Ervare Gimmies teen omgekrapte groentjies van Voortrekker in Shimla-eindstryd
Die een span is een van die suksesvolste spanne in die Shimla-liga van die Kovsiestreekkompetisie, terwyl die ander Saterdag vir die eerste keer in die eindstryd van dié liga in aksie sal wees.
Welkom Gimnasium sal vir die sesde keer aantree op Shimlapark in Bloemfontein vir die eindstryd van die liga. Die span van Welkom is boonop die verdedigende kampioen van die Shima-liga.
Volg al die aksie regstreeks op SuperSport Schools (www.supersportschools.com).
Die Gimmies was in 2015, 2018, 2019 en 2023 as kampioen gekroon.
Sy teenstander, Voortrekker van Bethlehem, sal vir die eerste keer in dié eindstryd in aksie wees.
Die Trekkers het egter reeds vanjaar vir Welkom Gimnasium as Griffon-kampioen onttroon toe hy vir Gimmies met 36-28 in die eindstryd afgestof het. Die span vanuit die Riemland het boonop die Vrystaatse kampioen, Landboudal van Jacobsdal, met 24-22 uitoorlê om vir homself ‘n plek in die streekkompetisie se eindstryd te bespreek.
Gimmies het die Griekwa-kampioen, Duineveld van Upington, met 44-21 in Kimberley in die ander halfeindstryd afgestof. Die span van Welkom het dié ligawedstryd teen Voortrekker met 26-24 gewen.
Die Trekkers het in sy geledere die SA Skole-vaskopstut, Cecil Parsons, wat met sy stormramlopies ‘n spelbreker vir sy skoolspan is.
Die Trekker-agtsteman, Dawie Fourie, se tweestryd met Ethan “Slang” Jones beloof ook om een van die hoogtepunte van die kragmeting te wees. Fourie het dié tweestryd tussen die twee spelers tydens die Griffon-eindstryd gewen.
Vir Gimmies sal sy skakelpaar, Rewaldo Farmer (skrumskakel) en Ronaldo Kiewiet (losskakel), belangrike rolle vertolk. Kiewiet was in 2023 die voorste puntemaker op die Cravenweek met 48 punte. Indien hy op sy stukke is, sal die trofee weer saam sy span na Welkom reis.
Gimmies se afrigtingspan, Roean Bezuidenhout en Jacques Juries, is van die mees ervare in die sentrale streek. Juries is boonop ook die hoofafrigter van die Griffons se seniorspan. Die Trekkers word deur Justin Taylor gebrei.
Die spanne is:
Welkom Gimnasium vs Voortrekker (Bethlehem) op Shimlapark in Bloemfontein om 14:50:
Welkom Gimnasium: 15 Leano Williams, 14 Ruan Theron, 13 Nathan Muller, 12 Joshua Coertsen, 11 Bokang Lesenyeho, 10 Ronaldo Kiewiet, 9 Rewaldo Farmer, 8 Ethan Jones, 7 Ayden Bezuidenhout, 6 Rovaun van Niekerk, 5 Jayden Auld, 4 Ethan Africa, 3 Ryan Lemmer, 2 Kganya Molapo, 1 Buchle Ngxabayi-Mpaka. Plaasvervangers: 16 Kananelo Tutubala, 17 Alexander Olivier, 18 Moeketsi Lang, 19 Jayden Kruger, 20 Diederik Beuken, 21 Emile Mahlelebe, 22 Vusi Ndayi, 23 Dyllan Kemp.
Voortrekker: 15 Kaneng Komane, 14 Karabelo Chaka, 13 Frederik Fourie, 12 Karabo Ralentloane, 11 Kamohelo Moses, 10 Adriaan Bonthuys, 9 Craig Mann, 8 Dawie Fourie, 7 Jayden de Jesus, 6 Berto van Niekerk, 5 Tristan Meyer, 4 Luttig Roux, 3 Cecil Parsons, 2 Arnold Ras, 1 Francois Maree. Plaasvervangers: 16 Wian Muller, 17 AJ Ferreira, 18 AJ Myburgh, 19 Theo van Wyk, 20 Attila Ozturk, 21 Nolan du Plooy, 22 Thato Nthbere.
10:50 – o.15 – Hoërskool Trio vs Jim Fouché
