Oos-Moot behou titel as kampioen van die Hansie-week
Die Hoërskool Oos-Moot het net-net daarin geslaag om sy titel as kampioen van die jaarlikse Mauritz Hansen-week in Mookgophong (Naboomspruit) te behou.
Dit was slegs danksy ‘n drie deur sy skrumskakel, Keegan Kuhn, in die doodsnikke van die eindstryd teen die Hoërskool Klerksdorp dat die Ligbloues met 15-14 sy titel as kampioen kon behou.
Oos-Moot het alle stoppe uitgetrek om sy titel te behou. Die skool se begaafde atleet, Ruan de Lange, is spesiaal net vir die eindstryd vanaf die Suid-Afrikaanse Nasionale Junior-kampioenskap in die Paarl af ingevlieg.
Dit was op die ou einde die moeite werd met De Lange wat sy span se enigste ander drie in die eindstryd gedruk het.
Oos-Moot het verlede jaar in die eindstryd van die grootste rugbyweek in die wêreld vir Witteberg van Bethlehem met 28-26 in die eindstryd die loef afgesteek. Witteberg was vanjaar weer op die week in aksie, maar het reeds op die tweede dag teen Oos-Moot met 7-17 die knie gebuig.
Daar was vanjaar weer 86 rugbyspanne tydens die Hansie-week in aksie.
Witteberg het op die laaste dag van die toernooi vir Lydenburg met 40-24 verslaan.
In die o.16-eindstryd het Zwartkop vir Ellisras met 22-8 die loef afgesteek. In die o.14- en o.15-afdelings het Noordheuwel van Krugersdorp oor te veel skietgoed vir sy onderskeie teenstanders beskik. Nories het in die o.15-eindstryd met 48-0 met Die Anker van Brakpan klaargespeel.
In die o.14-eindstryd het Nories nog ‘n makliker sege behaal deur Die Anker met 50-0 af te slag.
UITSLAE VAN DAG 3:
A-veld
| o.19 | Oos-Moot | 15 | Klerksdorp | 14 |
|---|---|---|---|---|
| o.16 | Zwartkop | 22 | Ellisras | 8 |
| o.15 | Noordheuwel | 48 | Die Anker | 0 |
| o.14 | Noordheuwel | 50 | Die Anker | 0 |
| o.19B | Witteberg | 15 | Hans Strijdom | 7 |
| o.19 | Witteberg | 40 | Lydenburg | 24 |
| o.19 | Driehoek | 16 | HTS John Vorster | 7 |
| o.19 | Hugenote (Springs) | 19 | Northcliff | 19 |
| o.19 | Hans Strijdom | 41 | Morgenzon Landbou | 0 |
| o.19 | Geel Kobras | 38 | Rooikatte | 7 |
B-veld
| o.19 | Hoërskool Tuine | HTS Witbank | ||
|---|---|---|---|---|
| o.19 | HTS Tom Naudé | 35 | Erasmus | 3 |
| o.19 | Curro Nelspruit | 39 | Curro Hazeldean | 7 |
| o.16 | HTS John Vorster | 12 | Hugenote (Springs) | 10 |
| o.16 | Oos-Moot | 10 | Witteberg | 7 |
| o.16 | Lydenburg | 31 | HTS Tom Naudé | 17 |
| o.16 | Hoërskool Kroonstad | 33 | Hoërskool Tuine | 5 |
| o.16 | Zwartkop II | 26 | Driehoek | 7 |
| o.16 | Dinamika | 40 | Frikkie Meyer | 0 |
| o.16 | Jeugland | 12 | Erasmus | 7 |
[powr-comments id=”f08d912a_1554054568834″]
