Bornman, met sewe uit 10, knak Wessies
Rinaldo Bornman was vir die tweede keer vanjaar Hoërskool Wesvalia se moses.
Herleef al die aksie op SuperSport Schools – (www.supersportschools.com)
Die veelsydige Bornman, wat vroeër vanjaar die Wessies met die kolf by die Kovsie Smash T20-toernooi laat les opsê het, het dié slag die bal die praatwerk laat doen vir Merensky Landbou Akademie in die E-afdeling van die Finsbury-reeks.
Die Plasies het die loot gewen en besluit om die besoekers van Klerksdorp eerste in te stuur om te kolf.
Dié besluit het onmiddelik vrugte afgewerp met die hotklou-draaier, Timothy Baker (2/28), wat vroeg toegeslaan het met sy twee paaltjies. Dit het vir kaptein, Luka Heinlein, op Bornman se draaiboulwerk van die oorkantse kant af laat besluit en laasgenoemde het die geleentheid met albei hande aangegryp.
In net 6.2 beurte het die draaier 31 leë balle afgestuur en net 20 lopies afgestaan. Dit was egter die paaltjie-kolom wat die aandag getrek het. Bornman was feitlik op eie houtjie verantwoordelik vir die besoekers se ineenstorting met nie minder nie as sewe van die opposisie se 10 paaltjies. Dit het die Wessies tot ‘n skamele 54 beperk.
Die Plasies het daarna egter dit self nie maklik gevind met die kolf nie. Zaindre Stopford hul toporde heelwat hoofbrekens besorg, met drie paaltjies vir net 15 lopies, maar dit was op die einde van die dag nie genoeg om die tuisspan van ‘n oorwinning met vier paaltjies te weerhou nie.
Hoërskool Secunda se Umar Badat het op tuisbodem sy span tot ‘n gemaklike ses-paaltjie sege oor Hoërskool Klerskdorp gedryf met ‘n onoorwonne 54, wat, tesame Nijan Swart se 38, die span van Mpumalanga in staat gestel het om die nodige lopies reeds in die 26ste bymekaar te maak.
Die grondslag vir die sege is welliswaar deur Jean Loock (3/30) en Jayden Scholtz (3/31) se venynige boulaanval gelê. Jordan van der Schyff het dapper gestaan vir sy 57 lopies, wat ook die hoogste individuele telling op die dag was, maar dit was nie genoeg om die kastaiings uit die vuur te krap vir Klerksdorp nie.
Jayden van Wyk was Hoërskool Dr. EG Jansen se uitblinker teen Hoërskool Linden in Boksburg, met ‘n boulskof van ses beurte wat vier paaltjies ogelewer het vir net ses lopies. Luke Pretorius (2/10) en Brenton Francis (2/12) het verdere skade aangerig, met die gevolg dat EG Jansen se kolwers slegs 127 moes jaag vir hul oorwinning met vier paaltjies.
Beknopte telkaarte:
Wesvalia 54 (M Kinnear 15; Rinaldo Bornman 7/20, Timothy Baker 2/28); Merensky Landbou Akademie 56/6 (Rinaldo Bornman 15; Z Stopford 3/15, J Greyling 2/12). Merensky Landbou Akademie wen met vier paaltjies.
Hoërskool Klerksdorp 193 (Jordan van der Schyff 57, Ekstras 46, Gerrit Koen 36, Luken Maritz 20; Jean Loock 3/30, Jayden Scholtz 3/31, Nathan Erasmus 2/31); Hoërskool Secunda 194/4 (Umar Badat 54*, Nijan Swart 38, Adries Coetzer 27; Gerrit Koen 2/33). Hoërskool Secunda wen met ses paaltjies.
Linden 126 (N Dunn 48, C de Lange 21; Jayden van Wyk 4/6, Luke Pretorius 2/10, Brento Francis 2/12); Dr. EG Jansen 129/6 (Henri Coetzee 27, Ekstras 22, Juan Ungerer 20*; M Steyn 2/15, T Muller 2/31). Dr. EG Jansen wen met vier paaltjies.
