Bianca Lubbe: Affies se talentvolle doel met ‘n blink toekoms
Die 18-jarige Bianca Lubbe van die Afrikaanse Hoër Meisieskool Pretoria (Affies) het die afgelope paar jaar naam gemaak op die netbalbaan.
Van jongs af het Bianca ‘n liefde vir die sport gehad en reeds in graad 1 begin speel. Nou, met talle toekennings en prestasies reeds agter haar naam, staan sy uit as ‘n toegewyde speler met groot drome wat sy graag wil bereik.
Bianca speel hoofsaaklik as ‘n doel, maar is ook vaardig in ondersteunende rolle op die baan.
Haar talent is vroeg reeds raakgesien toe sy gekies is vir die skool se eerste span in sowel graad 10 as 12. In graad 11 is sy as die beste ligaspeler van die jaar by Affies aangewys en het sy ‘n plek in die provinsiale Gauteng-span verwerf. Sy het ook deurgedring na die Top-35 Suid-Afrikaanse-span vir nasionale proewe in beide graad 11 en 12, en die SA o.19-groep gehaal.
In 2022 het sy ‘n taamlike terugslag beleef toe ‘n kniebesering tydens die Absa Wildeklawer-toernooi ‘n operasie vereis het, en moes sy vir nege maande lank langs die baan staan.
Sy het egter met mening teruggekeer om haar o.17 A-span tot ‘n onoorwonne seisoen in 2023 te lei, waartydens hulle liga-, Gauteng- en SA-titels ingepalm het. Vanjaar het haar span weer die Wildeklawer-, Gauteng- en SA-kampioenskap gewen, terwyl sy haar veerkragtigheid en leierskap as kaptein van die Gautengse provinsiale o.18-Delta-span tentoongestel het.
Vir Bianca is die lonendste aspek van netbal om die resultate van haar harde werk te ervaar.
“Om te sien hoe my harde werk vrugte afwerp, is ongelooflik,” sê sy. “Die opgewondenheid om ‘n doel aan te teken en aanmoediging van die skare te ontvang, dryf my om te wil presteer.”
Sy erken egter dat dit moeilik kan wees om gemotiveerd te bly, verál wanneer teleurstellings ‘n mens in die gesig staar.
Bianca kyk op na Gretel Bueta, ’n voormalige speler vir Australië se nasionale span, en droom daarvan om vir die Proteas en in die Suncorp-netballiga in Australië te speel.
“Daardie liga bied soveel potensiaal vir groei,” verduidelik sy en beklemtoon haar ambisie om die beste speler te word wat sy kan wees.
Sy skryf heelwat van haar sukses toe aan haar sterk ondersteuningstelsel, vernaam haar ouers.
“Hul opofferings en aanmoediging by elke wedstryd beteken alles vir my,” sê sy en benadruk hoe belangrik dit is dat mense haar aanspoor terwyl sy haar drome najaag.
