‘Super Steve’ se terugkeer groot hupstoot vir Menlo
Om 87 lopies van 36 aflewerings in ‘n o. 19-Wêreldbeker-wedstryd te moker is spesiaal, maar om jou honderdste wedstryd vir jou skool op jou 18de verjaarsdag te speel, is die spreekwoordelike kersie op die koek.
Dit is wat Saterdag op Hoërskool Menlopark se Steve Stolk wag wanneer hy sy terugkeer tot die span maak. Die seuns van Pretoria verwelkom vir Hoërskool Nelspruit in die vierde ronde van vanjaar se Finsbury-reeks.
Dit is egter nie slegs Stolk wat ‘n bedreiging vir die Nellies inhou nie. Dian van Zyl, Menlo se ander staatmaker in die toporde, kolf ook met mening op die oomblik. Hy het sopas ‘n pragbeurt van 84 in verlede naweek se nederelaag teen Waterkloof aangeteken.
Benewens die gevaarlike kolflys wat op die Nellies wag, lek Menlo se twee draaiers, GN van Zyl en Gerhard Engelbrecht, ook lippe af vir die geleentheid om die Nellie-kolwers aan te vat.
Nelspruit se Nathan Duncan en kaptein, Jayden Meyer, behoort egter nie terug te deins vir die uitdaging nie, Albei beskik oor die vermoë om gevaarlike teenaanvalle met die kolf te loods, terwyl altwee ook vir Nellies se vooraanstaande bouler, Vaughn van Zyl, met die bal kan bystaan.
Van Zyl het deur die loop van die reeks ‘n taamlike reputasie as gevaarman opgebou. Hy behoort ook vars te wees aangesien die Nellies ‘n loslootjie oor die vorige naweek geniet het.
Hoërskool Waterkloof en Hoër Volkskool Potchefstroom pak mekaar in die grootste wedstryd van die naweek in die Jakarandastad. Met albei spanne wat nog onoorwonne is in vanjaar se reeks, kan dit as die nie-amptelike eindstryd van Afdeling A beskou word.
Die Klofies sal hoop dat staatmaker, Divan Behrens, se goeie spelpeil met die kolf voortduur. Saam met Behrens, is Marcus Bakker en kaptein, Beukes van der Berg, ook goed op dreef, wat die Pretorianers se kolflys verder versterk.
In die boulafdeling, sal die twee jongelinge, Jaydon Blom en Jacques van Niekerk, die span van Pretoria se aanval loods. Albei spog met uitmuntende boulsyfers in die span se sege oor Menlopark in ronde vier.
Potchefstroom Volkies se kolflys is egter nie te versmaai nie. Diaan van der Merwe bevind homself in ‘n lopie-ryke fase, terwyl Louis van Wyk ook die lopies oes.
Hulle sal daarop uit wees om die onervare boulaanval van die Klofies onder heelwat druk te plaas. Met die bal sal Dian Liebenberg en Devan Oberholzer groot gevaar vir die Klofie-kolwers inhou.
Die sukkelende Hoërskool Centurion sal hoop om hul eerste sege onder die belt te kry, wanneer hulle teen ‘n vars Hoërskool Rustenburg op tuisbodem te staan kom.
Die Woeries het erg klippe gekou oor die laaste paar rondes. Kaptein en voorslagkolwer, Charl Prinsloo, het egter geen plan om handdoek in te gooi nie. Hy is persoonlik lekker op dreef met die kolf en sal hoop om ook ‘n waardevolle bydrae met die bal te lewer.
Die Rusties se voorslagkolwers, Wessel Oosthuizen en Zander Diedericks, sal gretig wees om, na ‘n kort breek, die tuistoestande ten volle te benut.
