SuperSport Schools Plus

Supersport Schools Rugby Logo

Dowie vir 80 weke geskors

By Hannes Nienaber , in Rugby | News , at 2013-05-27

’n Skolerugbyspeler is vir 80 weke uit rugby geskors nadat hy ’n speler van die Hoërskool Waterkloof in Pretoria met die vuis geslaan en daarna met die kop gestamp het.

Luaan Dowie (18), eerstespan-flank van die Hoërskool Noord-Kaap, sal eers weer in 2015 kan rugby speel.

Die Griekwaland-Wes-rugbyunie (GWRU) het Dowie eergister gestraf vir die slanery sowat twee weke gelede in die wedstryd tussen die skole se eerste spanne in Kimberley.

Na verneem word, het Dowie vir die Hoërskool Garsfontein, buurskool van Waterkloof, gespeel voordat hy deur Noord-Kaap “gekoop” is.

Arni van Rooyen, uitvoerende hoof van die GWRU, sê dit “is ’n baie sterk boodskap na buite dat sulke vuil spel nie geduld sal word nie”.

“Dit is iets wat nie op enige rugbyveld tuishoort nie, wat nog te sê in skolewedstryde,” het Van Rooyen gesê.

Jeandré de Beer, Waterkloof se slot wat onder Dowie deurgeloop het, het gisteraand gesê dis ’n swaar straf, maar “ ’n mens moet maar twee maal dink voordat jy vuil speel”.

Dowie het ná slegs 15 minute se spel in die kragmeting ’n rooi kaart van die skeidsregter, Francois de Bruin, gekry vir die vuishou op Jeandré.

Jeandré vertel: “Die game was nog nie lank aan die gang nie. Daar was ’n losgemaal en ek moes die speler (Dowie) uit die gemaal haal.

“Ek het net daarna omgedraai, toe pluk hy my terug. Ek het op my rug geval. My hand het hom skrams tydens die val getref.

“Toe voel ek ’n vuishou in my gesig. Ek het bly lê. Hy het ’n rooi kaart gekry. Toe kom hy weer na my. Ek het hom net uit die hoek van my oog gesien nadat die noodhulppersoneel klaar met my was.

“Hy het my met die kop teen my lip geslaan en ek het geval. Daar was nog vuishoue, maar ek het net my kop vasgehou en my oë toegeknyp. My kop was seer daarna en my lip was stukkend, maar ek het weer gaan speel. ’n Mens verwag maar rofheid in ’n game.”

Dowie was ’n sterk gunsteling om vanjaar in Griekwas se Cravenweek-rugbyspan ingesluit te word.
Henk Brand, skoolhoof en afrigter van Noord-Kaap se eerste span, het gister gesê Dowie is intussen terug in die skool.

Hy was ingevolge die bepalings van die Skolewet vir sewe dae nie in die skool nie.

Dowie het beweer hy is net voor die voorval deur Jeandré in die oog gekrap. Terwyl die skeidsregter, Francois de Bruin, die rooi kaart terug in sy kous gedruk het, het Dowie met die kop geslaan.

Toe Dowie uiteindelik die veld verlaat, het Waterkloof se ondersteuners hom uitgejou waarna hy na bewering vir hulle ’n lelike handgebaar gewys het.

In Welkom in die Vrystaat is Edrich Lonergan (16) van Welkom-Gimnasium na bewering Saterdag in die gesig geskop tydens ’n wedstryd teen HTS Welkom op Gimnasium se veld, berig Tom de Wet.

Volgens ooggetuies was die skop in Edrich se gesig “so hard soos wat jy ’n sokkerbal na die doelpale sou skop”.
Edrich se pa, John Lonergan, het gister ’n prokureursbrief aan HTS Welkom en die Noord-Vrystaatse Hoërskole-rugbyunie gestuur.

Hy het gesê hy sal wag met stappe totdat hy sien wat van die rugbytugsaak word.

error: Sorry ol' chap, those shenanigans are not permissible.