Grey pak Glenwood vandag sonder EW, Ruan en Stephen
GREY-KOLLEGE se eerste rugbyspan draf vandag vir die laaste keer om 13:00 in Bloemfontein uit. Die span van die Rosestad kom teen Glenwood van Durban te staan. Dit is die besoekers se laaste kragmeting van dié seisoen, terwyl Grey nog vir Paul Roos Gimnasium in Stellenbosch die stryd moet gaan aansê.
Grey sal die kragmeting en die een teen Paul Roos sonder sy twee Suid-Afrikaanse Skole-speler die heelagter EW Viljoen en Ruan Kramer moet klaarkom. Viljoen en Kramer sal albei more vir die nasionale skole-span in Kaapstad teen sy eweknie van Engeland op die veld draf.
Glenwood sal met ‘n volsterkte span opdraf, maar die span se laaste twee wedstryde teen die onoorwonne Affies van Pretoria en Maritzburg-kollege was albei fisieke wedstryde. “Ons gaan in dié wedstryd in met die gedagte om ons laaste wedstryd saam te geniet. Dit beteken glad nie dat ons nie vir die wen gaan nie, maar daar is nie druk op ons outjies om vandag om ‘n oorwinning te behaal nie. Hulle moet dit net geniet die res sal van self kom,” het Sean Erasmus, afrigter van Glenwood, gesê.
Grey behoort die kragmeting te wen indien hy sy strukture kan behou. Die span sal boonop ook sonder sy senter Stephen Rautenbach moet klaarkom. Hy beleef sedert die Cravenweek sy beste spelpeil vanjaar, maar sal die wedstryd weens ‘n besering misloop.
Glenwood se agterspelers hou daarvan om die bal lug te gee en veral die heelagter Corné Vermaak, vleuel Morné Joubert en senter Nkululeko Mcuma is bekend vir hulle sterk lopies op die aanval. Grey se kaptein en flank Marius Louw sal sy pak voorspelers aanvuur.
Grey het laas in 2006 in Durban teen Glenwood die knie gebuig. Intussen het Grey se haker Martin Wipplinger ook bekend gemaak dat hy sy loopbaan volgende jaar by Westelike Provinsie sal voortsit. Hy was ook lid van die Vrystaatse Cravenweek-span na die 50ste Cravenweek-toernooi vir hoërskole vroeër vanjaar in Polokwane.
Die spanne is:
Grey-kollege: Henry Immelman, Charl Pretorius, Johan Nel, Carel Durow, Theo Ferreira, André Swarts, Heinrich Sander, Alex Jonker, Marius Louw (k), Luan Reynders, De Wet Bezuidenhout, Casper Fourie, Callie Janse van Vuuren, Martin Wipplinger, Andrew du Plessis.
Glenwood: Corné Vermaak, Morné Joubert, Nkululeko Mcuma, Akhona Nela, Sphamandla Ngcobo, Curtis Jonas, Kwazi Khanyile, Jaco Coetzee, Mzwandile Mazibuko (k), Waylen Hippolite, Ntokozo Vidima, Seth van den Heever, Koos Tredoux, Kieran van Vuuren, Percy Mngadi.
![Charlie Hofmeyr u16 - 2018 [captained by Cameron Hanekom]](https://ssschoolsplus.co.za/wp-content/uploads/2024/11/WhatsApp-Image-2024-11-20-at-09.03.03-400x257.jpeg)
