Klofies se Blou Tornado verwaai Monnas eerste keer sedert 2012
Daar is vooraf verwag dat die Hoerskool Waterkloof se eerstespan slegs ‘n warrelwind op die Ras van Rooyen-veld in Krugersdorp sou wees. Dit was egter die volskaalse Blou Tornado wat gister vir Monument op sy agterplaas met 28-26 afgestof het om sonder twyfel vir die grootste opskudding tot dusver die seisoen te sorg.
Monnas is verlede week vir die derde agtereenvolgende jaar as die Tuks-kampioen gekroon, terwyl Klofies tot dusver selfs nie van sy stoere ondersteuners met veel hoop gelos het nie. Hulle het wel ‘n goeie rede om weer hul span met hernude ywer te ondersteun.
Dit was Klofies se eerste sege oor Monument sedert 2012. Die span se afrigters het boonop nie nodig gehad om ‘n motiverings toespraak voor te berei nie. Monnas se kaptein en haker, Morne Brandon, het in die voorskou vir die wedstryd op SuperSport gese dat Monnas graag vanjaar “die telling groter wil maak”. Waterkloof het na die wedstryd ‘n spanfoto geneem, met ‘n uitgedrukte foto van die uittreksel uit die video van Brandon.
Een swaeltjie maak nie ‘n somer nie, maar vir Klofies was dit die terugkeer van sy vleuel Julian Bogner en agtsteman, Wikus Lindeque, wat die nodige vonk verskaf het.
Bogner wat van ‘n skorsing af teruggekeer het, was uitmuntend. Sy lugspel en aanvallende vermoe was van hoogstaande gehalte. Waterkloof se kantman Eckhardt Boshoff verdien ook vermelding vir die werk wat hy by die afbreekpunte verrig het.
Framesby wat vroeer die week van die Sanix-toernooi in Japan teruggekeer het, het ook vir ‘n opskudding gesorg toe hy vir Boland Landbou met 34-20 in Port Elizabeth getroef het.
In die grootste Afrikaanse-derby in Johannesburg het Randburg vir Linden met 31-23 die loef afgesteek. Hoerskool Alberton het Dinamika met 51-14 in nog ‘n wedstryd van die Virsekerbeker se Afdeling 2 ‘n rugbyles geleer.
Grey-kollege was op sy tuisveld in die Rosestad te sterk vir Selborne College met 62-22. Selborne het egter nooit handdoek ingegooi nie.
Grey se plaasvervanger-skrumskakel, Ross Braude, het gewys dat hy slaggereed is om weer die nr. 9-trui te dra na hy daarvan weens ‘n besering afstand moes doen. Braude het twee keer die doellyn oorgesteek na hy op die veld verskyn het en het glad nie verroes voorgekom nie. Grey kom Saterdag teen Affies in Pretoria te staan.
Die eerste skote van die Virsekerbeker het in die noorde geklap met Garsfontein wat hard moes werk om die Rooi Bulle van die HTS Middelburg met 46-29 in Middelburg te klop. Garsies se haker, Ricardo Botha, het sy beste vertoning nog vir die Turkoois Bere opgedis. Hy en die SA Skole-senter Diego Appollis het albei twee keer die doellyn oorgesteek.
Transvalia se slot Thabang Mholasi was aan die voorpunt van sy span se naelskraapse sege van 23-22 oor Helpmekaar. Die span van Vanderbijlpark het Helpies voorlangs onder druk gehad. Vir Helpies was sy haker, Ricardo van der Merwe, puik.
Die Hoerskool Nelspruit se Rhinos het op sy tuisveld vir EG Jansen met 34-28 die loef afgesteek.
In die Skild-afdeling het Ben Vorster ‘n vroee waarskuwing aan die ander spanne gestuur. Die span van Tzaneen het Florida met 93-12 afgeransel. Ben Vorster se buitesenter, Christiaan Smit, het te veel vrae aan Florida se verdediging gevra en drie keer die doellyn oorgesteek.
Oos-Moot was in dieselfde afdeling ook met 63-3 te sterk vir Hugenote van Springs.
Lichtenburg en die Hoerskool Middelburg was in ‘n herontmoeting van verlede week se NWU-Pukke Prestige-reeks se eindstryd weer slaags, met Lichtenburg wat met 3-0 as oorwinnaars van die veld in die klipharde wedstryd gestap het.
AL DIE UITSLAE:
VIRSEKERBEKER
Afdeling 1 – Beker: Transvalia 23, Helpmekaar 22; Garsfontein 46, HTS Middelburg 29; Hoërskool Nelspruit 34, EG Jansen 28. Plaat: Marais Viljoen 29, Zwartkop 26; Eldoraigne 51, Centurion 20; Hoërskool Rustenburg 46, Montana 17. Skild: Hoërskool Pietersburg 27, Jeugland 20; Ben Vorster 93, Florida 12; Oos-Moot 63, Hugenote (Springs) 3; Lichtenburg 3, Hoërskool Middelburg 0.
