Trekkers en Wilgerivier bobaas in Noord-Vrystaat
Die rugbyspan van Hoërskool Voortrekker het Hentie Cilliers Saterdag in die Noordwes-stadion as kampioen van die Griffon-liga onttroon. Die span van Bethlehem het 33-13 as oorwinnaars van die veld gestap.
Dit is slegs die derde keer wat die Trekkers daarin kon slaag om as kampioen van dié liga gekroon te word. Die vorige twee kampioenspanne was in 2008 en 2011.
Dit was ‘n tawwe stryd met min wat tussen die twee spanne te kies was in die eerste helfte. Die wenspan het met die omdraaislag net-net 14-13 voorgeloop. Die span van Virginia het reeds in die eerste minuut van die kragmeting toegeslaan toe sy agtsteman, Nathan Kemp, oorgeval het.
Die Trekkers het in die tweede helfte die oorhand begin kry en die telling gerek. Veral agterlangs het die span van Bethlehem die oorhand gehad.
Die span se heelagter, Lethole Mokoena, en buitesenter, Donovan Bouwer, het skitterende vertonings gelewer. Voorlangs was die haker, Brandon van Staden, sy span se beste speler op die dag.
Vir Henties was Kemp sowel as die haker Zandré Karelse voorlangs met hulle spel beindruk.
Die Hoërskool Wilgerivier van Frankfort is vir die agtste keer in die geskiedenis as kampioen van die Vrystaatse Plattelandse liga gekroon. Die span het sekerlik een van die beste eindstryde in die geskiedenis van die liga teen die Hoërskool Bothaville naelskraaps met 20-19 gewen.
Bothaville het vroeg 5-0 voorgeloop na sy skrumskakel, JP Korkie, die tuisspan se verdediging vanaf ‘n skrum in die kwartgebied onverhoeds betrap het. Teen die omdraaislag het Wilgerivier danksy ‘n verdoelde drie en strafdoel deur sy kaptein en agtsteman, Gerrie Muller, die voortou met die telling op 10-5 gehad.
Die skeidsregter, Carel van Deventer, het Bothaville se losskakel WJ Crous sowel as sy haker Rikus Alkemu gedurende die kragmeting koelkas toe gestuur. Wilgerivier se binnesenter, Jahn Workel, het ook ‘n geelkaart ontvang vir ‘n gevaarlike duikslag wat eintlik deur sy sentermaat, Willem Coetzee, uitgevoer is.
Wilgerivier het op ‘n stadium met 20-5 voorgeloop, maar Bothaville het terug geveg en die tuissspan moes op die einde verwoed walgooi om sy derde agtereenvolgende titel in te oes.
Die wenspan se kaptein, Muller, was weer ‘n rots vir sy span. Die vaskopstut, Jan-Hendrik Muller, het ook weer meters ver veld met die bal onder die arm gewen. Terwyl die losskakel, Alré van Heerden, met sy taktiese skopwerk telkens daarin geslaag het om Bothaville se vleuels te laat omdraai.
Vir Bothaville was sy skrumskakel, JP Korkie, uitstaande hoewel die hele span ‘n klop op die skouer verdien.
In die uitspeelwedstryd vir wie die Sandveld in die Kovsiestreek-kompetisie se Colt-liga sal verteenwoordig het Bultfontein gesweet om Sandveld van Wesselsbron met 19-8 onder te kry. Bulties se senter, Arno Taljaard, het twee van sy span se drie drieë gedruk.
Die Hoërskool Paul Erasmus se jaarlikse Oranje Drukkery-toernooi (vir spanne sonder matrieks) het ook verlede week afgeskop. Die Hoërskool Reitz se span het die meeste op die eerste ronde van die toernooi beindruk deur Hennenman met 38-21 kaf te draf. Die span se Morné Spies het vier keer gaan druk met Kevin Smalberger en Marnus du Plooy wat ook elkeen ‘n draai agter die doellyn gaan maak het. Neil van der Merwe het vier van die drieë verdoel.
In die ander kragmetings het die gasheer vir Wessel Maree van Odendaalsrus met 24-12 geklop, terwyl Hoërskool Kroonstad vir HTS Welkom 18-11 uitoorlê het.
Theunissen het Marquard met 28-14 verslaan, terwyl Riebeeckstad met 21-12 oor Ficksburg baas was.
Puntemakers:
Voortrekker 33 (14) – Drieë: Boeta Vermaak, Lethole Mokoena, Tiisetso Madonsela, Phillip Maré, Clinton Moloi. Doelskoppe: Tokkie van Zyl (4). Hentie Cilliers 13 (13) – Drieë: Nathan Kemp, Justin Williams. Strafdoel: Jaywinn Juries.
Wilgerivier 20 (10) – Drieë: Gerrie Muller, Ricardo Frade. Doelskoppe: Muller (2). Strafdoele: Muller (2). Bothaville 19 (5) – Drieë: Sakkie Bester, JP Korkie, Merwe Snyman. Doelskoppe: WJ Crous (2).
Bultfontein 19 (12) – Drieë: Arno Taljaard (2), Joepie Taljaard. Doelskoppe: Bernard Fourie (2). Sandveld 8 (0) – Drie: Ettienne Verster. Strafdoel: Lucky Bob.
