clash Saterdag op laasgenoemde se tuisveld te verslaan. Met dié oorwinning het die Trekkers ook die liga onoorwonne bo-aan die Griffon-liga se puntelys afgesluit.
Die span van Bethlehem sal teen nou teen Welkom-Gimnasium in die een halfeindstryd van die liga te staan kom. In die ander halfeindstryd van die liga sal Hentie Cilliers van Virginia kragte teen die Afrikaanse Hoërskool Kroonstad meet.
Witteberg se swaarder pak voorspelers het die Trekkers onder druk geplaas en die wenspan kon teen rustyd slegs ‘n voorsprong van 12-6 opbou. Dié wenspan se Cravenweek-flank en kaptein André Janse van Vuuren en agtsteman Robert de Jongh het voorlangs meer as hulle man gestaan. Die haker Toffie van Zyl verdien ook vermelding na hy in fris wind sy springers met gemak in die lynstane gevind het. Hy het ook in die los gewoel.
Agterlangs was die losskakel Tokkie van Zyl die generaal, terwyl Elof Scheepers beïndruk het met sy verdediging. Die agterlyn was baie gevaarlik met die twee senters, Wian van der Watt en Junior Smit wat te veel vrae aan die tuisspan se verdediging gevra het.
Vir Witteberg het die senters Donavin Lourens en Louis Spershott moedige vertonings gelewer. Voorlangs was die slot FP Pelser uitmuntend, terwyl die skrumskakel Tiaan Ferreira ook tevrede met sy vertoning kan voel.
Welkom-Gimnasium het in sy derby teen Goudveld-Hoërskool 35-15 koning gekraai. Gimmies het rustyd slegs 14-3 voorgeloop. Die wenspan se heelagter, Francois Kuipers was die beste speler op die dag. Die se senter, Louwrens Koekemoer het in sy 50ste ligawedstryd vir sy skool se eerstespan gespeel. Koekemoer en die skrumskakel Kerr Till het ook uitmuntende vertonings gelewer, terwyl die losskakel JL Carey-Smith se taktiese skopwerk van hoogstaande gehalte was. Voorlangs was die haker Brummer Marais sy span se beste speler.
Rooiskool moes harder werk vir sy sege van 43-16 oor Hoërskool Kroonstad as verwag. Die manne van Blouskool het voorwaar met eer uit die stryd getree. Die wenspan se flank Gerrit Otto was sy span se uitstaande speler. Hy het soos gewoontlik met sy kragtige lopies die teenstanders laat bontstaan. Die agtsteman Francois Stemmet en senter JP le Roux het ook vir Rooiskool goeie vertonings gelewer.
Vir Blouskool het sy kaptein en agtsteman Neels van Schalkwyk, slot Erlo Kleinhans en flank Jan-Louis du Plessis teen die oormag weerstand gebied.
Hentie Cilliers het HTS Welkom 52-0 in Virginia getroef. Die span se skrumskakel, Jaywin Juries het twee keer in die sege gaan druk en hy behoort een van sy span se staatmakers in die uitkloprondes te wees.

Hannes Nienaber
error: Sorry ol' chap, those shenanigans are not permissible.