Gimmies verhoed Jolla Bolla op Markotter, Garsies te sterk vir Klofies
PRETORIA. – Wildeklawer-babelas is sonder twyfel ‘n realiteit.
Dit was duidelik in al die wedstryde gister waarby spanne betrokke was, wat nog Maandag op die Wildeklawer-toernooi in aksie was so bietjie vuisvoos met tye voorgekom het.
Garsfontein se Bere het sy oorheersing oor Waterkloof sedert 2013 voortgesit deur ‘n klinkende sege van 50-21 in die Noordvaalbeker op sy tuisveld te behaal.
Garsies het vroeg weggespring en ‘n voorsprong van 17-0 na agt minute se spel geniet, maar daarna so bietjie die voet van die pedal afgehaal.
Die wenspan se kaptein en agtsteman, Abri van der Westhuizen, het van voor gelei en drie keer agter Klofies se doellyn gekuier. Vir Klofies kan sy flank Jean Jooste sy kop omhoog hou.
Die Hoërskool Nelspruit het amper vir ‘n opskudding in Krugersdorp gesorg toe hy met nog so agt minute se speeltyd oor teen Monument voorgeloop het.
Die Wit Bulle het egter na ‘n nuwe rat verwissel om uiteindelik met 20 punte met die telling op 40-20 te seëvier. Dit was veral die losskakel, Justin Viljoen, en die slot RJ Barnard wat van die plaasvervangersbank ‘n groot impak gemaak het.
Helpmekaar het in die ander wedstryd in die Beker-kompetisie van die Noordvaalbeker vir Menlopark met 73-15 gekarnuffel. Helpies se vleuel Pieter Moller het vier keer agter die Parkies se doellyn gaan kuier.
Paarl Gimnasium sal meer as tevrede met hul sege van 24-19 oor Paul Roos Gimnasium op laasgenoemde se tuisveld in Stellenbosch wees.
Albei spanne was duidelik nie op hul skerpste nie na hul Maandag na die Kaap van die Diamantstad moes terugreis.
In Kaapstad het Bishops met 31-25 as oorwinnaars uit die stryd teen SACS getree.
Die kragmeting het boonop die geleentheid gevier van die 150ste jaar sedert die eerste opgetekende kragmeting tussen die twee skole in 1873. Hierdie is die oudste bestaande interskole in Suid-Afrika.
Daar word wel geglo dat die twee skole reeds sedert 1862 teen mekaar op die rugbyveld kragte gemeet het.
Die eerste skolewedstryd in Natal (deesdae KwaZulu-Natal) het tussen Pietermaritzburg High School en Hermannsburg in 1870 plaasgevind. Eersgenoemde is vandag bekend as Maritzburg College en laasgenoemde bestaan ook steeds onder dieselfde naam.
Gepraat van Maritzburg College. Die nuwe besem in Hendré Marnitz (afrigter) is besig om skoon te vee.
Die span van Pietermaritzburg het nie net sy eerste sege sedert 2010 oor Glenwood op sy tuisveld Goldstones behaal nie, maar sommer die besoekers behoorlik met 42-15 gebere.
St Andrew’s College het Graeme College se harde gebreek deur ‘n sege van ‘n enkele punt (24-23) in die doodsnikke te beklink. Losskakel, Danie Hickey moes sy kaptein en binnesenter, Sintu Mjali, se drie na speeltyd reeds vertreke was verdoel om die sege te verseker.
Noordheuwel van Krugersdorp het sy titel as kampioen van die NWU Prestige-reeks suksesvol op die Fanie du Toit-veld in Potchefstroom met ‘n sege van 27-17 oor Oos-Moot verdedig.
Dit was ‘n titaniese tweestryd tussen die twee spanne se losskakels, JT Kapank (Noordheuwel) en Charl van der Sluis (Oos-Moot). Van der Sluis is met nog 15 minute se speeltyd oor van die veld gejaag na hy ‘n tweede geelkaart ontvang het.
Nories se groot held in die sege was egter sy flank Juan Fourie.
Grey-kollege het in die Rosestad met 41-0 oor te veel skietgoed vir Selborne College beskik. Die span se lostrio bestaande uit JJ Theron (kaptein), Keegan Scholtz en Jean-Henri Smith was weer in ‘n klas van hul eie.
Fichardtpark het sy onoorwonne status vanjaar op die rugbyveld behou deur sy grootste sege nog oor Sentraal (33-7) te behaal.
