Skole speel ook te veel wedstryde
Die meeste van die groot rugbyskole in Suid-Afrika speel te veel rugby.
Die Hoër Jongenskool Paarl het vanjaar al 20 wedstryde gespeel. Die hoofrede vir dié syfer is die feit dat hy vanjaar Suid-Afrika op die jaarlikse Sanix-toernooi in Japan verteenwoordig het. Boishaai sal vanjaar nog vier wedstryde speel met die moontlikheid vir nóg twee wedstryde as hy tot in Die Burger-kompetisie se eindstryd vorder.
“Ons het al 20 wedstryde gespeel en van ons seuns wat aan proewe, die Cravenweek en ander provinsiale weke gaan deelneem, sal amper 40 speel. Nie eens professionele spelers speel so baie wedstryde in ’n seisoen nie,” het Sean Erasmus, hoof van rugby by Boishaai, gesê.
Erasmus is ná die eerste jaar van die Jake White-afrigtings-kursus, wat landwyd aangebied is, as die voorste breier aangewys wat die kursus bygewoon het. “Ons spandokter, dr. Kobus Uys, het self gesê die getal wedstryde is swaar op ons seuns se lywe. Dit is ook moeilik om die kondisionering reg te hou met dié getal kragmetings,” het Erasmus gesê.
Dries van der Wal, voormalige hoof van rugby by Grey-kollege en voormalige Suid-Afrikaanse skolekeurder, het Erasmus se gevoelens beaam oor die hoeveelheid rugby wat die seuns speel.
“Ek dink dit raak te veel. Daar is ook soveel ekstra druk op dié skole, spelers en afrigters om te presteer. Die gehalte van skolerugby is baie hoog. Die seuns speel buiten proewe nog drie opwarmingswedstryde voor die Cravenweek en dan nog drie wedstryde tydens die Cravenweek. As jy die SA Skole-span haal, speel jy nóg drie wedstryde,” het Van der Wal gesê.
Grey het vanjaar 21 wedstryde op sy program. Spanne wat vanjaar soos Grey die Kearsney-kollege-Paastoernooi en die Wildeklawer-toernooi bygewoon het, het binne 11 dae vyf wedstryde teen die voorste rugbyskole in Suid-Afrika gespeel.
Dan is daar ook ’n skool soos die Hoërskool Noord-Kaap in Kimberley wat sukkel om genoeg wedstryde te kry. Die span kon tot dusver nog net 11 wedstryde speel, met nog vyf wedstryde wat vir die span in dié seisoen voorlê as hy tot die eindstryd van die Kovsiestreek-kompetisie deurdring.
“Ons sukkel om genoeg wedstryde te kry. Ons het nou weer gevra dat daar gekyk sal word om die Griekwa-liga weer te begin speel. Ek dink 20 wedstryde ’n seisoen vir ’n skoolspan is genoeg,” het Shaun Huygen, hoofafrigter van Noord-Kaap, gesê.
Affies in Pretoria speel die afgelope twee jaar net 15 wedstryde per seisoen. “Daar moet dalk gekyk word om die seisoen se tydsduur te verleng en nog dieselfde getal wedstryde te speel. Ons moet die seuns beter bestuur,” het Erasmus gesê.
