SuperSport Schools Plus

Onoorwonne Oranje se visier nog sekuur vir derde agtereenvolgende titel

By Hannes Nienaber , in Racket Sports | Featured Racket Sports | News , at 2024-05-09 Tags: , , ,

FOTO: Marnus Prinsloo

Die eerste tennisspan van die Oranje Meisieskool het die 25ste Amanda Coetzer-toernooi in Bloemfontein met twee seges oor onderskeidelik Rhenish Girls’ High en die Hoërskool Waterkloof afgeskop. Die gasheer is die verdedigende kampioen en mik boonop na ‘n derde agtereenvolgende titel.

Volg al die aksie regstreeks op SuperSport Schools (www.supersportschools.com).

Die Schimper-tweeling, Nina en Mia, is vanjaar weer vir die gasheer in aksie. Die duo was ook in 2022 en 2023 in Oranje se span wat die kroon gedra het. Boonop het Oranje in hul geledere ook nog vir Donna le Roux wat verlede jaar as die voorste nommer een speler op die toernooi gekroon is. Le Roux is die dogter van die voormalige Springbok-stut Ollie le Roux.

Oranje het teen Waterkloof skoonskip gemaak en in al agt kragmetings (ses enkelspel en twee dubbelspel) koning gekraai. Le Roux het haar direkte teenstander van Klofies, Ciaran McConnell, met 8-3 verslaan. Oranje se nommer-twee, Cara le Grange, het haar direkte teenstander, Isabelle van Wyk, met 8-2 geklop.

Le Roux het kragte saam met Nina Schimper is die een dubbelspel-kragmeting gespan en vir McConnell en Zene Claassen met 6-2 uitoorlê. In die ander dubbelspel-kragmeting het Oranje se Le Grange en Ansone Theron vir Van Wyk en Tania Venter met 6-0 kaf gedraf.

Oranje moes veel harder werk om vir Rhenish van Stellenbosch met 5-3 te klop. Le Roux het haar tweestryd met Lisa-Marie du Toit met 8-2 gewen, terwyl Le Grange ook met 8-3 oor Jenna Theron baas was.

In die enkelspelwedstryde tussen die twee skole se nommer drie en vier gekeurdes het Rhenish se Katrien Booysen (8-6) en Jenna Pettipher (8-5) met onderskeidelik Nina Schimper en Theron klaargespeel. Oranje Mia Schimper het die kragmeting tussen die vyfde gekeurdes teen Christie Kotzé met 8-3 gewen, terwyl Lisa Louw met ‘n sege van 8-4 oor Nestine van Rooyen seker gemaak het dat die kragmeting tussen die twee skole in die dubbelspel-wedstryde beslis sou word.

Le Roux en Nina Schimper het vir Lisa-Marie du Toit en Pettipher met 6-2 in hul wedstryd verslaan, terwyl Mia Schimper en Ameli Bezuidenhout ook met 6-2 in hul dubbelspel-kragmeting teen Kotzé en Emily du Toit baas was om die oorwinning te beklink.

Oranje kom Vrydag vanaf 07:30 teen Menlopark in hul laaste groepwedstryd van die toernooi te staan.

FOTO: Marnus Prinsloo

Die Parkies het albei sy kragmetings tot dusver teen onderskeidelik Rhenish en Waterkloof verloor. Rhenish het Menlopark met 8-0 verslaan, terwyl die Klofies met 7-1 koning gekraai het.

In die ander groep blyk dit of die Hoër Meisieskool Paarl en Hoër Meisieskool Bloemhof die twee aanspraakmakers op die titel sal wees.

Die twee spanne was in ‘n hewige stryd gewikkel met die meisies van die Paarl wat uiteindelik met 10-8 as oorwinnaars van die baan gestap het.

Die span van die Paarl se twee voorste spelers, Hanmaré McAslin en Kelly Coetzee het hulle onderskeie enkelspelwedstryde teen Milla Kotze (8-6) en Carli Kruger (8-7) gewen.

Bloemhof se Nina van Eeden, Charlotte Bouwer en Anandie de Waal het hul enkelspelwedstryde teen onderskeidelik Minke van Zyl (8-3), Wilmien Oosthuizen (8-2) en Roné du Preez (8-5) gewen.

Hoër Meisieskool Paarl se Karin Fabricius het met haar sege van 8-5 oor Marline Stoop seker gemaak dat sake gelyk is na die ses enkelspelwedstryde.

McAslin en Du Preez het in die dubbelspel teenoor Kotze en De Waal met 6-3 koning gekraai, terwyl Kelly Coetzee en Van Zyl ook ‘n oorwinning van 7-5 oor Bouwer en Stoop behaal het.

Die span van die Paarl het vir die Afrikaanse Hoër Meisieskool van Pretoria met 7-1 geklop. Bloemhof het sy stryd teen Paarl Gimnasium gemaklik met 8-0 gewen.

Bloemhof is sedert die eerste Amanda Coetzer-toernooi die mees suksesvolle skool met 14 titels. Slegs vier skole kon sedert die ontstaan in 1998 die titel opraap. Waterkloof was al vier keer as kampioen gekroon, terwyl die Hoërskool Stellenbosch een keer die gesogte titel verower het.

Die gasheer het self al ses keer die trofee omhoog gehou.

Hannes Nienaber