Boland baas teen Ligbloues in die Paarl

Die Blou Bulle kon vir die eerste keer sedert 1995 nie daarin slaag om Boland op die Coca-Cola Cravenweek vir hoërskole te wen nie. Die Wynboere het met 19-17 met die Ligbloues in die modder in die Brugstraat-stadion in die Paarl geploeg. 

Die laaste keer wat die Boland nie die knie teen die Ligbloues gebuig het nie, was in 1995 in Bloemfontein toe die twee spanne met 13-elk gelykop gespeel het. Die gewese Springbok Gaffie du Toit het op daardie dag vir die Wynboere uitgedraf. Vandag was dit ook Boland se losskakel, Lionel April, wat die grootste doring in die Blou Bulle se vlees was. 

April het twee keer die Ligbloues se doellyn oorgesteek. Sy eerste drie was na slegs twee minute se spel toe hy die bal in sy span se kwartgebied onderskep het en ongeveer 80 meter genael het om te gaan afrond.

April het met 16 minute se spel oor in die wedstryd die deurslaggewende drie gaan druk. Sy span se binnesenter, Shane-Cole Williams, is kort voor dit deur die skeidsregter, Jaco Kotze, koelkas toe gestuur. 

Die Blou Bulle het in die tweede helfte die voortou met 17-14 geneem na sy agtsteman, Divan Venter, oorgeval het. Die Wynboere het egter deurgans gemakliker in die nat en koue toestande in die Paarl gelyk.

Die Ligbloues se SA Skole-senter van verlede jaar, Diego Appollis, beleef tot dusver nie ‘n goeie toernooi in die Paarl nie. April het waarskynlik reeds ‘n regmerkie agter sy naam vir vanjaar se nasionale skolespan. 

Puntemakers: 

Boland 19 (14) – Drieë: Lionel April (2), Shane-Cole Williams. Doelskoppe: April (2). Blou Bulle 17 (10) – Drieë: Divan Venter, Campo Willemse. Doelskoppe: Regardt Roets (2). Strafdoel: Roets. 

• About
• Latest Posts

Hannes Nienaber

Hannes Nienaber covered schools' rugby in South Africa for Volksblad, Beeld, and Rapport for 11 years. He also created the biggest school rugby website in South Africa - School of Rugby - back in 2007. It eventually morphed into Supersport Schools Plus. He still occasionally milks cows.

Latest posts by Hannes Nienaber (see all)

• Seymore leads Paul Roos from the front at Peninsula Festival - 2025-01-08
• Khan and Roth gets SACS off to a good start at Peninsula Festival - 2025-01-08
• Hansen to lead SA u19 against England - 2025-01-07