Brandfort maak gereed vir 18de Pieter Swanepoel Sportdag
Die Pieter Swanepoel/Bizhub Sportdag word Saterdag vir die 18de agtereenvolgende jaar deur die Hoërskool Staatspresident Swart op Brandfort aangebied. Die gasheer sal in die hoofwedstryd van die dag teen Hoërskool Kroonstad op Page-park te staan kom.
Brandfort se eerste rugbyspan het ‘n uitstekende rekord op sy sportdag en vanjaar se eerstespan sal op dit wil voortbou. Die gasheer het sy seisoen verlede week met ‘n klinkende sege van 32-6 oor Hennenman afgeskop. Brandfort se leierskorps is in sy lostrio met die kaptein, Kamo Tlale, wat langs die kant van die skrum sak, terwyl die agtsteman, Johan Muller, die onderkaptein is.
Die vernaamste voorwedstryd kan ook nie misgeloop word nie. Die Hoërskool Outeniqua van George se Kwaggas draf in die wedstryd teen Sentraal van Bloemfontein uit. Die Tralies het nou wel verlede Saterdag sy rieme met 7-37 teen Diamantveld in Kimberley styfgeloop, maar kan steeds nie deur die Kwaggas onderskat word nie.
Die Hoër Landbouskool van Reddersburg sal ook behoorlik getoets word. Die span wat deur Dawie Pretorius en Christie Swarts gebrei word sal teen die Afrikaanse Hoërskool Kroonstad kragte meet. Rooiskool het Dinsdag op Schoonspruit se jaarlikse sportdag in Klerksdorp ‘n Wesvalia XV-tal met 45-12 die loef afgesteek.
Die span van Reddersburg het self op Fichardtpark se Clover Sportdag met ‘n naelskraapse sege van 19-18 oor De Aar gewys wat in hom steek. Rooiskool het op die dag vir Duineveld vir 14-3 verslaan.
Die bepalings is:
A-veld
08:05 – Martie du Plessis vs. Bultfontein
09:15 – President Steyn vs. Boshof
10:25 – Bothaville vs. Parys
11:35 – Hennenman vs. Sand du Plessis
12:45 – AHS Kroonstad vs. Hoër Landbouskool Hendrik Potgieter
13:55 – Louis Botha vs. Hentie Cilliers
15:05 – Outeniqua vs. Sentraal
16:20 – Brandfort vs. Hoërskool Kroonstad
B-veld
15:40 – Wessel Maree vs. Theunissen
Hoofwedstryde van die vorige Pieter Swanepoel Sportdae:
| 2016 | Brandfort | 33 | Wessel Maree | 5 |
| 2015 | Brandfort | 28 | Parys | 16 |
| 2014 | Bothaville | 29 | Brandfort | 14 |
| 2013 | Brandfort | 71 | Wessel Maree | 0 |
| 2012 | Brandfort | 52 | Parys | 7 |
| 2011 | Brandfort | 59 | Riebeeckstad | 0 |
| 2010 | Brandfort | 34 | Richardsbaai | 0 |
| 2009 | Brandfort | 26 | Hennenman | 12 |
| 2008 | Brandfort | 31 | President Steyn | 24 |
| 2007 | Brandfort | 31 | Fichardtpark | 15 |
| 2006 | Brandfort | 33 | Louis Botha | 12 |
| 2005 | Brandfort | 31 | Hoërskool Bloemfontein | 24 |
| 2004 | Brandfort | 25 | Zastron | 9 |
| 2003 | Brandfort | 51 | Ladybrand | 0 |
| 2002 | Brandfort | 21 | Hoërskool Bloemfontein | 20 |
| 2001 | Brandfort | ? | ? | ? |
| 2000 | Brandfort | 60 | Zastron | 0 |