Afdeling 2 – Blou Bulle: Die Wilgers 12, Midstream College 11; Overkruin 38, HTS John Vorster 24; Wonderboom 20, Pretoria-Noord 15. Goue Leeus: Hoërskool Alberton 51, Dinamika 14; Randburg 31, Linden 23. Limpopo: Merensky 25, Ben Viljoen 15; Frikkie Meyer 32, Piet Potgieter 8; Ellisras 46, Hans Strijdom 10. Luiperds: Potchefstroom Gimnasium 45, Wagpos 23; Hoërskool Klerksdorp 37, Potchefstroom Volkskool 27. Pumas: Secunda 65, Ermelo 3; Piet Retief 40, Standerton 17; Hoogenhout 30, Oosterland 19. Valke: Heidelberg Volkskool 43, Vereeniging Gimnasium 29; Hans Moore 25, Oosterlig 17; Die Anker 43, Driehoek 14.
Afdeling 3 – Blou Bulle: Pretoria THS 17, Curo Hazeldean 10; Akasia 33, Uitsig 0; HF Verwoerd 41, Cullinan 0; Erasmus (Bronkhorstspruit) 27, Gerrit Maritz 15. Goue Leeus: Leeuwenhof 49, Riebeeckrand 0; Fochville 42, Queen’s High 7; Trinityhouse 17, Jan Viljoen 15; Carletonville 42, President 35; Bekker 29, Trinityhouse 12. Limpopo: Louis Trichardt 33, Frans du Toit 28; Warmbad 17, Nylstroom 13. Luiperds: Wolmaransstad 36, HTS Rustenburg 31; Vryburg 24, Bergsig 12; Hartbeespoort 33, Brits 26; Schweizer-Reneke 10, HTS Klerksdorp 7. Pumas: Barberton 45, Lowveld High 31; Penryn College 52, Sybrand van Niekerk 0. Valke: Brandwag (Benoni) 41, Birchleigh 0; Delmas 29, Springs Boys’ High 5.
Afdeling 4 – Blou Bulle: Maragon Olympus 53, Hercules 0. Pumas: Komatipoort 62, Hendrina 42; Patriot 27, Curro Bakenveld 12; Kriel 63, Evander 0; Carolina 25, Eastdene 0.
VRYSTAAT/GRIEKWAS
Grey-kollege 62, Selborne College 22; Diamantveld 22, Noord-Kaap 16; Sentraal 36, Jim Fouché 13; Louis Botha 61, Landboudal 22; Welkom Gimnasium 52, AHS Kroonstad 7; Goudveld-Hoërskool 31, Voortrekker 14; Witteberg 15, Wilgerivier 12; Duineveld 25, Hoërskool Upington 22; Fichardtpark 15, Hoërskool Grens 5; Riebeeckstad 14, Hoërskool Kroonstad 5; Brandfort 45, Zastron 5; Bultfontein 64, Sandveld 0; Hoopstad 69, Theunissen 0.
OOS-KAAP/KWAZULU-NATAL
Framesby 34, Boland Landbou 20; St Andrew’s College 43, HTS Daniël Pienaar 7; Marlow Landbou 32, Nico Malan 17; Dale College 29, Queen’s College 10; Kingswood College 36, Union 15; Brandwag (Uitenhage) 57, Muir College 5; Durban High School 60, Westville Boys’ High 10; Kearsney College 6, Maritzburg College 3; Hilton College 27, Pretoria Boys’ High 24; Pionier 86 Empangeni 0.
WES-KAAP
Wynberg Boys’ High 36, Grey High School 33; Paul Roos Gimnasium 44, Bishops 21; Paarl Gimnasium 69, Rondebosch Boyys’ High 28; SACS 17, Durbanville 13; Outeniqua 31, Stellenberg 22; Hoërskool Bellville 26, Brackenfell 20; Strand 36, De Kuilen 0; Charlie Hofmeyr 18, Swartland 15; SK Walmers 33, President 10; HTS Bellville 8, Somerset College 3; Hermanus 57, Parel Vallei 12; Tygerberg 61, Monumentpark 6; Hugenote (Wellington) 26, Worcester Gimnasium 21.
NOORDVAAL
Waterkloof 28, Monument 26; St Alban’s College 30, St John’s College 12; Noordheuwel 25, Affies II 17; Lydenburg 62, Curro Nelspruit 7; Curro Heuwelkruin 96, Stanford Lake College 15.
