La Rochelle, Klofies staan uit op eerste dag van Kloof Netbalfees
Die eerste dag van Kloof-Netbalfees 2025 het afgeskop met kragmetings tussen van die land se voorste skole, en die aksie het geensins teleurgestel nie.
Met ‘n propvol skedule is daar reeds ‘n aanduiding van wie die gunstelinge is, watter spanne die verrassingselement bring en watter spanne nog die regte kombinasies soek.
Waterkloof se eerste span het ’n onoorwonne openingsdag geniet met drie stewige vertonings teen Jeugland (16–11), Potch Volkies (18–11) en Eunice, laasgenoemde wat hulle swaarverdiend met 21–17 deurgetrek het.
Teen Jeugland het hulle die wedstryd in die tweede helfte oorheers, en teen Potch Volkies het hul verdediging, spesifiek hul VV met haar tweede verdediging, die verskil gemaak.
Die wedstryd teen Eunice het gewys dat Waterkloof nie bloot op talent staatmaak nie, maar ook kalmte onder druk kan aan die dag lê.
Waterkloof II, daarenteen, het swaar getrek teen van die sterker spanne. Hulle het verloor teen Framesby (9–36) en Ellisras (9–13), maar die ervaring op hierdie vlak sal van onskatbare waarde wees vir hul jonger spelers.
Framesby was beslis een van die uitblinkers van die dag, met dominante vertonings teen Wagpos (36–5), Waterkloof II (36–9), en Wesvalia (19–14). Die span se tempo en presiese afronding het teenstanders oorrompel, en hulle wys vroeg in die toernooi dat hulle hier is om te wen.
La Rochelle het op die eerste dag nie alleen ook ál hul wedstryde gewen nie, maar hulle het dit met oortuiging gedoen. Oorwinnings teen Witteberg (37–14) en Wesvalia (33–12), asook ’n wegholsege oor Wagpos (40–3) getuig van ’n span wat ten volle in beheer is.
Die hulpdoel, Marone Uys, het met haar akkuraatheid en beweging uitgeblink, terwyl die span se verdediging meedoënloos was. Daarbenewens het hul doel, Iselle, haar 100ste wedstryd gespeel – ’n spesiale mylpaal wat die oorwinning des te meer betekenisvol gemaak het.
Ashton het puik uitslae behaal teen Reitz (32–11) en Vrede (34–8), maar die knie gebuig teen ’n kragtige Redhill-span (8–29). Ashton toon nietemin belofte dat hulle nog ver kan vorder in die toernooi. Kempton Park het goeie strukture tentoongestel en drie oorwinnings behaal teen Wesvalia (22–15), Witteberg (27–19) en Brandwag (19–22 – ’n taai stryd teen ’n goed georganiseerde span).
Hoërskool Alberton het ook sterk vertoon met ’n gelykopuitslag teen Piet Retief (19–19) en oorwinnings oor Ellisras (27–12) en Vrede (25–14).
Centurion het twee belangrike oorwinnings behaal teen Empangeni (22–8) en St Anne’s (14–11), ondanks ‘n naelskraapse nederlaag teen Amanzimtoti (14–15). Brandwag het indrukwekkend vertoon om te wen teen Windhoek Pvt (17–10), Eunice (22–19) en Kempton Park (22–19), wat hulle beslis as ’n gevaarlike span onderskei.
Hoërskool Klerksdorp was ook uiters mededingend teen Windhoek Privaatskool (25–13) en Jeugland (18–9). Redhill het hul gehalte uitgestal met drie oortuigende seges, teen Amanzimtoti (23–16), Empangeni (31–6) en Ashton (29–8).
Sentraal het hul dag afgesluit met twee indrukwekkende seges oor Voortrekker (18–13) en Windhoek Pvt (23–7), met hul verdediging wat telkens die verskil gemaak het. Amanzimtoti se indrukwekkende telling van 38–5 oor Reitz was een van die grootste punteverskille van die dag, terwyl hulle ook vir Centurion met 15–14 getroef het.
Na die eerste dag is daar ’n aantal spanne wat steeds onoorwonne is, naamlik La Rochelle, Framesby, Waterkloof (eerste span), Brandwag en Redhill. Hierdie spanne beskik nie bloot oor talent nie, maar ook struktuur, fiksheid en ’n wil om te wen – sleutelkenmerke van sukses in ’n kompetisie van hierdie formaat.
Al die uitslae | Dag 1:
| nt_header_1 | nt_header_2 | nt_header_3 | Score |
|---|---|---|---|
| Hoërskool Windhoek | 22 | Eunice | 11 |
| Redhill | 23 | Amanzimtoti | 16 |
| Waterkloof | 16 | Jeugland | 11 |
| Framesby | 36 | Wagpos | 5 |
| Alberton | 19 | Piet Retief | 19 |
| Ashton | 32 | Reitz | 11 |
| Oosterlig | 13 | St Anne's | 13 |
| Centurion | 22 | Empangeni | 8 |
| Kemptonpark | 22 | Wesvalia | 15 |
| Ellisras | 32 | Gerrit Maritz | 19 |
| Brandwag | 17 | Windhoek Privaatskool | 10 |
| La Rochelle | 37 | Witteberg | 14 |
| Bergvlam | 18 | Vrede | 18 |
| Klerksdorp | 34 | Jeugland | 3 |
| Amanzimtoti | 15 | Centurion | 14 |
| Waterkloof | 18 | Potchefstroom Volkskool | 11 |
| Sentraal | 18 | Voortrekker | 13 |
| Ashton | 34 | Vrede | 8 |
| Bergvlam | 21 | Reitz | 12 |
| Alberton | 27 | Ellisras | 12 |
| Die Brandwag (Kariega) | 22 | Eunice | 19 |
| Framesby | 36 | Waterkloof II | 9 |
| Oosterlig | 17 | Wagpos | 14 |
| Piet Retief | 33 | Gerrit Maritz | 9 |
| Redhill | 31 | Empangeni | 6 |
| St Anne's | 15 | Jeugland | 14 |
| Ferrum | 24 | Piet Potgieter | 6 |
| La Rochelle | 33 | Wesvalia | 12 |
| Klerksdorp | 25 | Windhoek Privaatskool | 13 |
| Kemptonpark | 27 | Witteberg | 19 |
| Centurion | 14 | St Anne's | 11 |
| Alberton | 25 | Vrede | 14 |
| Waterkloof | 21 | Eunice | 17 |
| Piet Retief | 21 | Bergvlam | 9 |
| Framesby | 19 | Wesvalia | 14 |
| Ellisras | 13 | Waterkloof II | 9 |
| Amanzimtoti | 38 | Reitz | 5 |
| Piet Potgieter | 15 | Gerrit Maritz | 12 |
| Brandwag | 22 | Kemptonpark | 19 |
| Sentraal | 23 | Windhoek Privaatskool | 7 |
| Hoërskool Windhoek | 25 | Ferrum | 7 |
| Redhill | 29 | Ashton | 8 |
| Witteberg | 23 | Oosterlig | 12 |
| Klerksdorp | 18 | Jeugland | 9 |
| Voortrekker | 21 | Potchefstroom Volkskool | 17 |
| La Rochelle | 40 | Wagpos | 3 |
- Parkies se seisoen van glorie - 2025-10-06
- Nasionale erkenning vir Bayisa en Moloise weerspieël Middies se sukses - 2025-09-30
- Top-4 Rusties leef hul droom - 2025-09-29
