Jong Streeptruie kan vir Cravenweek-rekord sorg
KRUGERSDORP. – Die Westelike Provinsie se groep o.18-spelers staan vandeesweek op die rand om hul name in die Cravenweek se annale te verewig.
Indien die Streeptruie vanjaar weer as die nie-amptelike kampioen gekroon word, sal die unie na Saterdag se hoofwedstryd op die Ras van Rooyen-veld van die Hoërskool Monument op 15 agtereenvolgende seges op die toernooi wees.
Die vorige rekord behoort ook aan die WP toe sy spanne tussen 1970 en 1974 vir 14 agtereenvolgende wedstryde nie die knie gebuig het nie.
Bekende sportmanne soos Rob Louw, Peter Kirsten, Hennie Bekker, George Rautenbach en John Bonthuys tel onder die lede van die Streeptruie se spanne wat in die vroeë 70’s oorheers het.
Vanjaar se span word gelei deur die veelsydige slot Riley Norton. Hy het verlede jaar homself by ‘n unieke groep van 15 sportmanne aangesluit wat in rugby en krieket die SA Skole-span kon haal.
Norton, die seun van die voormalige WP-speler Chris Norton, was die eerste wat dit reeds in graad 11 kon vermag.
Die Streeptruie se laaste nederlaag was in 2017 in Johannesburg op die laaste dag van die toernooi teen die Vrystaat (33-54). Die span het daarna die laaste vier toernooie oorheers.
WP kom Maandag in die hoofwedstryd van die eerste dag teen die Sharks te staan.
Die gasheer, die Goue Leeus, is waarskynlik die span wat vanjaar oor die nodige grofgeskut beskik wat die Streeptruie se aanslag op dié rekord kan stuit.
Hulle het egter ‘n baie moeilike eerste kragmeting op dag twee van die toernooi teen sy buurman noord van die Jukskei-rivier, die Blou Bulle.
Die Leeus se sleutelspeler is sy losskakel, Vusi Moyo, wat met sy skopskoen en voorgevoel vir die spel ‘n sterk aanspraakmaker op ‘n plek in die SA Skole-span sal wees.
In die agttal van die Leeus is boonop die langste speler op die toernooi in die slot Jacques Botha wat ‘n volle 2.06m in sy sokkies staan. Botha laat boonop die skaal op 128kg kreun.
Die Vrystaat het self ‘n tameletjie in sy eerste kragmeting van die toernooi. Hy kom teen die Griffons te staan. Die Blikore het in sy vorige wedstryd op die Cravenweek teen die Perses met 27-41 die knie gebuig.
Boonop kon die Vrystaat nog net een keer sedert die ontstaan van die toernooi in 1964 in vier kragmeting daarin slaag om die Noord-Vrystaters om te dop.
Dit was in 1988 toe die Vrystaat met toekomstige Springbokkke soos Ruben Kruger, Pieter Müller, Charl Marais, Naka Drotské en Heinrich Füls met 35-0 die pyp gerook het.
Die bepalings:
Dag 1 – 09:30: Suidwestelike Distrikte t. Valke; 11:00: Boland t. Luiperds; 12:30: Oostelike Provinsie t. Grens; 14:30: Westelike Provinsie t. Sharks.
Dag 2 – 10:00: Griekwaland-Wes t. Westelike Provinsie XV-tal; 11:30: Pumas t. Limpopo Blou Bulle; 13:00:Vrystaat t. Griffons; 14:30: Blou Bulle t. Goue Leeus.
- Seymore leads Paul Roos from the front at Peninsula Festival - 2025-01-08
- Khan and Roth gets SACS off to a good start at Peninsula Festival - 2025-01-08
- Hansen to lead SA u19 against England - 2025-01-07
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
