Kiewiet steeds vuurwarm vir Welkom Gim, Framesby bobaas teen Diamonds
Welkom Gimnasium het nog ‘n indrukwekkende sege behaal deur om teen Noord-Kaap met 59-27 in ‘n drie-bonanza te wen.
Hul ster-loskakel Ronaldo Kiewiet was weer op sy beste en kon vyf drieë, drie doelskoppe, en ‘n skepskop aanteken vir 34 van sy span se punte.
Kiewiet was vroeër die maand ook die voorste puntemaker op die Cravenweek waar hy 48 punte in die Griffons se drie wedstryde aangeteken het.
Die Goeda-tweeling, Navan (heelagter) en Naylen (vleuel), het hul terugkeur na die span na die skoolvakansie gevier met twee drieë elk, en Gimmies se vierde groot gevaarpunt, Kamohelo Mokoena (vleuel) was ook in op die aksie met ‘n drie.
Dit is dan die agste wedstryd van hul laaste nege waarin Welkom Gimnasium meer as 40 punte teen hul teenstanders aanteken.
Die Gimmies fokus nou op die Griffons-liga halfeindstryd wat volgende voorlê.
Framesby bou voort aan hul momentum van na die vakansie met nog ‘n sterk vertoning in hul 41-7 sege oor Diamantveld in Kimberley in die eerste weergawe van ‘n splinternuwe interskole tussen die twee trotse spanne.
Kyk die wedstryd op SuperSport Schools – Registreer nou
Nadat Framesby verlede week hul bure, Grey High, met 17-15 kon wen het hulle voortgebou op daardie momentum om hierdie naweek ook hul herontmoeting teen Diamantveld in Kimberley gemaklik met 41-7 as oorwinnaars afgehandel.
Toe die twee spanne laas in 2011 ontmoet het was dit Diamantveld wat met 47-10 koning gekraai het, maar die Framesby manne het gewys dat daar baie verander het in die laaste 12 jaar.
Die besoekers se losskakel, Logan Muller, kon al vyf hul drieë verdoel en twee strafdoelle oorsit.
Hulle het ook die oorhand gehad tussen die groot manne in die voorry, wat gewoonlik ‘n sterkpunt vir die Diamonds is. Hein Terblanche (haker) en Sean Vermaak (stut) kon twee van die besoekers se drieë aanteken.
Framesby het nou ‘n afnaweek voordat hulle vir Marlow in Gqeberha onthaal. Marlow het vroeër die jaar in Cradock vir Framesby met 21-19 getroef, en daardie herontmoeting beloof om ‘n opwindende wedstryd te wees met albei spanne wat op goeie vorm is en die tuisspan wat hul trots sal wil terug wen na hul nederlaag voor die vakansie.
Landboudal kon hul 17-13 nederlaag teen Upington van verlede naweek agter die rug sit om Saterdag vir HTS Louis Botha met 18-0 te wen.
Sy haker, Bielie Davel, en vleuel, Barry Pretorius, kon agter die doellyn gaan draai en die tuisspan se verdediging het verhoed dat HTS Louis Botha enige punte aanteken.
Puntemakers:
Framesby 41 (20) – Drieë: Regardt Viljoen, Gideon Barnard, Sean Vermaak, Hein Terblanche, Con-Zay Hendricks. Doelskoppe: Logan Muller (5). Strafdoelle: Muller (2). Diamantveld 7 (0) – Drie: Lehan van der Westhuizen. Doelskop: Charl Swanepoel.
Welkom Gimnasium 59 (27) – Drieë: Ronaldo Kiewiet (5), Navan Goeda (2), Naylen Goeda (2), Kamohelo Mokoena. Doelskoppe: Kiewiet (3). Skepskop: Kiewiet. Noord-Kaap 27 (5) – Drieë: Thaylin Rose, Melvin Diedericks. Doelskop: Abdul Fischer.
Landboudal 18 – Drieë: Barry Pretorius, Bielie Davel. Doelskop: Juhan van der Westhuizen. Strafdoelle: Marius Etzebeth (2). HTS Louis Botha 0.
Ander tellings:
Saterdag:
o.19 A – Zastron 40, Sand du Plessis 7; President Steyn 26, Hoërskool Bloemfontein 14; Brandfort 14, St Andrews 12.
o.19 B – Diamantveld II 21, Framesby II 13; Diamantveld III 10, Framesby III 10; Framesby IV 19, Kimberley Boys’ High 19.
o.16 – Diamantveld 17, Framesby 14; Welkom Gimnasium 59, Noord-Kaap 12; Diamantveld II 15, Framesby II 0; Landboudal 29, HTS Louis Botha 0.
o.15 – Diamantveld 26, Framesby 10; Welkom Gimnasium 17, Noord-Kaap 5; Framesby II 19, Diamantveld II 7; Kimberley Boys’ High 14, Framesby III 10; Landboudal 40, HTS Louis Botha 8.
o.14 – Framesby 36, Diamantveld 14; Welkom Gimnasium 17, Noord-Kaap 12; Framesby II 61, Diamantveld 0; Landboudal 19, HTS Louis Botha 10.
Dinsdag:
o.19 – Sand du Plessis 17, Hoërskool Bloemfontein 14; Brandfort 53, Brebner 0.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
