Klerksdorp breed in Transvalia se pad
Die eerste rugbyspan van die Hoërskool Transvalia kom vandag voor ’n laaste struikelblok te staan voordat hy sy naam in die geskiedenisboeke van dié skool kan verewig.
As Transvalia vandag in Klerksdorp teen die Hoërskool Klerksdorp daarin kan slaag om sy titel as die Beeldtrofee-kampioen vir Groot-skole te verdedig, sal dit die kroon span op ’n merkwaardige seisoen.
Die kampioen moes vanjaar in die uitspeelrondes al sy wedstryde weg van die huis af speel. Ná ’n gelykopuitslag van 29-elk teen Hugenote van Springs in die Valke se eindstryd, is Hugenote as die Valke se kampioen gekroon omdat hulle die eerste drie gedruk het.
Transvalia het die Hoërskool Volksrust (28-22), Hoërskool Pietersburg (29-18) en die Hoërskool Tuine (30-22) weg van die huis geklop om sy plek in die eindstryd te bespreek.
Die span het byna 800 km afgelê vir dié drie kragmetings.
Transvalia het verlede jaar vir Hoërskool Ermelo in die eindstryd van die Beeldtrofee met 16-12 verslaan.
Albei spanne sal vandag sonder ’n Suid-Afrikaanse Skole-speler moet klaarkom.
Die Vanderbiljparkers se skrumskakel, Marko Janse van Vuren, het vanjaar weer die Skolespan gehaal nadat hy reeds verlede jaar sy nasionale kleure verwerf het.
Klerksdorp se agtsteman, Edmund Rheeder, was in die SA Skole-span se beginspan vir albei sy wedstryde teen Frankryk en Wallis.
Transvalia se senterpaar, Hendrick Combrinck en Danie Marais, was lede van die span wat verlede jaar in die Beeldtrofee-eindstryd baas was.
Transvalia was vanjaar nog net drie keer aan die verloorkant.
Al drie nederlae was teen Makro-skole, naamlik Outeniqua (12-31), Hoërskool Nelspruit (17-22) en Kemptonpark (17-55).
Nelspruit speel juis vandag in die eindstryd van die afdeling vir Makro-skole teen Garsfontein.
Klerksdorp het die Beedtrofee vir Groot-skole in 2009 gelig toe hy die Hoërskool Ermelo met 26-25 in die eindstryd uitoorlê het.
. Pennypinchers en Timbercity is medeborge van die reeks.
