Rassies het strawwe stryd wat voorlê om titel as kampioen van Limpopo te behou
LEPHALALE. – Die tafel is gedek vir nog ‘n spannende eindstryd in die Bosveld wanneer die Hoërskool Ellisras teen Ben Viljoen van Groblersdal in die eindstryd van Groep 2 van die Limpopo-liga hier te staan kom.
Volg al die aksie regstreeks op SuperSport Schools (www.supersportschools.com).
Die Rassies is die verdedigende kampioen van dié Limpopo-liga na hy verlede jaar vir die eerste keer sedert 1997 daarin geslaag het om die kroon te dra.
Daar is egter nie vanjaar veel te kies tussen die voorste drie spanne in dié Limpopo-liga nie.
Ellisras het regstreeks tot die eindstryd deurgedring deur sy ligaverpligtinge teen Frikkie Meyer van Thabazimbi met 25-22 onoorwonne af te sluit.
Ben Viljoen het op sy beurt in die halfeindstryd die bordjies met 26-24 teen Frikkie Meyer verhang. Die span van Thabazimbi was met vroeër in die twee spanne se ligawedstryd met 29-26 baas.
Die Rassies het danksy ‘n drie in die doodsnikke van sy ligawedstryd teen Ben Viljoen in Groblersdal met 20-13 koning gekraai.
Die Rassies moet wel met ‘n kortkop vandag as die vroeë gunsteling op hul tuisveld uitdraf. Vier van die Rassies het vanjaar die Limpopo Blou Bulle op die Cravenweek in Krugersdorp verteenwoordig.
Die viertal is FJ Drotskie (buitesenter), Derik Besseling (flank), Boom Mfisa (vaskopstut) en Boela van Heerden (vaskopstut). Laasgenoemde sal nie in die eindstryd in aksie wees nie. Drotskie is saam met die linkervleuel, Ashley Monyelo, die enigste twee spelers van Ellisras wat verlede jaar ook in dié eindstryd in aksie was.
Ben Viljoen het self ‘n Cravenweek-speler in Mignon Stevens op heelagter in sy geledere. Stevens was een van die Limpopo Blou Bulle se staatmakers op die toernooi in Krugersdorp. Stevens sal met sy dartellopies sonder twyfel vir ‘n paar hoogtepunte in die eindstryd sorg.
Die Rassies word deur Peter Schutte en Dandré Grobler afgerig. Grobler was ook verlede jaar deel van die afrigtingspan wat gesorg het dat ‘n trofee staanplek in Lephalale kry.
Die vier voorste spanne van Limpopo sal vanjaar tot die uitspeelrondes van die SDC Noordvaal Cup deurdring. Frikkie Meyer weet reeds dat hy teen die Pumas se naaswenners, Hoërskool Lydenburg, in sy eerste uitspeelwedstryd te staan sal kom.
Die verloorder van dié eindstryd van teen HTS John Vorster van Pretoria in die uitspeelrondes te staan kom. HTS John Vorster kom vandag in die Blou Bulle se eindstryd teen die verdedigende kampioen van die reeks, Midstream College, te staan.
Bergsig Akademie van Rustenburg dring egter as die Blou Bulle tweede gekeurde tot die streekkompetisie deur.
Die spanne is:
Hoërskool Ellisras: 15 Tenyeko Nkuna, 14 Garreth Mosima, 13 FJ Drotskie, 12 Rabadiba Lebo, 11 Ashley Monyelo, 10 Anzio Swartbooi, 9 Malose Moshupje, 8 Funi Simba, 7 Derik Besseling, 6 Bismark van Blerk, 5 Daniel Leahy, 4 Samuel Leahy, 3 Boom Mfisa, 2 Hanno Kay, 1 Rigby Hobarth.
Ben Viljoen: 15 Mignon Stevens, 14 Dylan Nieuwenhuys, 13 Clementino Bowers, 12 Mihlali Ntlebi, 11 Janik Brits, 10 Anvernio Adonis, 9 Joe Cloete, 8 Asheeq Bradford, 7 Jaco Botha, 6 Tiaan Scheepers, 5 Erich Labuschagne, 4 Henrico Hall, 3 Leuco Robinson, 2 Flippie Nieman, 1 JP Singleton.
Afskop: 11:45
Ander Eindstryde | Limpopo | Groep 2
08:00 – o.14 – Ellisras vs Ben Viljoen
09:15 – o.15 – Ellisras vs Hans Strijdom
10:30 – o.16 – Ellisras vs Ben Viljoen
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
