Helpies mik hoog in 2025

Geoordeel aan die tweede helfte van Helpmekaar Kollege se rugbyseisoen verlede jaar, asook die sukses wat die jongmanne op o.16-vlak behaal het deur die SDC Noordvaal Cup te wen, hou 2025 inderdaad reuse belofte in vir die Johannesburgers.

Volg al die Helpmekaar-aksie regstreeks op SuperSport Schools – (www.supersportschools.com)

Die Helpies ontvang ook vanjaar ‘n beduidende hupstoot met die welbekende rugbybrein van Tjaart van der Walt, wat as tegniese ontleder deel van die eerste span se bestuur sal uitmaak. Die gesoute RJ Liebenberg vat die leisels as hoofafrigter, met Hannriël Coetzee wat die voorspelers sal touwys maak en Shaun Jackson wat beheer neem oor ‘n giftige agterlyn.

Die span van Johannesburg skop op 8 Maart teen Michaelhouse op dié se tuisveld af, waarna hy teen die Witbulle van Pretoria, Afrikaanse Hoër Seunskool (Affies), ‘n week later, op 15 Maart, in die Jakarandastad te staan sal kom.

Coetzee beskik oor ‘n ervare pak voorspelers, met die haker en een van Helpies se uitblinkers in 2024, Gustav Grotius, wat vir nóg ‘n seisoen beskikbaar is, terwyl loskopstut, Liam “Varkie” Devenier, saam met Grotius, teenstanders se voorrye kan laat les opsê.

Oopkantflank, Ziaden Krige, en slot, Eugene de Lange, is ook weer terug in die tuig, terwyl die jongelinge, Jeandré van der Merwe (haker) en Diandro Botha (loskopstut), wat ‘n groot aandeel in die sukses van die o.16-kampioenspan gehad het, ook deur Coetzee ingespan kan word om die voorry meer oemf te gee.

Agterlangs kan Helpies-ondersteuners uitsien na nóg ‘n aksiebelaaide seisoen met vernaam die senterpaar, Clinton Cloete en Ty Ax, wat heelwat gevaar inhou op die aanval. Ax, uiters ervare na ‘n beseringsvrye 2024 waartydens hy die Akademieweek by Jeppe High School for Boys op horings geneem het, sal ongetwyfeld ‘n sleutelrol in die agterlyn vervul.

Shayne en Ethan Lourens behoort hard aan die eerste span se deur klop as skakelpaar. Albei het die Goue Leeus by verlede jaar se Grant Khomo-rugbyweek by Grey High School in Gqerberha vertoonwoordig.

Soos enige span wat met die groot honde in Suid-Afrika wil saamblaf, verwag die Helpies geen maklike wedstryde nie. Bloot die feit dat daar só min te kies was tussen die spanne in die SDC Noordvaal Cup se Beker-afdeling in 2024, is ‘n aanduiding van hoe taai die kompetisie kan wees.

Boonop wag Oakdale Landbou, by die jaarlikse Noord/Suid-toernooi, en Grey College, by die Wildeklawer, op die Johannesburgers, én is die derby teen King Edward VII School ook weer vanjaar  ‘n instelling wat die vonke in Johannesburg sal laat spat.

Die Helpies se doelwit is eenvoudig, maar tóg, wat die groter prentjie betref, taamlik ingewikkeld, naamlik om goed te vertoon by die land se top-rugbyfeeste én om die SDC Noordvaal Cup se Beker-afdeling te verower, iets wat die skool van Johannesburg beslis kan vermag.

Bepalings vir 2025:

• About
• Latest Posts

Franco Oberholzer

Franco is a sports fanatic from Tzaneen, a small town in Limpopo. Obsessed with both cricket and rugby, he still does the sport at club level when given the chance. Combining the rush of sports with his other passion, writing, gives him the fix any sport-crazy fan needs. In his spare time, he spends quality time with family and friends, preferably around a braaivleis fire.

Latest posts by Franco Oberholzer (see all)

• Limpopo Impalas select experienced outfit for Khaya Majola Week - 2025-10-29
• Labuschagne lei Affies jongelinge tot naelbytsege oor Grey - 2025-10-27
• Du Preez dominant in Ysbere triumph, Van Breda destroys Monnas with six of the best - 2025-10-27