Hoopstad kan nie vrede vanaf Vrede verwag in Colt-liga eindstryd nie
Die verdedigende kampioen van die Kovsiestreekkompetisie se Colt-liga, Hoërskool Hoopstad, sal moet waak teen oorgerustheid in vanjaar se eindstryd teen die Hoërskool Vrede.
Dié twee spanne sê mekaar om 12:00 op Shimlapark in Bloemfontein in die eindstryd van vanjaar se liga die stryd aan.
Volg al die aksie regstreeks op SuperSport Schools (www.supersportschools.com).
Die Hoopies is die mees suksesvolste skool sedert die ontstaan van die Colt-liga in 2013. Hulle was al drie keer vantevore in die eindstryd betrokke en het al twee keer in 2017 en 2023 met die kroon weggestap.
Die enigste ander skool wat al twee keer vantevore die titel kon opraap, is die Hoërskool Bultonftein wat in 2013 en 2015 die kroon gedra het. Vrede was ook al kampioen toe hy in 2022 met ‘n klinkende sege van 68-12 vir Curro Kathu in die eindstryd kaf gedraf het.
Hoopstad het vanjaar sy plek in die eindstryd met ‘n oortuigende sege van 55-10 oor Zastron bespreek. Vrede het in die ander halfeindstryd vir Hoërskool Douglas met 27-20 getroef.
Hoopstad en Vrede het mekaar boonop vroeër vanjaar in die Griffon Plattland-liga se eindstryd ontmoet. Die Hoopies was hier gemaklik met 35-12 baas.
Die Hoopies wat deur Schalk Botha en Ernst Conradie gebrei word sou graag die eindstryd met so bietjie minder kollig op hul span wou betree. Daar was landswyd gegons oor die veiligheid van skolerugby na ‘n boorvat op Hoopstad se agtsteman, Adam Barnard, in die sege oor Zastron.
Barnard sal wel Saterdag weer op sy pos aan die agterkant van die skrum vir sy skoolspan wees. Hoopstad moet wel sonder sy losskakel, AJ Brink, klaarkom wat sy sleuetelbeen in die halfeindstryd gebreek het.
Boonop is die kragmeting op SuperSport Schools uitgesaai wat aan Vrede se afrigter, Johan Malan, sonder twyfel ‘n geleentheid gegee het om sy teenstanders nog beter te leer keen. “Ons hoop om die keer beter van onsself rekenskap te gee,” het Malan gesê.
Die stryd in die middelveld tussen die twee spanne se binnesenters, Christo van Rooyen (Hoopstad) en Wynand Engelbrecht (Vrede), behoort een van die hoogtepunte van die eindstryd te wees.
Van Rooyen het twee keer in die sege oor Zastron agter die doellyn gaan kuier.
Die spanne is:
Hoërskool Hoopstad vs Hoërskool Vrede op Shimlapark in Bloemfontein om :
Hoopstad: 15 FP Graham, 14 Barend Greyling, 13 Abrie van Zyl, 12 Christo van Rooyen, 11 Busi Mfebe, 10 Hennie Barnard, 9 Marco Wolfaardt, 8 Adam Barnard, 7 Jakes Human, 6 Michael Steyn, 5 Christiaan Liebenberg, 4 Theuns van Rhyn, 3 Cobus Liebenberg, 2 AP Meyer, 1 Schalk van der Merwe. Plaasvervangers: 17 MJ Hatem, 18 Zandré Louw, 19 AB Muller, 20 Gerhard Burger, 21 Sunny Singh.
Vrede: 15 Leytin Kimmins, 14 Sebonelo Mnguni, 13 Frikkie Kruger, 12 Wynand Engelbrecht, 11 David Gleeson, 10 Ewan Luus, 9 Charl Cilliers, 8 Wikus Fourie, 7 BH Botha, 6 Thabang Motaung, 5 Sheldan van Tonder, 4 Akhona Mcira, 3 Hannes van Rooyen, 2 Adriaan Mostert, 1 CJ Bresler. Plaasvervangers: 16 Vincent Tsotetsi, 19 Nathan Venter, 20 Brandon Ackerman, 21 Lesedi Watls, 22 Ross Booysen.
