SuperSport Schools Plus

SSS_logo_Cricket

Durbies veg terug vir Sammy Bloch-kroon

By Willem Louw , in Cricket | Featured Cricket | News , at 2024-02-29 Tags: ,

Hoërskool Durbanville 1ste XI (Foto verskaf)

Nadat Hoërskool Stellenberg verlede naweek koning gekraai het in hul interskole-kragmeting met Hoërskool Durbanville, kon die Durbies die bordjies verhang om Woensdag die WPNS Sammy Bloch-reeks in te palm.

Dit het oudergewoonte ‘n titaniese stryd afgegee tussen hierdie twee trotse spanne.

Lohann Pretorius en Arno Koen het vroeg verwoesting gesaai onder die Durbie-kolwers, om hulle tot 39/6 te beperk.

Pretorius het in die eerste boulbeurt reeds drie kolwers teruggestuur na die kleedkamer toe, om die teenstanders onder enorme druk te plaas.

Pierre du Toit het egter die momentum geswaai met ‘n skitterende beurt van 55 lopies, voordat Jan-Jak Alberts sy paaltjies geëis het.

Tobias Roelofse het ook goed gevaar om 36 van die Stellenberg-aflewerings te absorbeer, voordat Pretorius sy vierde paaltjie vir die dag geneem het.

Calla du Toit het met ‘n onoorwonne beurt van 23 lopies, ‘n vennootskap van 46 lopies met Pierre du Toit bewerkstellig om hul span ‘n broodnodige hupstoot te gee teen die einde van die beurt.

Roelofse het vroeg in Stellenberg se kolfbeurt teruggeslaan om die eerste paaltjie te laat kantel, en Calla du Toit (3/10) en Jan Kriel (2/17) het verder verseker dat die res van die kolwers nooit hul ritme kon vind nie.

Dit was slegs Yiva Dwaleni wat, op agt, enige weerstand kon bied. Hy het vier grenshoue gemoker en ‘n manhaftige 35 lopies aangeteken om sy span tot binne 14 lopies van die Durbies se totaal te kry.

Xander van Aarde het egter met die laaste bal van die wedstryd sy paaltjies getref om die sege netjies af te rond vir die Durbies en die Sammy Bloch-titel te verower.

 

Beknopte telkaart:

Hoërskool Durbanville: 115/8 (Pierre du Toit 55, Calla du Toit 23*; Lohann Pretorius 4/61, Arno Koen 2/32). Hoërskool Stellenberg: 101 (Yiva Dwaleni 35; Calla du Toit 3/10, Jan Kriel 2/17). Durbanville wen met 14 lopies.

error: Sorry ol' chap, those shenanigans are not permissible.