Preview – Griffons-eindstryd – Voortrekker vs. Hentie Cilliers
DIE Hoërskool Voortrekker van Bethlehem se rugbyspan het ‘n vlekkelose rekord in die eindstryd van die Griffon-liga. Die Trekkers draf more in slegs sy derde eindstryd in die geskiedenis van die liga teen Hentie Cilliers op die Noordwes-stadion uit.
Die Trekkers was in 2008 (klop AHS Kroonstad 32-25) en in 2011 (klop Hentie Cilliers 15-14) aan die wenkant in sy twee vorige eindstryde. Henties is die verdedigende kampioen en gaan gewis nie maklik van die titel afstand doen nie. Dit is die span van Virginia se derde agtereenvolgende eindstryd.
Die span van die Oos-Vrystaat se laaste nederlaag teen sy teenstander in vandag se eindstryd was in 2010 toe Henties 20-19 baas was. Die Trekkers moes die wedstryd we nom tot die uitkloprondes daardie jaar deur te dring.
Hoewel Voortrekker as die gunstelinge gereken word moet die volgende stukkie statistiek in ag geneem word om te beklemtoon hoe taai stryde tussen die twee spanne is. Sedert 2010 het die twee spanne mekaar vyf keer op die rugbyveld ontmoet en was die Trekkers in vier van die vyf kragmetings aan die wenkant. Die gemiddelde telling is egter net 23-20 in die span van Bethlehem se guns.
Henties se senter, Ethan Williams is sover die voorste puntemaker in vanjaar se Griffon-liga. Hy het tot dusver 91 punte in sy span se agt wedstryde aangeteken. Dit sluit vyf drieë in. Hy was in 2011 ‘n lid van die Perses se Cravenweek-span en behoort vandag ‘n sleutelspeler vir sy span te wees. Die skrumskakel Jaywin Juries, agtsteman Gregan Hull en haker Cheslyn van Raynor sal ook sleutelspelers wees.
Die Trekkers se kaptein en flank, André “Smurf” Janse van Vuuren is sy span se sleutel tot sukses. Die kantman is die voorste driedrukker in vanjaar se liga. Hy het ‘n ongelooflike 12 keer in sy span se agt wedstryde gedruk. Die span se senter, Junior Smit het self al sewe keer in ligawedstryde agter die doellyn gaan kuier. Die span se losskakel, Tokkie van Zyl het reeds 87 punte in ligawedstryde opgestapel.
Laaste vyf kragmetings tussen Voortrekker en Hentie Cilliers:
2013 Voortrekker 28, Hentie Cilliers 21
2012 Voortrekker 27, Hentie Cilliers 24
2011 Voortrekker 15, Hentie Cilliers 14
2011 Voortrekker 27, Hentie Cilliers 22
2010 Hentie Cilliers 20, Voortrekker 19
Laaste vyf eindstryde van die Griffon-liga:
2012 Hentie Cilliers 35, Welkom Gimnasium 5
2011 Voortrekker 15, Hentie Cilliers 14
2010 Hentie Cilliers 21, AHS Kroonstad 16
2009 AHS Kroonstad 23, Goudveld 9
2008 Voortrekker 32, AHS Kroonstad 25
Die spanne is:
Hentie Cilliers: 15 Jameel Afrika, 14 Jamie Joseph, 13 Ethan Williams, 12 Rian Pretorius, 11 Jonathan April, 10 Sylvester Lewis, 9 Jaywin Juries, 8 Gregan Hull, 7 Anwar Ohlsen, 6 Damian May, 5 Brandon Kuzatjike (kaptein), 4 Jade Solomons, 3 Justin Williams, 2 Cheslyn van Rayner, 1 Kyle Ess.
Voortrekker (Bethlehem): 15 Sechaba Matsoele, 14 Tiisetso Madonsela, 13 Junior Smit, 12 Wian van der Watt, 11 Lethole Mokoena, 10 Tokkie van Zyl, 9 Eloff Scheepers, 8 Robert de Jongh, 7 Seeff Theron, 6 André Janse van Vuuren (kaptein), 5 Frederik Marais, 4 Henko Naudé, 3 Thinus van Eeden, 2 Toffie van Zyl, 1 Ernie Sumner.
Skeidsregter: Marius Bonthuys (Noord-Vrystaat)
Afskop: 11:20
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
