Westelike Provinsie verneder Blou Bulle op derde dag van die Cravenweek
POLOKWANE. – “Payback is lekker,” Dit is die woorde van Westelike Provinsie se afrigter Hein Kriek na afloop van sy span se oorwinning van 30-6 oor die Blou Bulle op die 50ste Cravenweek-toernooi vir hoerskole hier. ‘n Ligblou-span is nog nooit so op die Cravenweek soos gister verneder nie.
Die Streeptruie het die Blou Bulle sy grootste nederlaag nog ooit op ‘n Cravenweek-toernooi vir hoërskole met die sege toegedien. Wat die oorwinning soeter gemaak het is die feit dat die Blou Bulle die span van die Kaap verlede jaar 47-27 ‘n drag slae toegedien het.
Die punteverskil is die grootste nog met die Ligbloues se nederlaag van 15-38 teen die Vrystaat in 2003 wat die vorige rekord was. Die span het in sy 149 wedstryde sedert die ontstaan van die toernooi in 1964 nog net sewe keer 30 of meer punte afgestaan.
Die Blou Bulle is gister van hulle eie medisyne toegedien. Die Streeptruie het in die skrums die oorhand gehad en hulle stelskopper die vleuel Grant Hermanus het sy skopskoene aangehad. Die verloorspan se skrum was deurgans in tru-rat selfs toe die Streeptruie se kaptein en agtsteman Rikus Bothma vir tien minute in die koelkas was.
Buiten Bothma het sy skrumskakel Herschel Jantjes ook tyd in die koelkas spandeer. Westelike Provinsie het vir ‘n hele ruk met slegs 13 manne gespeel. Die Bulle kon in hierdie tydperk nie daarin slaag om enige punte aan te teken nie.
Die Pumas het hom onder die voorste spanne op die toernooi met sy sege van 40-18 oor KwaZulu-Natal gevestig. Die wenspan se flank, Daniel Maartens het met nog ‘n blink vertoning ‘n duidelike boodskap aan die nasionale skolekeurders gestuur.
Grens het verras deur Boland 39-19 oortuigend ore aan te sit. Die wenspan se kantman, Jedwyn Harty het sy goeie vertoning in sy span se eerste wedstryd met nog ‘n uitmuntende een teen die Wynboere opgevolg. Hy is vir sy inklimspel beloon deur drie keer oor die doellyn te val.
Griekwas se spelers het vir hulle self gespeel en die telbord het die gevolge daarvan weerspieel. Die Poubloues is deur Namibië 27-10 verslaan met laasgenoemde se losskakel Chris Arries wat weer met sy spel beindruk het.
Die gasheer, die Limpopo Blou Bulle het sy rieme behoorlik teen Zimbabwe 5-43 styfgeloop.
Vandag se bepalings:
09:30: Luiperds t. Grens-platteland; 11:00: Valke t. Griekwas-platteland; 12:30: Griffons t. Oostelike Provinsie-platteland; 14:00: Oostelike Provinsie t. Suid-Westelike Distrikte; 15:30: Vrystaat t. Leeus.
