Monnas vat hande met Franse reus

Les Blancs Taureaux!

Ja julle lees reg, dié Wit Bulle van die Hoërskool Monument in Krugersdorp sal voortaan ook so ietwat van ‘n pienk skynsel hê.

Monnas het ‘n vennootskap met die Franse klubspan Stade Français gesluit. Die klub vanuit Parys bekend as die Pienk Soldate vir hul kenmerkende pienk truie.

Die vennootskap beloof om aan Monnas se rugbyprogram en sy spelers meer geleenthede te skep. Die skool van Krugersdorp is nie die eerste skool van Suid-Afrika wat hande met ‘n Franse-klubspan opgeneem het nie.

Grey-kollege van Bloemfontein het in 2018 ‘n samewerkingsooreenkoms met Montpellier aangegaan. Destyds het heelwat oud-Greys vir Montpellier uigedraf. Dié ooreenkoms het intussen ‘n stille dood gesterf.

Die Wit Bulle se nuut aangestelde hoofafrigter, Jannie du Plessis, was een van die oud-Greys wat vir Montpellier in aksie was. Ander is Jan Serfontein, Frans Steyn, Ruan Pienaar, Henry Immelman en Bismarck du Plessis.

Du Plessis sal die Wit Bulle in 2025 reeds so paar keer op die Ras van Rooyen in Frans kan aanhits en só ook sommer gereed kry indien hulle loopbane in Frankryk oorweeg.

Twee voormalige Springbok-afrigters Nick Mallet (2002-2004) en Heynecke Meyer (2018-2020) het ook al die Franse span afgerig.

Monnas het boonop reeds een Frans toetspeler in die slot Paul Willemse opgelewer. Willemse speel tans ook vir Montpellier. Nog ‘n Wit Bul-slot Stephan le Roux het in reeds in graad 11 in 2018 besluit om sy loopbaan by nog ‘n Franse klub Racing 92 voort te sit.

Die samewerking tussen Monnas en Stade Français sal onder andere die uitruiling van kennis tussen afrigters en spelers insluit. Monnas sal eksklusiewe toegang tot Stade Français se opleidingsomgewing, akademie en proffesionele spanne hê..

Stade Français sal ook klinieke by Monnas aanbied met die eerste junior kliniek wat reeds op 17 Januarie volgende jaar aangebied sal word. Monnas se spelers sal ook die geleentheid kry om Parys te besoek vir opleiding en evaluasies.

Die Wit Bulle se uitstaande spelers sal ook voortaan voorkeur geniet wanneer spelers vir Stade Français se akademies asook ander spanne gewerf word.

Daar is ook ‘n uitruilprogram in plek wat dit moontlik sal maak vir ‘n paar Franse o.16 en o.18-spelers om volgende jaar vir Monnas in aksie te wees.

Die skool van Krugersdorp se o.14-rugbyspan sal ook die geleentheid gegun word om aan Stade Français se jaarlikse Gilardi-toernooi in Parys deel te neem.

Hierdie sal ongetwyfeld ‘n gevoelige slag vir SA Rugby wees, veral indien meer juniors van dié skool besluit om hul loopbane direk na skool oorsee voort te sit. Die Wit Bulle het sedert die ontstaan van die o.20 Wêreldkampioenskap die vierde meeste spelers tot die Junior Springbokspan bygedra.

Daar het al 22 Wit Bulle vir die Junior Springbokke uitgedraf. Grey-kollege (36), die Hoër Jongenskool Paarl (29) en Paarl Gimnasium (28) is die enigste skole wat al meer skole tot die program bygedra het.

Buiten die aanstelling van Du Plessis as afrigter by die eerstespan, het Monnas ook ‘n oud-leerling Reinhard Gerber as direkteur van rugby vanuit Duitsland terug na Krugersdorp gelok. Gerber het in sy spelersloopbaan vir Grens uitgedraf.

Hy het as afrigter ook al spore by Stirling in Oos-Londen, Glenwood in Durban asook Ben Vorster in Tzaneen agtergelaat.

• About
• Latest Posts

Hannes Nienaber

Hannes Nienaber covered schools' rugby in South Africa for Volksblad, Beeld, and Rapport for 11 years. He also created the biggest school rugby website in South Africa - School of Rugby - back in 2007. It eventually morphed into Supersport Schools Plus. He still occasionally milks cows.

Latest posts by Hannes Nienaber (see all)

• Wynberg and Affies bag resounding victories on Day 2 of Peninsula Festival - 2025-01-09
• Seymore leads Paul Roos from the front at Peninsula Festival - 2025-01-08
• Khan and Roth gets SACS off to a good start at Peninsula Festival - 2025-01-08