Diamantveld baas op sportdag
GERCO NORTJÉ se skopskoen het die meeste van die praatwerk in Hoërskool Diamantveld se rugbyspan se sege van 27-6 oor Landboudal van Jacobsdal in die hoofwedstryd van sy jaarlikse sportdag in Kimberley.
Nortjé het vyf strafdoele tussen die pale deurgejaag en ook een van sy span se twee drieë verdoel vir ‘n persoonlike bydrae van 17 punte.
Noord-Kaap se rugbyspan het ‘n klinkende sege van 43-6 oor Hoërskool Upington behaal. Northerns se losskakel Robbie Petzer het 18 van sy span se punte aangeteken. Hy was verlede jaar nog vir die Afrikaanse Hoërskool Kroonstad in aksie en sou ‘n sterk aanspraakmaker op ‘n plek in die Griffons se Cravenweek-span gewees het. Petzer het sy 18 punte met ‘n drie, vyf doelskoppe en ‘n strafdoel aangeteken. Hy het in Northerns se eerste twee wedstryde op binnesenter uitgedraf.
Die span se afrigter, Shaun Huygen het sy agsteman en kaptein Gerhard Holtzhausen op binnesenter vir die wedstryd ingespan. Holtzhausen is deel van die nasionale o.18-sewesgroep. Holtzhausen het een van Noord-Kaap se drieë gedruk. Die span se linkervleuel, Austen Jooste het twee keer agter Uppies se doellyn gaan kuier.
Duineveld van Upington het hom teen Helpmekaar van Johannesburg 10-50 vasgeloop. Hopetown het ‘n goeie sege van 41-12 oor NJ Heyns behaal. Adamantia was bo 10-5 in sy kragmeting teen Koffiefontein.
Diamantveld se netbalspan het in sy eerste wedstryd op die sportdag teen Eunice van Bloemfontein 24-27 vasgeval. Die span het daarna egter goeie seges oor Jim Fouché (25-17) en Hoër Meisieskool Oranje (7-5) behaal. Die span sal egter nie tevrede met sy vertoning teen die Afrikaanse Hoër Meisieskool Pretoria wees nie. Die span van die Jakarandastad was wel die voorste span in die land verlede jaar, maar die nederlaag van 11-49 sal nie die span van Kimberley tevrede laat nie.
Noord-Kaap wat verlede jaar as kampioene van die Noord-Kaap gekroon is, het 11-24 teen Affies die knie gebuig. Die span het ook seges oor Hoërskool Upington (25-13) en Oranje (29-19) behaal.
Puntemakers:
Diamantveld 27 – Drieë: JD Fourie, Etdeon Greyvenstein. Doelskop: Gerco Nortjé. Strafdoele: Nortjé (5). Landboudal 6.
Noord-Kaap 43 – Drieë: Austen Jooste (2), Gerhard Holtzhausen, Leon Becker, Wilfred Bowers, Robbie Petzer. Doelskoppe: Petzer (5). Strafdoel: Petzer. Hoërskool Upington 6.
- School Rugby Results – 17 May 2025 - 2025-05-17
- SDC Noordvaal Cup Results – 17 Mei 2025 - 2025-05-17
- Affies soek eerste sege in tien jaar teen gewonde Grey Kollege - 2025-05-16
