Middies is ‘konings’ van Middelburg
Hoërskool Middelburg het hul status as “konings van die krieketveld”, in Middelburg, bevestig, met ‘n oortuigende oorwinning van 156 lopies oor HTS Middelburg.
Middies se alsydige Gavin Genis het verál koning gekraai, met sowel bal as kolf. Hy het nie alleen sy span se beste telling van 59 lopies, van 61 aflewerings, aangeteken nie, maar ook drie paaltjies vir 36 lopies laat spat.
Ivan Deale was ewe goed op dreef, en het ‘n waardevolle 33 lopies met die kolf bygedra. Hy en Genis het hul tyd saam in die middel geniet om ‘n handige vennootskap van 65 lopies tot die span se totaal van 241 by te dra.
Ethan Dreyer, die Rooies se sterbouler, het uitgestaan met syfers van drie paaltjies vir 33 lopies, en is uitstekend bygestaan deur Hanro Terblanche (3/65) en Armand Kotze (2/2).
Met die kolf was die Rooies egter teleurstellend. Anthoni Smuts (27) en Hanro Terblanche (21) was die enigste kolwers wat ‘n noemenswaardige bydrae kon lewer.
Katlego Baloyi was egter uitstekend met die bal vir die Middies. Sy vyftal paaltjies het slegs drie lopies in drie beurte gekos. Dit, tesame met Genis se vertoning, het die Rooies tot slegs 85 lopies beperk.
Hoërskool Dinamika het behoorlik by die agterdeur ingeglip, teen Hoër Volkskool Heidelberg. Die span van Alberton is as kampioene van Afdeling D in die Finsbury-reeks gekroon, nadat hulle het met twee paaltjies geseëvier het. Mohammad Valli se 57 lopies van 43 aflewerings was die beslissende faktor tussen die twee spanne.
Jayden Smith se drie paaltjies vir 12 lopies het ook ‘n deurslaggewende rol in sy span se sege gespeel. Dit het veroorsaak dat Volkies slegs ‘n telling van 137 lopies op die telbord kon plaas.
Maro Hartkoph was die span van Heidelberg se voorste kolwer met 46 lopies, terwyl Quentin Dietrechsen hard vir die Volkies baklei het met die bal. Sy boulsyfers van drie paaltjies vir slegs agt lopies, tesame met Jaco Botha se 3/23, was so hittete genoeg om ‘n opskudding te veroorsaak.
Uplands College se Benji Loon het sy span na ‘n spannende ses-lopie oorwinning oor Hoërskool Merensky aangespoor. Loon was die span van Mpumalanga se voorste lopie- en paaltjievraat met onderskeidelik 52 lopies en boulsyfers van 3/50.
Sy aanvangsbouler, Gregory Kazandjis, se ekonomiese skof van twee paaltjies vir 21 lopies het ook ‘n beduidende rol in Uplands se sege gespeel.
Vir die Tzaneeners was dit weerens Rinaldo Bornman wat hand opgesteek het. Die voorslagkolwer het sy span se hoogste telling van 58 lopies behaal, en is mooi deur Luka Heinlein (54) en Xander Schoeman (26) bygestaan.
Kyle Crous was die span se sterbouler met uitmuntende syfers van vier paaltjies vir 33 lopies. Ekstras was egter die Plasies se ondergang en derhalwe moes hulle die knie, na ‘n naelbyt-einde, buig.
Beknopte telkaarte:
Hoërskool Middelburg: 241 (Gavin Genis 59, Ekstras 43, Ivan Deale 33, Hendre Nel 21; Ethan Dreyer 3/33, Hanro Terblanche 3/65, Armand Kotze 2/2, WJ Enslin 2/43). HTS Middelburg: 85 (Anthoni Smuts 27, Hanro Terblanche 21; Katlego Baloyi 5/3, Gavin Genis 3/36)/ Hoërskool Middelburg wen met 156 lopies.
Hoër Volkskool Heidelberg: 137 (Maro Hartkoph 46, Dandre Louw 20; Jayden Smith 3/12, Tyrone Whateley 2/49). Hoërskool Dinamika: 138/8 (Mohammad Valli 57; Quentin Dietrechsen 3/8, Jaco Botha 3/23). Dinamika wen met twee paaltjies.
Uplands College: 213/8 (Benji Loon 52, Ekstras 33, Marley Waspe 32, Luke Barnard 27; Kyle Crous 4/33, Logan Janse van Rensburg 2/23). Hoërskool Merensky: 207 (Rinaldo Bornman 58, Luka Heinlein 54, Ekstras 38, Xander Schoeman 26; Benji Loon 3/50, Gregory Kazandjis 2/21). Uplands College wen met ses lopies.
- Player Profile – Gavin Genis (Hoërskool Middelburg) - 2024-12-03
- Maphaka earns maiden test call-up - 2024-12-01
- Fixtures for the 2024 CSA u16 Boys Week - 2024-11-29
