SuperSport Schools Plus

Wilgerivier en Vrede in rillerstryd in die Oos-Vrystaat

By Hannes Nienaber , in Rugby | News , at 2014-06-09

DIE Hoërskool Wilgerivier van Frankfort sal ná sy vasbyt-sege van 24-20 oor die Hoërskool Vrede nou in die halfeindstryd van die Oos-Vrystaatse liga teen Ficksburg te staan kom.

Die halfeindstryde van dié liga vind volgende kwartaal in Frankfort plaas. Vrede sal in die ander halfeindstryd vir Reitz die stryd aansê.

Wilgerivier het teen die omdraaislag reeds 24-6 teen Vrede voorgeloop.

Die tuisspan het egter in die tweede helfte verwoed terug geveg en die verdedigende kampioen behoorlik die skrik op die lyf gejaag.

Volgens Wilgerivier se afrigter, Frans Crous, het sy span in die eerste helfte van sy beste spel nog die seisoen opgelewer, maar in die tweede helfte het die besoekers heeltemal te veel hanteerfoute begaan. Die span se verdediging was ook nie van goeie gehalte in die tweede helfte nie.

Vrede se pak voorspelers het die oorhand in die tweede helfte gehad.

Reitz se senter, NP Linde, het twee keer in sy span se oorwinning van 26-21 oor Ficksburg gaan druk.

Paul Erasmus van Senekal het Ladybrand met 29-7 geklop.

Bothaville het ’n vriendskaplike wedstryd teen ’n vyftiental van Wesvalia van Klerksdorp gespeel en ’n oortuigende sege van 61-8 behaal.

Die span se flank, Drikus Klopper, is as speler van die wedstryd aangewys.

Die losskakel, WJ Crous, kon maklik met sy goeie vertoning ook met die toekenning weggestap het.

Die senterpaar, Derek Beeslaar en Merwe Snyman, het soos altyd ook goeie spel gelewer.

Voorlangs het die kaptein en agtsteman, Sakkie Bester, ook goed vertoon.

Die voorryman, Vuysili Pika wat in sy span se Cravenweek-stut, Armand van Wyk, se plek gespeel het, verdien ook ’n klop op die skouer vir sy vertoning.

• Puntemakers:

Wilgerivier 24 (24) – Drieë: Jan-Hendrik Muller, Gerrie Muller, Ricardo Frade, Stean Marais. Doelskoppe: Gerrie Muller (2). Vrede 20 (6).

Reitz 26 – Drieë: NP Linde (2), Morné Spies, Driaan Scheepers. Doelskoppe: Pieter Henn (3). Ficksburg 21.

St. Andrew 43 – Drieë: Sam Lin, JR de Bruin, Mark Brown, Kyle Hartley, Mel Pienaar, Petri le Grange. Doelskoppe: Kevin Pretorius (5). Strafdoel: Pretorius. Bryanston 3.

Sandveld 33 – Drieë: Michael Fulton (2), Michael Marx, Johan Fick, Spyker Potsane. Doelskoppe: Lucky Bobb (4). Salomon Senekal 27.

Bothaville 61 (28) – Drieë: Sakkie Bester (2), Merwe Snyman (2), Donovan van Wyk, Ricus Alkema, Drikus Kloppers, WJ Crous, Armand van der Merwe. Doelskoppe: Crous (8). Wesvalia 8 (8).

Hannes Nienaber