Klofies en Garsies pak mekaar om die Noordvaaltrofee
Die Noordvaal-kriekettrofee sal vanjaar weer staanplek in Pretoria kry.
Die Hoërskool Waterkloof sal sy titel Saterdag in die Jakarandastad teen die Hoërskool Garsfontein verdedig. Die wedstryd sal op Hoërskool Menlopark se veld beslis word.
Waterkloof het sy plek in die eindstryd met ‘n sege van vyf paaltjies oor Potchefstroom Gimnasium bespreek. Die Klofies se Wian Ruthvan (93) is as Speler van die Wedstryd vir sy skitterende kolfwerk aangewys. Hy het slegs 57 aflewerings in sy kolfbeurt trotseer.
Ruthvan het 15 grenshoue gemoker waarvan vier vir die eerste keer anderkant die grenstou grond gevat het. Hy het saam met Marcus Bakker (55) ‘n vennootskap van 110 lopies om die derde paaltjie gedeel.
Marnu Cronjé (2/24) en Johan Mahne (2/26) het met hul boulwerk die Klofies die meeste probleme besorg.
Garsies se Ysbere het sy plek in die eindstryd van die Noordvaal-reeks met ‘n sege van 75 lopies oor Potchefstroom Volkskool op laasgenoemde se tuisveld behaal.
Die Ysbere se aanvangskolwer Dumisani Motshwene (68) het saam met Heinrich Cloete (43) en Xander Venter (41) die grondslag vir die sege met die kolf gelê.
Die Volkies se Ludwig Schuld (72) en Corné Prinsloo (54) het albei met vyftigtalle hul span se aanslag gelei.
Die draaibalbouler Bevan Coetzer het die meeste skade met die bal aangerig deur drie kolwers vir slegs 38 lopies terug te stuur kleedkamer toe.
Die o.15-eindstryd van die reeks sal op Waterkloof se veld beslis word. In dié eindstryd sal die Hoërskool Garsfontein en Hoërskool Menlopark mekaar die stryd aansê.
Beknopte telkaarte:
Potchefstroom Gimnasium 197/7 (Wian Herbst 72*, Righardt Joubert 43, Ekstras 22; Tristan Luus 2/37); Waterkloof 201/5 (Wian Ruthvan 93, Marcus Bakker 55, Christiaan du Toit 39; Marnu Cronjé 2/24, Johan Mahne 2/26). Waterkloof wen met vyf paaltjies.
Garsfontein 279 (Dumisani Motshwene 68, Heinrich Cloete 43, Xander Venter 41, Wiehan van der Walt 33, Luan Ferreira 30*; Corné Prinsloo 3/25, Kobus Pienaar 3/42); Potchefstroom Volkskool 204 (Ludwig Schuld 72, Corné Prinsloo 54, Janco Moolman 24; Bevan Coetzer 3/38, Wehan de Waal 2/21). Garsfontein wen met 75 lopies.
