Nellies betrek oud-Blitsbok en CB-breier van die Pumas
Hoërskool Nelspruit het die tweede span van Mpumalanga geword om vandeesmaand ‘n nuwe rugbydirekteur aan te stel.
Die Rhinos se paadjie het kort na afloop van die 2025-rugbyseisoen geskei met die van Ryno Luus, wat aan die begin van die jaar aangestel is.
Dit het to gevolg gehad dat die Nellies vir die voormalige Blitsbok en agterlynafrigter van die Pumas se Curriebekerspan, MJ Mentz, nader getrek het om die leisels as rugbybaas oor te neem.
“Ons is opgewonde om aan te kondig dat Mnr. MJ Mentz as hoof van rugby by ons aangesluit het,” lui ‘n verklaring deur die Nellies op Facebook.
“MJ het geen bekendstelling nodig nie. Hy het self professioneel rugby gespeel en was tot onlangs die Pumas se hulpafrigter. Ons sien uit na die nuwe rugbyseisoen onder sy kundigheid, passie en leierskap, wat beslis nuwe energie na ons rugbyspanne sal bring.”
Mentz se wortels is diep gesetel in Mpumalanga. Hy is op 21 Julie 1982 gebore in Ermelo, waar hy 18 jaar later gematrikuleer het aan die Hoërskool Ermelo.
“Na skool het hy van 2002 tot 2012 vir onderskeidelik die Luiperds, Griekwas en Pumas verteenwoordig, terwyl hy ook van 2006 tot 2011 vir die SA Sewes in 18 toernooie verteenwoordig en saam met dié span ‘n bronsmedalje by Statebondspele in 2010 verower het.
Sy afrigtingsloopbaan het kort ná sy uittrede as speler begin, toe hy as hulpafrigter van die Pumas aangestel is in 2013. In 2015 het hy vir twee seisoene die leisels as hoofafrigter by Jimmy Stonehouse oorgeneem en daardie selfde seisoen die Pumas na hul eerste Vodacombeker-titel gelei.
In 2017, met Stonehouse se terugkeer na die Laeveld, het Mentz betrokke gebly by die span in pienk as agterlynafrigter, ‘n posisie wat hy tot en met sy aanstelling by die Nellies beklee het.
Mentz se werk is vir hom uitgeknip by die Rhinos, en tesame met sy ervaring van die afgelope 12 jaar by die Pumas kan dit nét die woema verskaf wat die Rhinos in die nuwe seisoen benodig. Hoewel nie só ‘n swak seisoen soos sommige mense wil uitmaak nie, het die Nellies warm en koud geblaas in 2025. Dit het daartoe gelei dat hulle een van twee spanne was wat van die SDC Noordvaal Cup se Beker- na die Plaat-afdeling gerelegeer is.
Die Rhinos gaan volgende jaar in die Plaat met Mpumalanga se twee ander swaargewigte, Hoërskool Middelburg (Plaat-naaswenners) en Hoër Tegniese Skool Middelburg, die Plaat se agtereenvolgende kampioen (2024-’25), kragte meet.
Click here for everything you need to know about the SDC Noordvaal Cup