Welkom Gimnasium het ook sy stempel in die Griffon-liga met ‘n oortuigende sege van 43-8 oor Voortrekker van Bethlehem afgedruk. Hoërskool Trio het vir Goudveld-Hoërskool met 29-0 kaf gedraf.
Al die uitslae:
NOORDVAAL BEKER
Afdeling 1
Beker: Garsfontein 50, Waterkloof 21; Monument 40, Hoërskool Nelspruit 20; Helpmekaar 73, Menlopark 15.
Plaat: Kempton Park 32, HTS Middelburg 25; Transvalia 43, Hoërskool Klerksdorp 17.
Afdeling 2
Blou Bulle: HTS John Vorster 24, Hoërskool Tuine 21; Centurion 38, Wonderboom 17. Pumas: Piet Retief 33, HTS Witbank 19; Ermelo 28, Ferrum 13; Piet Retief 26, Rob Ferreira 26.
Afdeling 3
Goue Leeus: Bekker 36, Jan Viljoen 17; Allen Glen 28, Queen’s High 5; Carletonville 36, President 5; Bastion 17, Fochville 13. Limpopo: Louis Trichardt 26, Piet Potgieter 10; Nylstroom 79, Curro Heuwelkruin 7. Pumas: Volksrust 34, Standerton 17; Hoogenhout 32, Oosterland 14; Curro Nelspruit 31, Lydenburg 10. Valke: Brandwag (Benoni) 28, Hoërskool Sasolburg 7.
Afdeling 4
Blou Bulle: Curro Roodeplaat 26, FH Odendaal 11; Tyger Valley 7, Kwaggasrand 5. Limpopo: Warmbad 66, Northern Academy 10; Eric Louw 62, Stanford Lake College 7.
NOORDVAAL
King Edward VII 73, Parktown Boys’ High 22; Pretoria Boys’ High 31, St Alban’s College 7; St John’s College 40, St Andrews (Bloemfontein) 5; Jeppe 43, Westville Boys’ High 31; St David’s Marist 19, Northcliff 14; Ellisras 47, Randburg 7; St John’s College 19, Northcliff 17; Bergsig Akademie 47, Frikkie Meyer 28; Midstream College 57, Wagpos 3; Hoërskool Pietersburg 43, Hans Strijdom 7.
NWU PRESTIGE-REEKS
Noordheuwel 27, Oos-Moot 17; Heidelberg Volkskool 13, Hoërskool Middelburg 11; Hugenote (Springs) 15, Lichtenburg 10; Montana 21, Potchefstroom Gimnasium 17; Die Anker 24, Hoërskool Rustenburg 15; Zwartkop 22, Jeugland 19; Marais Viljoen 29, Wesvalia 22; Potchefstroom Volkskool 14, Oosterlig 7.
KWAZULU-NATAL
Maritzburg College 42, Glenwood 15; Hilton College 36, Durban High School 33; Michaelhouse 23, Kearsney College 20; St Charles College 23, Clifton 12.
OOS-KAAP
St Andrew’s College 24, Graeme College 23; HTS Daniël Pienaar 17, Framesby 17; Kingswood College 36, Stirling 11; Pearson 10, Nico Malan 7; Dale College 26, Cambridge 7; Queen’s College 48, HTS Port Rex 3.
VRYSTAAT/GRIEKWAS
Grey-kollege 41, Selborne College 0; Welkom Gimnasium 43, Voortrekker 8; Fichardtpark 33, Sentraal 7; Hoërskool Trio 29, Goudveld-Hoërskool 0; Witteberg 22, Hentie Cilliers 22; Bothaville 52, Riebeeckstad 0; Wilgerivier 36, Hoopstad 14; Vrede 53, New Horizon 8; Brandfort 31, President Steyn 7; Bothaville 21, Bultfontein 0.
WES-KAAP
Paarl Gimnasium 24, Paul Roos Gimnasium 19; Hoër Jongenskool Paarl 41, Stellenberg 29; Brackenfell 18, Parel Vallei 13; DF Malan 26, Swartland 22; Bishops 31, SACS 25; Durbanville 61, HTS Drostdy 3; Strand 45, Hermanus 0; Rondebosch Boys’ High 35, Milnerton 24; Wynberg Boys’ High 35, Grey High School 8; Charlie Hofmeyr 57, Langenhoven Gimnasium 12; Robertson 33, Tygerberg 19; Worcester Gimnasium 29, Hugenote (Wellington) 26; De Kuilen 19, Vishoek 17; Melkbosstrand 28, Parow 3; Hoërskool Punt 48, Hoërskool Oudtshoorn 19.
