Minette Boshoff se nederige storie van durf en deursettingsvermoë
Van die oomblik toe Minette Boshoff as klein dogtertjie vir mini-netbal ingeskryf is, was daar ’n vonkie.
Wat sy toe nog nie geweet het nie, is dat daardie eenvoudige begin ’n netbalreis geloods het wat haar karakter, werksetiek en drome sou vorm.
Haar ware liefde vir die sport het in graad 3 vlam gevat, onder leiding van haar gunstelingonderwyseres, Juffrou Surien, wie se passie en kreatiwiteit netbal vir Minette ongelooflik lekker en interessant gemaak het. Dit is daardie tipe afrigters wat nie net spelers brei nie, maar lewens verander, en vir Minette was dit ’n bepalende oomblik.
As senter vind Minette haar grootste vreugde in die vryheid wat die posisie bied. Sy hou daarvan dat sy reg oor die baan kan beweeg, die spel kan beheer en steeds genoeg geleenthede kry om ’n verdedigende impak te maak. Vir haar is dit ’n posisie waar elke beweging saak maak en waar haar instink, spoed en intensiteit saamwerk om die spel te laat vloei.
Een van die wedstryde wat vir altyd sal uitstaan, is ’n TNC-wedstryd wat sy vir Coach Amanda gespeel het tydens haar jaar in die Tshwane-span. Vir Minette was dit netbal op sy lekkerste, saam met spelers wat jou druk om ten alle tye jou beste te lewer, waar balle gedraai word, waar selfvertroue groei, en waar die hele span in perfekte ritme vloei.
“Dit was presies hoe dit vir my gevoel het by TNC,” sê sy.
Minette se ontwikkeling as speler is onvermydelik verweef met die plek wat sy haar tweede huis noem: Hoërskool Menlopark.
“Menlopark het my definitief die speler gemaak wat ek vandag is,” vertel sy.
Onder die mentorskap van Coach Manny, ’n afrigter wat bekend is vir sy briljante insig en vermoë om die beste in elke speler te ontgin, het Minette geleer om hard te speel, en nóg harder te oefen. Menlopark-netbal leer jou nie bloot tegniek nie, maar ook waardes: om met integriteit te speel, om goeie sportmanskap te toon, om jou spanmaats te dra, en om altyd trots te wees op jou werk.
Minette se drome reik egter veel verder as skolenetbal. Haar grootste aspirasie is om eendag onder die leiding van Coach Jenny van Dyk vir die Proteas te speel.
“Ek wil eendag groen en goud dra,” sê sy vasberade, en as daar een ding is wat Minette bewys het, is dit dat sy bereid is om die harde werk in te sit om daar uit te kom.
Sy weet ook presies hoe dit voel wanneer mense in jou twyfel.
“Iemand het vir my gesê ek sal nooit vir Menlopark se eerste span speel nie,” onthou sy. “Dit het my moed gebreek.”
Eerder as om tou op te gooi, het sy egter opgestaan, harder geoefen en harder gewerk, en in 2025 het sy vir die derde jaar as eerstespan-speler die baan betree. Haar raad aan jong spelers is eenvoudig, maar kragtig:
“Wend negatiewe kommentaar aan as motivering. Bly nederig. En onthou altyd, hoe hoër jou kop is, hoe harder is die slag wanneer jy val.”
Wanneer sy dink aan rolmodelle, kyk Minette dadelik op na Shadine van der Merwe, ’n speler wat deur haar werksetiek, vasbyt en ongelooflike spel Minette inspireer.
Nêrens skyn Minette se bewondering egter so helder soos wanneer sy oor haar ma praat nie.
“Sy is regtig ’n vrou na wie ek opkyk,” sê Minette sag. “Ek hoop om eendag net soos sy te wees en na die wêreld te kyk soos sy daarna kyk.”
Met ’n kombinasie van nederigheid, talent, harde werk en ’n ongelooflike sterk fondament, beweeg Minette Boshoff net een rigting in haar netbalreis: vorentoe. En elke tree wat sy gee, dra die belofte van ’n speler wat nog groot mylpale gaan bereik.
- Minette Boshoff se nederige storie van durf en deursettingsvermoë - 2025-11-29
- Nicola van Heerden: Paarl Gim se rots op verdediging - 2025-11-21
- Shiloh Berardelli: Fierce and fearless - 2025-11-12
