Sentraal steeds onoorwonne ná Dag 3 van Kloof-Netbalfees

Die derde dag van Kloof-Netbalfees 2025 het verskeie verrassings opgelewer, sowel as spelers wat hulself as ware kampioene onderskei het.

Van gevestigde netbalkragte tot opkomende sterre, Dag 3 het gewys hoekom die Kloof-Netbalfees ’n hoogtepunt is op die skolesportkalender.

Waterkloof se eerste span was goed op dreef met drie indrukwekkende seges. Hulle het Brandwag met 23–12 en Klerksdorp met 20–15 geklop, en Framesby se segetog beëindig met ‘n naelbytsege van 22–20. Klofies het hul teenstanders onder konstante druk geplaas met rotsvaste verdediging en kliniese afronding in die doelsirkel.

Voortrekker het ewe puik spelpeil gehandhaaf om vir Oosterlig (27–8) en Jeugland (19–12) te verslaan, terwyl hulle vir Wagpos met 30–8 oorrompel het. Vories het ontluik as ’n span wat met hope selfvertroue speel en hul wedstryde doelgerig benader.

Sentraal was weer een van die groot uitblinkers op die dag en het hul onoorwonne status behou met met seges oor Framesby (22–10), Potch Volkies (20–12) en Ellisras (25–10).

Die ster van die span was ongetwyfeld senter, Marli van der Merwe, wat die bal doeltreffend deur die baan beweeg op die aanval, terwyl sy op verdediging ‘n aantal kritieke onderskeppings gemaak het. Haar spel-intellek en energieke teenwoordigheid het beslis Sentraal se doele aangespoor om kalm te bly onder druk en met akkuraatheid te skiet.

Redhill het hul spelpeil na ‘n nuwe vlak geneem met oortuigende seges oor Piet Potgieter (41–7), Gerrit Maritz (38–13) en St Anne’s (25–9). Hul vinnige, direkte spel en ongenaakbare verdediging het teenstanders se kanse geweldig beperk.

Amanzimtoti het ook spiere gebult met drie oorwinnings, oor Empangeni (33–18), Piet Retief (28–22) en Gerrit Maritz (32–7). Die span van Toti het met selfvertroue gespeel en elke fout van hul opponente genadeloos uitgebuit.

Windhoek Privaatskool het ook ‘n goeie dag beleef. Die Namibiërs het 20–14 teen Wesvalia en 17–13 teen Framesby gewen, en in ’n spannende stryd met 18–18 gelykop gespeel teen Hoërskool Alberton. Ashton het hul veerkragtigheid onderstreep om ook drie wedstryde te wen, teen Bergvlam (33–10),  Oosterlig (19–11) en naelskraaps met 16–15 teen Waterkloof II.

Klerksdorp het met 19–9 teen Potch Volkies afgeskop, vir Brandwag met 17–15 getroef en hul dag afgesluit met ’n ewe naelskraapse sege van 13–11 oor Windhoek Hoërskool. Witteberg het goed vertoon met oorwinnings van 21–11 teen Ellisras, 18–14 teen Wesvalia en 15–12 teen Potch Volkies.

Ferrum het hul wedstryde teen Piet Potgieter (17–10), Vrede (17–10) en Bergvlam (13–11) gewen – spogvertonings van ’n span wat onder die radar begin het maar met elke wedstryd momentum gebou het.

Kempton Park het ook hul invloed op Dag 3 laat geld deur vir Eunice met 25–19 te wen en Wagpos met 32–8 af te ransel, voordat hulle ná ‘n taai kragmeting met Windhoek Hoërskool met 21–17 as oorwinnaars uit die stryd getree het. Kempies het met hul vaart en samespel beïndruk, terwyl hulle op die verdediging verskeie deurslaggewende balle teruggewen het.

Dag 3 | Uitslae

• About
• Latest Posts

Shane Labuschagne

With a Bachelor of Arts in Language and Literature, Shane Labuschagne brings a deep passion for storytelling to the SuperSport Schools team. As a journalist and elite netball player, he has represented South Africa on the world stage in both Fast 5 and Protea Men’s Netball. Combining his love for sport and language, Shane delivers insightful coverage that captures the heart of school sports.

Latest posts by Shane Labuschagne (see all)

• Shiloh Berardelli: Fierce and fearless - 2025-11-12
• Nadine van Hoogdalem droom hoog  - 2025-11-10
• Georgia Leppan: A rising star with big dreams  - 2025-11-06